เยซู โตะ 3:11 - Prai Bible11 ไอ มี อิง เอิญ ก็ โตะ ดาย ซะ ตี แป กิว แก็นใจ เจือ เลาะ อุ แลว ก็ ครอ ระ แป เฮง แก็นใจ เจือ ติกๆ นทึห วัล ซะ ตี แป แอง เลาะ อุ แลว ก็ ครอ ระ แป เฮง แอง เลาะ ติกๆ วัล ครอ ระ แป เฮง แก็นใจ เจือ ซะ ตี แป เจือ อุ แลว ซัง แป กุญ รางวัน ตัก เอิญ แป ต็อง แก็นใจ เจือ ซัง ไอ มี ซีเอ ลู เอิด รางวัน คอง แป အခန်းကိုကြည့်ပါ။ |
เยซู โตะ 3:11
19 ပူးပေါင်းရင်းမြစ်များ
มานะ เน เอิญ ก็ เพา ฮับ รางวัน ตัก เอาซาง ฮัก รางวัน นัน ก็ เป็น มงกุด ตี เอาซาง อน ตัก ครำ จู ล็อง ตี แอง เลาะ แอง ซือ เคิบ นำ เยซู นำ เป็น งกี ตี ตัดซิน เลาะ ตัดซิน แคระ นอ บัดนะ ญาม นำ โตะ ตัก โลก เน วัล นำ ก็ อน รางวัน นัน ตัก เอิญ ลด นำ ไอ มี อน ตัก เอิญ มี ล็อง เดียว แต นำ อน ตัก แอ จู ล็อง ตี วาง เพา เยซู โตะ นัน
เลือง ตี เอิญ เคียน ระ อน ตัก นังซือ เล็ม เน ก็ บัก และ เกิด เล็ห แลว ดาย นะ ดาย แป ตี อาน นังซือ เล็ม เน อน ตัก คริซจัก ปัง แป ก็ กุญ อุ เลาะ อุ ซุก ดาย อัห ตี ปัง แป อาน นังซือ เน แลว อัห ลด แอง ฮุน นังซือ เน ไล อน อัห ก็ กุญ อุ เลาะ อุ ซุก เมือนนอย เพาะวา เลือง เน บัก และ เกิด เล็ห ซีเละ
ทาเน ญาม ปรอง แพะ นัง นัน กวา โละ มพอล เอิด ปึง พะเจายูฮัว นัน งกีจ็อง ก็ ไล ครำ ทัว โลก คือเน “แป ปัง นึง เลาะๆ เนอ ญาม เอิญ โตะ และ แป เอิญ ก็ ลอด โตะ ไอ มี ซีเอ กึด เค็ย เอิญ โตะ ญาม นัน เอิญ ลอด โตะ มอก ครำ จาง ลอด ครำ ตี ปัง นึง ปัง นาง อุ อัห ก็ เตียม คัว ออ ระ อน ระ มี คัว แซ็ด ระ ไอ มี กราญ มัด มอก อัหซอ ตี ไอ มี คัว แซ็ด ญาม เอิญ โตะ นัน” งกีจ็อง ไล คือนะ
เลือง อด ตุก อด ญาก ลำบาก ตี บัก และ เล็ห ตัก แป นัน ก็ อำ นเจิก เตาะ ปัง เลาะๆ ดาย ปรอง ซาตาน ก็ ระ แป แกด ล็อง ต็อง อุ ตัก ลุก ตี เย็ห เติล แป นัน ก็ เย็ห ซีรอก ลอง ใจ แป แป ก็ ต็อง ตุก ญาก ลำบาก อุ ซิบ งิ แต กัน อัห ดุ คมเฮง แป ซีเละ นัน ก็ ครอ ระ แป แอง เลาะ แอง ซือ เคิบ เอิญ จำปอ เปิล ดาย อำ แป พระ เอิญ เอิญ ก็ ระ แป รีด อุ จำ นเดย จำ กวา วัล ซีวิด แมะ นัน เป็น รางวัน คอง แป ฮัก
เอิญ ไล แป คือเน เอิญ เม็จ แป แลว แป เน อุ ตัก งวัล ตี ปรอง ซาตาน ควบคุม อัห ไล ดก นัน ดก ซะ ไอ เลาะ ตัก งวัล แป นัน แต แป ควะ รัก เอิญ แป ควะ แก็นใจ เจือ เอิญ แป ก็ ไอ มี นาย แอ็ม ใจ เตาะ กำนา นัน แป เม็จ อัห คมเฮง อันทิปา แป ก็ ควะ รัก เอิญ อุ ควะ แก็นใจ เจือ เอิญ อุ อันทิปา นัน นำ ฮาน ไล เลือง เอิญ นำ ไอ มี นาย แอ็ม ใจ เตาะ นำ ฮาน ไล เลือง เอิญ จำปอ อัห มเบิล แอ็ม นำ อัห มเบิล แอ็ม นำ ตัก งวัล แป นัน ฮัก ตัก มี ปรอง ควบคุม อุ นัน แป เม็จ อัห มเบิล อันทิปา นัน แป ก็ ไอ มี นาย แอ็ม ใจ เตาะ แป ควะ แก็นใจ เจือ เอิญ อุ
เจ็นเน ก็ ครอ ระ แป แก็นใจ เจือ เอิญ มอก แป ล็อน เจือ ตัก อิง นัน ตี แป ปัง ตี แป เจือ ตัก อิง นัน ก็ แคระ อุ แลว ครอ ระ แป เอิด ใจ แมะ ลด แก็นใจ เจือ เอิญ มอก ตัก อิง นัน กัน แป ไอ มี กิว เปียน ใจ ออ เจือ เอิญ มอก เครม วัล เอิญ ก็ โตะ ลงโทด แป ดาย เอิญ โตะ มอก ครำ จาง ลอด เอิญ โตะ ญาม นเดย แป ก็ ไอ มี เม็จจึด เตาะ
ตัก เปล ตี คุด ครึๆ นะ ก็ มี ตี คุด วัล ซาวซี ตี ตี คุด ซาวซี ตี นะ ก็ ครึ เมือนนอย ตี คุด ซาวซี ตี นัน ก็ เลอะ แกวด ตี คุด ครึ ตัก อุ เคิง ล็อง นัน ทาเน ตัก ตี คุด ซาวซี ตี นัน ก็ มี พูนำ ซาวซี ล็อง ปึง พูนำ ซาวซี ล็อง นะ แตง ตัว ยาง ครึ อัห เลอะ จึห โกบ พัห มด อัห ก็ เลอะ มี มงกุด ซุก ตัก กึ ออ มด จู ล็อง
ကြော်ငြာတွေ