2 REYES 18:32 - Dios Rimashcata Quillcashcami

³² Ñucaca cancunapac llacta shinallatac alli granota pucuc, vinopish, tucuilaya micunapish, uvas chagracunapish, olivospish, aceitepish, bunga mishquipish tiyac llactaman pushac shamungacamanmi chashna causanguichic. Chashnami mana yarcaihuan huañunguichic. Ezequiastaca mana uyanachu canguichic. Paica llullashpami: ‘Mandac Diosca ayudangami’ nicun.

2 REYES 18:32 ပူးပေါင်းရင်းမြစ်များ

GÉNESIS 49:11

Mama burropac huahua cari burrotaca uvas chagrapimi huatanga. Paipac churanataca vinopimi tacshanga. Pucanlla uvasta capishca yacupimi jahualla churanataca tacshanga.

2 REYES 17:23

Mandac Diosca pai ima nishcata huillac serviccunaman huillachishca shinallatacmi israelcunataca paipac ñaupamanta llucchishpa cacharca. Israelcunaca paicunapac llactamanta Asiria llactaman prezu apacpimi, cunancaman chaipi cancuna.

2 REYES 17:6

Iscun huatata Oseas mandacucpimi, Asiria llactata jatun mandacca Samaria pueblota quichushpa, israelcunatapish Asiria llactaman prezu aparca. Chashna apashpami, Gozán yacu ladopi tiyac Halah, Habor pueblocunapi medocunapac pueblocunapi causachun churarca.

2 REYES 18:11

Asiria llactata jatun mandac israelcunata Asiria llactaman prezu apashpaca, Halah pueblopi, Gozán jatun yacu ladopi cac Habor llactapi causachunmi churarca. Shinallatac medocunapac pueblocunapipish churarcami.

2 REYES 19:10

«Judá llactata jatun mandac Ezequiastaca: “Can shunguta churashca Diosca: ‘Jerusalentaca Asiria llactata jatun mandacpac maquipica mana churashachu’ nishpa, llullachunca ama saquichu.

2 REYES 25:11

Soldadocunata mandac Nabuzaradanca chai pueblopi maijan saquirishca gentecunatapish, Babilonia llactata jatun mandac-huan tucushca gentecunatapish, huaccha gentecunatapish prezumi aparca.

SALMOS 3:3

Ashtahuanpish Mandac Dioslla, escudo shinami ñuca muyundita jarcangui. Canca sumaimana cushichicmi cangui. Ñuca umata alzachishpa sinchiyachicmi cangui.

SALMOS 42:4

Achcacunata pushashpami Diospac huasimanca ric carcani. Fiestacunapipish achcacunahuanmi cushi tonohuan cantashpa chayac carcani. Tucui chaicunata yuyarishpami, tucui almahuan yallita llaquirini.

ÉXODO 3:8

Chaimantami Egipto runacunapac maquimanta cacharichingapac urai shamurcani. Cai llactamanta llucchishpa lechepish, mishquipish tiyac sumac llactaman pushangapacmi shamurcani. Chai llactaca cananeocunapac, heteocunapac, amorreocunapac, ferezeocunapac, heveocunapac, jebuseocunapac llactami can.

ISAÍAS 36:17

Cancunapac llacta shinallatac alli granopish, vinopish, tandapish, uvas chagrapish tiyac llactaman ñuca pushac shamungacaman chashna causaichic.

NÚMEROS 14:8

Mandac Dios ñucanchicman chai allpata cusha nishpaca paillatac cungallami. Chai llactaca lechepish, mishquipish yacu shina callpacuc llactami.

DEUTERONOMIO 11:12

Chai llactataca Mandac Diosmi cuidacun. Mandac Diosca huata callarimanta, huata tucuringacamanmi cuidacunlla.