2 REYES 23:26 - Dios Rimashcata Quillcashcami

²⁶ Josías chashna ruhuacpipish, Mandac Diosca Judá llactata jatun mandac Manasés yallita millaita ruhuashcamantaca Judá llactapi causaccunahuan nina japiric shina piñarishpami catirca.

2 REYES 23:26 ပူးပေါင်းရင်းမြစ်များ

2 REYES 22:13

«Ñucamantapish, cai pueblopi causaccunamantapish, Judá llactapi tucui causaccunamantapish cai tarishca libropi quillcashca shimicuna ima nisha nicushcata Mandac Diosman tapugrichic. Ñucanchic ñaupa taitacuna ñucanchicmanta cai libropi quillcashca shinallatac mana cazushpa causashcamantami Mandac Dios ñucanchic-huan nina japiric shina piñarishca» nirca.

2 REYES 24:2

Ashtahuanpish Mandac Diosca Joacimhuan macanacuchunmi caldeocunapac, siriocunapac, moabitacunapac, amonitacunapac soldadocunata cacharca. Mandac Diosca pai ima nishcata huillac, paita serviccunaman huillashca shinallatacmi Judá llactapi causaccunata tucuchichun cacharca.

2 REYES 24:20

Chaimantami Mandac Diosca Jerusalenpi causaccunahuanpish, Judá llactapi causaccunahuanpish yallita piñarishpa, paipac ñaupamanta llucchishpa cacharca. Sedequiasca Babilonia llactata jatun mandacta mana cazushpami cariyarca.

2 REYES 24:3

Manasés juchacunata ruhuashcamanta, tucui imatapish pai ruhuashcamantami paipac ñaupamanta anchuchingapac Mandac Diosllatac Judá llactata llaquichichun cacharca.

2 REYES 24:4

Shinallatac mana faltayuc gentecunata huañuchishcamantapishmi, chashnaca ruhuarca. Mana faltayuc gentecunapac yahuarca Jerusalenpimi jundarca. Chaimantami Mandac Diosca mana perdonasha nirca.

2 CRÓNICAS 35:20

Tucui chaicunata ruhuashca shinallatac, Mandac Diospac huasitapish Josías ña allichishca quipaca, Egipto llactata jatun mandac Necaomi Eufrates jatun yacu ladopi tiyac Carquemis pueblopi causaccunahuan macanacungapac rirca. Shina ricpimi, Josiasca paihuan macanacungapac llucshirca.

2 CRÓNICAS 36:16

Ashtahuanpish paicunaca Mandac Dios cachashca huillaccuna huillashcata mana cazushpami asircacuna. Dios huillachishca shimita yangapi churashpami, Dios ima nishcata huillaccunata burlarcacuna. Pai acllashcacuna chashna yallita llaquichicpimi, Mandac Diosca yallita piñarishpa, ima shina mana jarcari pudishpa llaquichirca.

ESDRAS 10:14

Caipi tucui tandanacushca canapac randica, ñucanchicta pushaccuna ñucanchicpac randi caipi saquirichun. Cutin ñucanchic pueblomanta, shuc llactamanta huarmicunahuan cazarashcacunaca ñucanchic pueblocunata pushac yuyaccunahuan, juezcunahuan cancuna cayashca punzhapi shamuchun. Ñucanchic mana allita ruhuashcamanta Dios ñucanchic-huan nina japiric shina piñarishca anchuringacamanmi chashna ruhuana— nircacuna.

JEREMÍAS 23:20

Mandac Diosca pai yuyashca shinata ruhuashpa, pactachingacamanmi pai piñarishcataca manatac pasachinga. Quipa punzhacunami chaicunataca allita yachanguichic» nirca.