Pahayag 15:4 - Paranan

⁴ Deya i awanid manteng dikomu, Panginoon? Deya i awanid mangpuri ten ngaran mu? Siko la en banal! Atanan a bansa ay umadeni sakay sumamba dikomu, gapu netan nen atanan en matuwid mu hidi a gamet.”

Pahayag 15:4 ပူးပေါင်းရင်းမြစ်များ

Roma 15:9

Sakay tánni en Hentil hidi ay magpuri bi ten Diyos gapu ten habag na. Kona ten nakasulat a, “Kaya puriyán taka ten atubengán nen Hentil hidi, en karangalan mu ay ikansiyon ku, en ngaran mu ay sambaán ku.”

1 Pedro 1:16

Gapu kinagi nen Kasulatan, “Banalák kaya magpakabanal kam bi.”

Pahayag 11:15

Nadid, dikona yopyopan dán nen kapittu a anghel en trumpeta na, ay tehud a mágkabegsák a boses a gubwat dilanget a nagkagi, “Nadid en pághari ti munduwiday ay neagton dán ten Panginoon tam, sakay ten pinili na. Sakay maghari siya a awan ti katapusan!”

Pahayag 14:7

Kinagi na ti mabegsák, “Magkahud kam ti ánteng ten Diyos, sakay parangalan moy siya! Gapu dinumemát dán en odas nen pághatul na. Sambaán moy en Diyos a nanglalang ten langet, luta, diget, sakay ten bukal hidi nen dinom!”

Pahayag 16:5

Sakay nasanig ku a kinagi nen anghel a nakabahala ten dinom hidi, “Makatarungan en hatul mu, siko a Banal, a biyag nadid sakay tenhud.

Pahayag 16:7

Sakay nasanig ku en boses a gubwat ten altar, a kinagi na, “Tarud, Panginoon a Diyos a Makapangyariyan ten atanan, talaga a matuwid sakay tama en hatul mu hidi!”

Pahayag 19:2

Matuwid sakay tama en pághatul na! Hinatulan na en raina nen kahalayan a mángpadukás ten tolay ti lutaiday ten pamamag-itan nen kahalayan na. Pinarusaan siya nen Diyos gapu ten pángbunu na ten tagapagserbi hidi nen Panginoon!”

Pahayag 19:8

nabaduwan dán siya ti malinis sakay tunay ti pudew a damit a lino.” En lino ay tanda nen mágkaganda hidi a gamet nen tolay hidi nen Diyos.

Pahayag 3:7

“Isulat mu ten anghel nen simbaan ti Filadelfia: “Iddi en kinagi nen banal sakay mapagkatiwalaan, siya en mangtáttawid ten susi ni David. Awan ti makapángsiradu ten binukasan na, sakay awan ti makapangbukas ten siniraduwan na.

Pahayag 4:8

Balang essa dikodi ay tehud a tággi-ánnám a pakpak; putat hidi ti mata ten atubengán ay ten adág di. Awan hidi umimang a mágkakansiyonán aldew ay ti gibi ti kona háddi: “Banal, banal, banal, en Panginoon a Diyos a makapangyariyan ten atanan. En Diyos ten nakalipas, en Diyos ten kasalukuyan, sakay en Diyos a dumemát.”

Pahayag 6:10

Pinumákraw hidi ti tunay ti begsák, “Panginoon a Makapangyariyan, banal sakay matapat! Dyan mu dán paalayán en pánghatul mu sakay págparusa ten tolay hidi a nangbunu dikomi.”