2 CORINTIOS 13:4 - Dios Rimashcata Quillcashcami

⁴ Ari, paica imatapish mana ruhuaipac shinami, cruzpi chacatashca carca. Shina cashpapish poderta charic Diosmantami causacun. Chai shinallatacmi ñucanchicca Cristo shina, imatapish mana ruhuaipac shina canchic. Shina cashpapish paihuan shuc shinalla tucushpami, Diospac poderhuan cancunapac allipac causashun.

Nuevo Testamento en Quichua Cañar 1996

⁴ Ari, paica imatapish mana ruhuaipac shinami, cruzpi chacatashca carca. Shina cashpapish imatapish ruhuaclla Diosmantami causacun. Chai shinallatacmi ñucanchicca Cristo shina, imatapish mana ruhuaipac shina canchic. Shina cashpapish paihuan shuc shinalla tucushpami, Taita Dios imatapish ruhuaclla cashcahuan cancunapac allipac causashun.

2 CORINTIOS 13:4 ပူးပေါင်းရင်းမြစ်များ

SAN JUAN 10:18

Pipish ñuca causaita mana quichungachu, ashtahuanpish ñucallatacmi cusha. Huañungapacpish, causarinatapish poderta charinimi. Chashna ruhuachunmi, ñuca Taitaca mandarca— nirca.

HECHOS 2:36

Chaimanta tucui israelcuna, caitaca alli yachaichic. Chai cancuna cruzpi chacatashca Jesusllatatacmi Diosca, Mandac cachunpish, Quishpichic Cristo cachunpish churashca» nirca.

HECHOS 3:16

Cai cancuna ricushca, ricsishca runaca Jesusta crishpami alliyashca. Paica Jesusta crishcamantami cancunapac ñaupapi alliyashca shayacun. Ima shina pai alliyashcataca cancunami ricucunchic.

ROMANOS 1:4

Diospac jucha illac Espiritumi poderhuan huañushcacunapuramanta causachirca. Chashnami Diospac Churi poderyuc cashcata ricuchirca.

ROMANOS 14:9

Chaipacmi Apunchic Jesusca huañurca, shinallatac causarirca. Chashnami tucuipac Mandac cangapac causarirca.

ROMANOS 6:4

Diosca, paipac poderhuanmi Cristota huañushcacunapuramanta causachirca, chai shinallatacmi ñucanchicpish mushuc causaita causangapac bautizarircanchic. Shinallatac Cristo huañushca shina huañungapac, pai enterrarishca shina enterraringapacmi bautizarircanchic.

1 CORINTIOS 1:25

Cai pachapi causaccunapac Dios huillashca pucllashca shina cashpapish, tucui cai pachapi cac yachachishcacunamanta yallimi. Shinallatac Dios ruhuashcaca imapac mana valic shina cashpapish, tucui cai pachapi ruhuashcacunamanta yalli valishcami.

1 CORINTIOS 15:43

Millana cuerpohuan enterrarishpaca sumacyachishca cuerpohuanmi causaringa. Irquiyashca cuerpohuan enterrarishpaca sinchi cuerpohuanmi causaringa.

1 CORINTIOS 2:3

Cancunahuan cashpaca, manchaihuan irquiyashca, chucchucucmi carcani.

1 CORINTIOS 6:14

Apunchic Jesusta causachic Diosllatacmi paipac poderhuan ñucanchictapish causachinga.

2 CORINTIOS 10:10

Ñucataca maijancunaca: “Pai quillcashcaca sinchitami riman, ashtahuanpish pai quiquin caipi cashpaca, shina shinallami. Shinallatac pai rimashpaca, pitapish mana cazuchinchu” nincunami.

2 CORINTIOS 12:10

Cristomantaca ñuca imatapish mana ruhuaipaclaya cashcamantapish, ñucata camishcamantapish, ima illaclla cashcamantapish, juchanchishcamantapish, llaquichishcamantapish cushicunimi. Ñucaca imatapish mana ruhuaipaclaya cashpaca, ashtahuanmi imatapish ruhuaipaclaya cani.

2 CORINTIOS 13:9

Chaimanta ñucanchicta “shina shinalla criccunami” nicucpipish, cancuna ashtahuan sinchi criccuna cacpimi cushicunchic. Cancuna Cristota catishpa, ashtahuan sinchiyangacamanmi, Diosta mañashpa caticushunlla.

FILIPENSES 3:10

Cunanca tucuimanta yallica Cristota ricsishpami, pai causarishca quipa imatapish ruhuaclla cashcata ricusha nini. Shinallatac pai llaquita apashpa huañushca shinallatacmi, ñucapish llaquita apana cacpipish pai shina huañusha nini.

HEBREOS 5:7

Apunchic Jesucristoca cai pachapi causacushpami, huañuimanta quishpichic Diosta caparishpa, huacashpa mañarca. Jesusca Diosta yallita cazushpami causarca. Chaimantami Diosca uyarca.

1 PEDRO 3:18

Cristoca ñucanchic juchacunamantami, ñucanchicta Diospacman pushangapac, manapish juchayuc cashpa, millaicunamanta llaquita apashpa shuc cutinlla huañurca. Paica aichallapimi huañurca. Shina cashpapish Dios causachicpimi, espiritupica huiñaita causacun.

1 PEDRO 3:22

Jesucristomi jahua pachaman rishpa, Diospac alli maquiman tiyacun. Paimi angelcunatapish, poderta charic mandac espiritucunatapish mandacun.