1 REYES 2:2 - Dios Rimashcata Quillcashcami

² «Ñucaca cai pachamanta tucui mashna rina ñanllatatacmi catishpa rigrini. Shina cacpipish, canca sinchi tucushpa, cari cari shayaringui.

1 REYES 2:2 ပူးပေါင်းရင်းမြစ်များ

2 SAMUEL 10:12

Ñucanchic llactamantapish, ñucanchicta Mandac Diospac pueblocunamantapish sinchita macanacushunchic. Ama manchaichu. Mandac Dios pai munashca shina ruhuachun» nirca.

2 SAMUEL 12:23

Ashtahuanpish cunan ña huañushca quipaca, ¿imapactac ayunasha? ¿Chashna huacashpaca causachishachu? ¡Ashtahuanpish ñucami paipacman risha, paica mana ñucapacman cutingachu!— nirca.

1 REYES 3:7

Cunanca, ñucata Mandac taita Dioslla, canmari canta servic ñucataca cunan huiñai huambra imata mana yachacpipish, ñuca taita Davidpac randi jatun mandac cachun churashcangui.

1 CRÓNICAS 22:13

Mandac Dios israelcunaman cuchun Moisesman cushca mandashcacunata, yachachishca shimicunata can pactachicpica, imata ruhuacpipish allimi llucshingui. Cari, cari sinchi cangui. ¡Ama manchaichu, ama llaquirichu!

1 CRÓNICAS 22:16

Curipish, cullquipish, broncepish, fierropish maita mana yupaipacmi tiyacun. ¡Jatarishpa utca ruhuai callarilla! Mandac Diosca canhuan cachun» nirca.

1 CRÓNICAS 28:10

Riqui, cunanca Mandac Diosca cantaca shuc huasita shayachishpa, paipaclla chicanyachichunmi acllarca. ¡Ama manchashpa, chaitaca ruhuailla!» nirca.

1 CRÓNICAS 28:20

Shinallatac paipac churi Salomontaca: «Sinchi, sinchi tucushpa, cushicushpa ruhuai callarilla. Ñucata Mandac Diosca canhuanmi. Chaimanta ama manchaichu, ama shaicuichu. Mandac Diosca paipac huasita tucuita alli ruhuashpa, tucuchingacaman cantaca manatac saquingachu, mana cungaringachu.

JOB 16:22

Ñuca mana ashtahuan cutina ñanta japishpa ringapacca asha huatacunallami tiyan.

JOB 30:23

Canca ñucataca huañuiman, tucui causaccuna huañushpa, rina llactaman apacushcatami yachani.

SALMOS 89:48

¿Pi runata mana huañushpa causacungalla? ¿Pitac Seolman rinamantaca quishpiringa?

ECLESIASTÉS 12:13

Cai tucui yachachishca uyashca quipaca, ña tucuchingapacca tucurina rimaicunatami nini. Diosta manchangui. Pai mandashcacunata pactachingui. Tucui caicunatami runacunaca ruhuana can.

1 CORINTIOS 16:13

Tucui shunguhuan crishpa, mana manchashpa, alli sinchiyashpa chaparacuichic.

EFESIOS 6:10

Chaimanta cunanca Apunchic Jesus-huan shuclla cashcamanta, pai imatapish ruhuaclla cashcahuan sinchi tucuichic.

DEUTERONOMIO 31:23

Mandac Dios Nunpac churi Josueta cachacushpaca: «¡Sinchicui, ama manchaichu! Canmi israelcunata ñaupashpa ñuca paicunaman cungapac ari nishca llactaman yaicungui. Ñucami canhuan casha» nirca.

1 TIMOTEO 4:12

Criccuna canta ricushpa allita causachunca, allita ruhuashpa, sumac shimicunata rimashpa, alli cuyac, alli cric, shinallatac ima mapa yuyaicuna illacmi cana cangui. Pacta cantaca “huambraracmi” nishpa rimanmancuna.

2 TIMOTEO 2:1

Ñuca huahua shina Timoteo, canca Jesucristohuan shuclla cashcamanta, Dios cuyashpa allicunata cushcahuan sinchi tucuiyari.

HEBREOS 9:27

Shinallatac tucuimi shuc cutinlla huañuna canchic. Chai quipami, Dios taripana punzhaca shamunga.

JOSUÉ 23:14

Riquichic, ñucaca cai pachapi tucui causaccuna rina ñanta japishpa, ña rinallami cani. Cancunata Mandac Diosca pai sumacta ruhuashpa ricuchisha nishcataca shucllatapish mana saquishpami tucuita pactachishca. Pai shina nishcataca tucui pactachishcamantami tucui shunguhuan, tucui almahuan pagui nina canguichic. Tucuitami cancunamanca pactachishca.