มัดทิว 12:25 - Prai Bible

²⁵ อัห กึด จังนัก เยซู ก็ เม็จ มด ‍ นำ ก็ มเบิด โป อัห คือเน “ปะเทด นเดย ก็ ตึก ‍ กัน ครำ ปะเทด นัน ฮบ นอย ออ ฮัก ‍ ปะเทด นัน ก็ ต็อง ญุบ แอ็ม ‍ เมือง นเดย ครอบครัว นเดย ก็ ตึก ‍ กัน อัห ฮบ นอย วาง นอย ออ ฮัก ‍ เมือง นัน ครอบครัว นัน ก็ ต็อง ญุบ แอ็ม ‍

มัดทิว 12:25 ပူးပေါင်းရင်းမြစ်များ

มัดทิว 9:4

อัห กึด จังนัน เยซู ก็ เม็จ มด ‍ นำ ก็ ซ็วน อัห คือเน “เอ ‍ เป็น ตัก ซีวะ แป กึด ไอ มี เลาะ ฮุนนัน ‍ ไอ มี แคระ ดาย ‍

มาระโก 2:8

เยซู เม็จ อัห กึด ใน ใจ ออ คือนัน ‍ นำ ก็ ไล อัห ฮุนเน “เป็น ตัก ซีวะ แป กึด ใน ใจ ออ คือนัน บ็อห ‍

ยอน 21:17

เจ็นนัน เยซู ก็ ลบ ซ็วน เปโตร วัล ‍ เป็น แพะ ลบ ตึง เน ‍ “ซีโมน ควัน ยอน เฮย ‍ มัห รัก เอิญ ซีเละ อัน” เยซู อัง ‍ เปโตร ก็ เซียใจ ซีเละ ‍ ตี เยซู มบก ซ็วน นำ มอก นัน ตึง แพะ ลบ ‍ นำ ก็ ไล เยซู ฮุนเน “งกีจ็อง เฮย ‍ มัห เม็จจึด จู มบลึ แลว ‍ เอิญ รัก มัห ‍ มัห ก็ เม็จ มด แลว” เปโตร อัง ทาเน เยซู ก็ ไล เปโตร คือเน วัล “ครอ ระ มัห เลียง ดอม แกะ เอิญ เลาะๆ ดาย ‍

1 โคริน 2:11

ครอ ยก ตัวยาง ตัก ครำ แอ เน ‍ แอ ก็ มี ซีมาล ออ นอ ‍ ซีมาล แอ นัน ก็ เม็จจึด แอ กึด ซีวะ อุ ใน ใจ ออ ‍ อัหซอ ไอ มี เม็จจึด เตาะ ‍ กำกึด เอาซาง ก็ มอก นัน ‍ ไอ มี ซีเอ เม็จจึด เค็ย เอาซาง กึด ซีวะ อุ ใน ใจ ออ ฮัก ‍ มี แต ซีมาล เอาซาง ฮัก ซัง เม็จ ‍

กาลาเทีย 5:15

แป รัก นอย นัน ก็ เลาะ ซีเละ ดาย ‍ แต กัน แป พ็อก นอย ‍ ป็อง เซ็จ นอย มอก ซัด นโจ นัน ‍ แป ก็ ต็อง ระวัง ซีเละ ดาย ‍ กัน แป แอง ไอ มี เลาะ เคิบ นอย ติกๆ ‍ แป ก็ เลอะ เซีย แอ็ม มด ก็ มี ดาย ‍ แป ต็อง ระวัง ซีเละ

ฮีบรู 4:13

เอาซาง เม็จ ซะ ทัว มด จู ตี จู ทาน ดาย ‍ แอ งเกริม ซีวะ ระ เอาซาง ไอ มี เม็จ ก็ ไอ มี กุญ เตาะ ‍ ซะ จู มบลึ ตี นำ แอง แลว ‍ นำ ก็ ดอม เม็จ มด ‍ แอ แอง ซีวะ ‍ แอ กึด ซีวะ ‍ เอาซาง ก็ เม็จ มด ‍ แอ ก็ ต็อง ไล นัง ออ ตัก นำ มด จู ล็อง ดาย

เยซู โตะ 16:19

ญาม แพนซิก แร็ง นโจ็ห นัน ‍ จูเมืองๆ ทัว โลก ก็ เลอะ เกลิน แอ็ม มด ‍ เมือง บาบิโลน ก็ ซำ ฮาย ‍ เมือง บาบิโลน แตก ซิก เป็น แพะ ตี ‍ แพะ ตี นัน แยก นอย อุ มี เคด มี ตี ‍ เอาซาง แร็ง อ็อด อัง ครำ เมือง บาบิโลน นัน ซีเละ ‍ นำ ตอบติก อัห ‍ นำ ลงโทด อัห มด ‍ นำ ไอ มี เลอ ลงโทด ซิห เมือง บาบิโลน เมือง จ็อง นัน เตาะ ‍

เยซู โตะ 2:23

ลูกนอง นำ เอิญ ก็ มเบิล แอ็ม มด ‍ ตี เอิญ มเบิล แอ็ม ลูกนอง นำ นัน ‍ ก็ เพือ ระ คริซจัก มด จู ตี เม็จจึด เค็ย ‍ เอิญ เม็จจึด ใจ ครำ ‍ เอิญ เม็จจึด กำกึด ครำ มด ‍ ซีเอ แอง เลาะ แอง ราย จังนัก ‍ เอิญ ก็ ตอบติก อัห จังนัน ‍