Genesis 1:1 - God Vonana Vovokaravina

¹ Karenai God bera kudubina kunumai ma dobuwai iyamoni.

Genesis 1:1 ပူးပေါင်းရင်းမြစ်များ

Matiu 11:25

Nani maranai Yesu ivona bo, “Mamai, tam dobu ma kunuma kana kiivavo ma aigheghenim iyamna akova vaghata kuteregavui da wawaya nuwanuwagiurisi ma giruma kirakiisi ke itakovi. Ma iyavo kava ke girugirumisi ma ke akakovisi, ti nakanani ma ededa yoghoyogho na ti kurisi vonavaghata kuvi debei da iakovi.

Mak 13:19

Nani marasiyai na nuwapoya ina rakata kirakai, ke mara karenai God dobu iyamoni da ku karako nakanani. Ma murinai nani nuwapoyisi ke meyani ina tupuwame.

Apasol 14:15

“Turaturakai, avi kubiine weni berana koberaberai? Tokai na ke god ma wawayota tami nakanani. God vaghata na yawayawana, tuna dobu ma kunuma ma yegai ma aviyavisina kudubina kamosiyai iyamoni. Kakayokayowei da God varana biibiina koni yanei ma koni tumaghanei da weni berasi viviberosi kona voterei. Iyamsi kegha!

Apasol 17:24

God na dobu ma bera kudubina kamonai iyamoni ma tuna dobu ma kunuma kana bada. Tuna kubiine wawaya taparoro numasi eyamoyamona na God vaghata ke nani numasi kamosiyai ita makamakai.

Apasol 4:24

Vitumaghana wawayisi ivi yanesi na i nota ivi sagoi ma nipowana God kurina ivi karei, “Bada Ghamam, kunuma ma dobu ma yegai ma bera kudubina kamosiyai tam kuyamoni.

Rome 11:36

Bera kudubina imanai itupuwa ma bera kudubina ima tepanai emakamakai ma bera kudubina rapenai. Tuna kubiine mara nonowa tighegheni ma tavokavakavari da kana kadara ina rakata. Amen.

1 Korint 8:6

ma tota kurita na God sago kava, tuna ita Mamai, dobu ma kunuma iyamoni ma iyamonita da tuna rapenai. Ma bade ita Bada Yesu Keriso sago kava, ma tuna tepanai bera kudubina itupuwa ma tuna tepanai da yawasa tapanani.

Epesas 3:9

God bera kudubina iyamoni ma ina nota irereghi ma namadani kava igavui da weni ku marana. Ma karako ivineku da nani notasi ati debei da wawaya kudubisi itakovi.

Hibru 1:10

Ma bade God, Natuna kurina ivona bo, “O Bada, mara karenai na Tam dobu kuyamoni, Tam imamuwai kunuma kuyamoni.

Hibru 1:2

Ma karako weni marasiyai God ivi sisiya na Natuna Yesu sisiyisi ivi damani kurita. Dobu karenai Natuna tepanai bera kudubina iyamoni, ma bade ivinei da kudubina ini rapenei ma ini badei.

Hibru 11:3

Ma ita vitumaghana kubiine na takovi da God gamonai na kunuma da dobu itupuwa. Tuna kubiine, karenai ke sago aviyavisina ita makamakai da wawaya matasiyai ita kitai ma kegha da nani kamonai aviyavisina karako takitakitai na God ivokiibuwei.

Hibru 3:4

Numa peyarina na wawaya evowavowa, ma kegha da God bera yavu kudubina iyamoni.

2 Pita 3:5

Weni nakanani isisiya iyamna ti damsi na iakovi ma iberai da nakanani ma ke itakovi da mara katamaninai God gamona iterei da kunuma ma dobu itupuwa, dobu okowiyai iyamoni da okowa kamonai ighetawei.

1 Jon 1:1

God dobu iyamoyamoni na namada wawaya sago imakamakai, tuna na God Vonana ma yawasa karena. Ma tokai gamona kavi yanei, matakiiyai kakitai ma kavotovotovoni,

Revelation 10:6

Ma ivona bo, “God tuna makamakii nonowina, kunuma ma dobu da yegai ma bade bera yavu kudubina kamosiyai iyamoni na tuna avanai vonavaghata avonavona da vikayovira ikovi.

Revelation 14:7

Ma ikiirara da gamona ghamana ma ivona bo, “God koyabumanei ma kana kadara kovi ghegheni, iyamna ina vitupavira marana inekiibau. Tuna kunuma ma dobu, yegai ma okowa da vusira kudubina iyamoni, tuna kubiine na kovokavakavari.”

Revelation 21:6

Ma bade ivoneku bo, “Avoyavui. Taku na Alfa ma Omega, bera karena ma bera damona. Ma iyai kaiyona ina rugavovori na yawasa vusirinai okowa ana verei da inuma ma ke ina gimari.

Revelation 22:13

Taku na Alfa ma Omega, taku na maghinona ma turina, bera karena ma bera damona.”

Revelation 3:14

“Vitumaghana wawayisi Laodisiya kamonai kii koyakoyagha aneyina kurina weni nakanani kegiruma. ‘Taku na Amen Wawayiku, iyamna bera kudubina akova yavui, aipatutu da vonavaghata kava aimamatarei. Ma bera kudubina God iyamoni na taku aibadei. Aku sisiya na weni.’

Revelation 4:11

“Tam ina kim kava akii Bada ma akii God. Kughe kirakai, tuna kubiine rewapana da kadara kavereverem, ma kavovokaravem, Iyamna bera kudubina na tam kuyamoni ma tam kava am kayowanai na yawasa kuveresi.”