1 SAMUEL 18:17 - Dios Rimashcata Quillcashcami

¹⁷ Chaimantami Saulca Davidtaca: —Riqui, ñuca punta ushi Merabtami cambac huarmi cachun cugrini. Can Mandac Diosmanta sinchita macanacushpa atichunmi cambac huarmi cachun cugrini— nirca. Shina nicpipish, Saulca Davidtaca: «Mana ñuca maquihuan huañuchishachu. ¡Ashtahuanpish filisteocuna huañuchichun!» yuyashpami, chashna nirca.

1 SAMUEL 18:17 ပူးပေါင်းရင်းမြစ်များ

2 SAMUEL 11:15

Chai quillcashcapica: «Uriasta ashtahuan sinchita macanacuc pushtuman pushanguichic. Paita chaipi chugrichishpa huañuchichun, cancunaca shitashpa anchuringuichic» nishpami quillcashca carca.

2 SAMUEL 12:9

¿Ima nishpatac ñuca nishcataca mana uyashpa, ñucapac ñaupapi mana allita ruhuarcangui? Heteopuramanta Uriaspac huarmita japingapacmi Uriastaca huañuchircangui. Canca Amón llacta gentecunapacman cachashpami huañuchichishcangui.

2 SAMUEL 6:16

Mandac Diospac Arcahuan David paipac puebloman saltarishpa, danzashpa shamucucta Saulpac ushi Mical ventanamanta ricushpami, paipac shungupi Davidca mana allichu nirca.

SALMOS 12:2

Caishuc chaishucmi shuctac runacunahuan llullanacuncuna. Imatapish nic tucuclla, mishqui shimi jayac shungucunami.

SALMOS 55:21

Paipac rimashca shimicuna mantequilla shina ñutunlla cashpapish, paipac shungupica macanacuna yuyaillami can. Aceitetapish yalli ñutunlla rimaicunata parlashpapish espadata bainamanta llucchishpa charicuc shinami can.

PROVERBIOS 26:24

Piñac runaca nic tucushpallami mishquillata riman. Ashtahuanpish shungupica pandachina yuyaillami puricun.

PROVERBIOS 26:25

Canhuan apanacuc tucushpa rimacpica, ama cringuichu. Chaica, paipac shungupica canchis jatun millanayai yuyaicuna jundami.

PROVERBIOS 26:26

Pai piñarishcata shimihuan pacacushpapish, pai mana allita ruhuashcaca tandanacuipimi ricuringa.

NÚMEROS 21:14

Chaimantami Mandac Diospac macanacuimanta quillcashca libropica: «Puca Cuchatapish, Arnón yacutapish pasarcanchicmi.

NÚMEROS 32:20

Shina nicpimi Moisesca: —Cancuna nishca shina, Mandac Diospac ñaupata macanacungapac richiclla.

NÚMEROS 32:27

Canta servic ñucanchicca, can ñucanchicta mandashca shinami, Mandac Diospac ñaupata macanacungapac pasashun— nirca.

NÚMEROS 32:29

—Gadpac, Rubenpac aillupuramanta cac israelcuna Mandac Dios mandashca shina, cancuna allpata japingacaman Mandac Diospac ñaupata macanacunahuan macanacungapac cancunahuan pacta Jordán yacuta pasacpica, cai Galaad llactata cunguichic.

DEUTERONOMIO 17:7

Testigoracmi millaita ruhuac runataca rumihuan shitana can. Quipami chai llactapi causaccunaca rumihuan shitashpa huañuchina can. Chashnami cancunapac chaupimantaca millaita anchuchinguichic.

1 SAMUEL 14:49

Saulpac churicunaca Jonatán, Isúi, Malquisuami carca. Shinallatac paica ishcai ushicunatami charirca. Punta ushica Merab quipa ushica Micalmi carca.

1 SAMUEL 17:25

Paicunaca: —Ñucanchicta rimashpa manchachic runa llucshimuctaca ¿Manachu ricunguichic? Maijanpish paita atic runataca jatun mandacca yalli chayuctami ruhuanga. Paipac ushihuanpish cazarachingami. Shinallatac paipac huasi ucupurapish mana impuestota pagangachu— nirca.

1 SAMUEL 17:36

Canta servic ñucaca leonta cashpa, osota cashpa huañuchicllami carcani. Circuncisionta mana ruhuashca filisteo runaca causac Diospac soldadocunatami rimashpa llaquishca. Chaimanta paitapish chai animalta shinallatacmi huañuchisha— nirca.

1 SAMUEL 17:47

Shinallatac Mandac Diosca mana espadahuan, mana lanzahuan quishpichic cashcatami tucui caipi cac gentecunaca yachanga. ¡Cai jatun macanacuica Mandac Diospacmi! ¡Paimi cantaca ñucanchic maquipi churanga!— nirca.

1 SAMUEL 18:21

Chaimantami Saulca: «Tucllapi urmachic shinami filisteocunapac maquipi paicuna huañuchichun cazarachisha» yuyarca. Chaimantami Saulca cutinllatac Davidtaca: —Cunanmi ñuca yerno cagringui— nirca.

1 SAMUEL 18:25

Shina huillacpi Saulca: —Davidtaca: “Jatun mandacca ushimanta pagachunca mana munanchu. Ashtahuanpish pai jatun mandacta piñaccuna llaquichishcamanta patsac filisteocunata huañuchishpa paicuna charishca asha aicha carata pitishpa apamuchunmi munan” nigrichic— nirca. Saulca Davidta filisteocuna huañuchichun yuyashpami chashnaca nirca.

1 SAMUEL 18:27

Davidca paipac soldadocunahuan rishpa, ishcai patsac filisteocunata huañuchishpa, paicuna charishca aicha carata pitishpa jatun mandacman cungapac apamurca. Davidca jatun mandacpac yerno tucungapacmi chashna ruhuarca. Chaimantami Saulca paipac ushi Micalhuan Davidtaca cazarachirca.

1 SAMUEL 25:28

Canta servic ñuca piñachishcataca perdonai. Mandac Diosllatacmi can ñucata mandacmanca huiñaita mandanata cunga. Ñuca amomi Mandac Diosmanta macanacucun. Cambac tucui causaipi ima mana allica canpica mana tiyangachu.

1 SAMUEL 30:26

Siclag pueblopi David chayashpaca, macanacushpa quichumushcacunataca Judá llactapi causac yuyaccunamanpish, paipac ricsishcacunaman cuchun cachashpaca: «Riqui, caicunatami canman carani. Caicunaca Mandac Diosta piñaccunamanta quichumushcacunami» nirca.