Kolosei 1:9 - God Vonana Vovokaravina

⁹ Tuna kubiine sisiyimi kavi yanei na nipowana kavi karei da mara nonowa kubiimi kaniponipowana. Ma God kurina kainowi da kanuma ina ku nevaneva nuwagiura ma akova kudubina ina veremi da ina kayowana konakova bubuni ma kona votekatekei.

Kolosei 1:9 ပူးပေါင်းရင်းမြစ်များ

Jon 7:17

Wawaya iyai ekayokayowei da God ina kayowana ina berai, tuna wawayina evi nuwanotanota da aku vibeyebeyena na God gwabinai epipisi bo taku mani aku kayowanai aisisiya.

Apasol 12:5

Ma Pita gabura kamonai kubiine na Keresiyana damsi nuwanuwasi kudubinai iniponipowana God kurina.

Rome 12:2

Ke kona berai da dobu yawasina manamina ina ravimi. Ma ami yawasa kudubina God ku imana koterei da nuwanuwami ma ami nota ina virai ma ini vunimi. Nakanani kona berai na God ina kayowana avai na damina kona viiya, ma konakovi da aviyavisina na biibiina ma kiimatanina da God ini nuwabiibiiyei.

1 Korint 1:5

Keriso tepanai na tami ami bera kudubina God ivi biibiini, ami sisiya ma akova yavata.

Epesas 5:10

Ma kovi paparana da aviyavisina Bada ekayokayowei ma inuwabiibiiyei na akovina kona viiya.

Epesas 5:17

Tuna kubiine ke kona bera wapawapa, kovi paparana da Bada ina kayowana akovina kona viiya da kona berai.

Epesas 6:6

Mara nonowa nakanani kona beraberai, ke matasiyai kava kona votekatekesi ma biga biibiina kona beraberai da ini gheghenimi. Ma bade mara nonowa nuwanuwami kudubinai God ina kayowana kona beraberai, iyamna tami na Keriso ina sleiv wawayimi.

Pilipai 1:4

Ma peyarimi kubiimi aniponipowana na mara nonowa nuwabiibiiyai aniponipowana,

Kolosei 1:6

Tuna God ina agabiibai akovina ivi debei kurimi ma patana da varana kamomiyai erakarakata ma amena etereterei. Ma ikikava itupuwa kurimi na nakanani dobu ku kudubina kamonai etuputupuwa.

Kolosei 3:16

Keriso Vonana tuna nakanani ma mura ghamana ma kovi vaghinei da nuwanuwami kamonai ina makai. Ma vonana kamonai nuwagiura kona viiya da koni beyebeyena turaturami kurisi ma kona terevimaninisi. Ma bade tavora ma agi vovokaravisi kona tavora God kurina da nuwanuwami kamonai koni kiikiiwei.

Kolosei 4:12

Ma Epapiras ikiikiiwemi, tuna ami wawaya sago, ma bade Yesu Keriso ina bigabiga. Ma tuna mara nonowa nipowana kamonai ipaparana kubiimi ma God kurina inowi da kona miirikikina ma nuwanuwami kudubinai Keriso koni tumaghanei ma God ina kayowana kudubina kona votekatekei.

Kolosei 4:5

Konuwagiura da ikikava koni matakira bubuna iyavo kava ke ita vivitumaghana kurisi. Ma taraboga imapatana kona viiviiya na ke koni rekwei.

1 Tesalonika 1:3

God ita Mamai matanai kanotanotimi, ikikava vitumaghana tepanai kobigabiga, ikikava nuwaviina tepanai kobagibagi bubuna, ma bade ikikava Bada Yesu Keriso tepanai ami nota ivi rewapana kirakai da komiimiirikikina.

1 Tesalonika 5:17

Ma bade mara nonowa konipowana.

2 Tesalonika 1:11

Tuna kubiine mara nonowa kaniponipowana kubiimi da God ina berai da ami yawasa na maninina ku matana, iyamna ikwatumi da yawasa maninina kamonai kota makai. Ma kainowi God kurina da ina rewapana ini vitemi da avi berasi biibiisi kona notai na kona bera yavui, ma avi bigana ere vitumaghanimi kovi karei na koni koviya.

Pirimon 1:4

Mara nonowa aku nipowana kamonai na tam Pirimon anotanotim ma aku God aikiikiiwei,

Pirimon 1:6

Aniponipowana kubiim da am vitumaghana ina rakata kirakai da vitumaghana damsi yavata ami vinuwasago ina rakata. Nakanani kuna berai na akovina kuna viiya da ikikava Keriso gwabinai vibiibiina ghamana tapanani.

Hibru 10:36

Bera ghamana da mara nonowa kona miirikikina da God ina kayowana kona votekatekei na ikikava ina vonakiiyapa bagibagina iterei na nakanani ina berai kubiimi,

Hibru 13:21

Yesu Keriso ina rewapanai ina vovunaghimi da ina kayowana kona bera bubuni ma ami yawasa kamonai ini vitemi da aviyavisina peyarina ina kitai na ini nuwabiibiiyei. Karako ma mara nonowa tavokavakavari ma tighegheni da kana kadara ina rakata. Amen.

Jemes 1:5

Ma tam iyai nuwagiura gwabimuwai kegha na kevi nowi God kurina da ina verem, iyamna God ina agabiibai irakata da iyavo kava ini nowi na kudubisi ina vere kirakiiyesi ma ke ina yeghisi.

Jemes 3:17

Ma nuwagiura kunumai inoru na tuna akovina na maninina kavakava. Ma tuna na ere nuwanubana, ere agabiibiina, ere vokuwayina, ma mara nonowa wawaya ikamyuyuwesi ma bera biibiisi eberaberai. Ke kwinana sago ina terepai ma sago ina tereoruwei. Ma ke vimiiriruwaruwa.

1 Pita 2:15

Ma tami na God ina kayowana da bera biibiisi kava kona berai. Wawaya neghaneghasi ikawapatemi ma ami yawasa maninina ina kitai na sisiya wapawapa ina voterei ma kawasi ina pota.

1 Pita 4:2

Ma ina yawasa dobuwai na ke tupuwa ina kayowana beroberosi ina kayokayowei, ma Bada ina kayowana kava ina beraberai.

1 Jon 2:17

Weni dobuna ma kana bera kudubina na ina wapa, ma meni wawayina God ina kayowana eberaberai na ina makii nonowa.

1 Jon 5:20

Bade takovi da God Natuna ipisi na akova ivereta da God vaghata akovina taviiya. Ma Natuna Yesu Keriso yavata tinuwasago, tuna kubiine God yavata tinuwasago. Tuna kava na God vaghata ma yawasa makamakii nonowina everevereta.