ยอน 10:28 - Prai Bible28 เอิญ ก็ ระ ปึง แกะ นัน รีด อุ ตลอด จำ นเดย จำ กวา ไอ มี เปิล เตาะ ไอ มี ซีเอ ลู เอิด แกะ นัน ตัก เอิญ กุญ เตาะ အခန်းကိုကြည့်ပါ။ |
เอิญ ไล แป นังเลาะ นะ ดาย อำ แป ปาย โละ และ ซะ ป็อง ตัก ไอ มี กุม อิง เตาะ แป ต็อง โละ และ ซะ ป็อง ตัก กุม อิงๆ ฮัก ซัง เลาะ ซะ ป็อง ตัก กุม อิง นัน ก็ ซีแล็ม เค็ย ซีวิด รีด อุ จำ นเดย จำ กวา เอิญ เน ตี เอาซาง ระ เกิด เป็น ครำ เอิญ มี ซิด มี อำนาด ระ แป รีด อุ จำ นเดย จำ กวา กุญ ตี เอิญ แอง ซะ ป็อง ระ แป กุญ ป็อง อิม งิ เซ็น ก็ เป็น เอาซาง รับรอง เค็ย เอิญ เน เป็น ครำ จวย ระ แป รีด อุ จำ นเดย จำ กวา นัน” เยซู อัง
เยซู เน นำ แอง เลาะ ซิห แอ ซีเละ ซะ เลาะ ตัก เยซู แอง นัน เน็ด กวา ซะ ไอ มี เลาะ ตัก อาดาม แอง วาล อาดาม แอง ลุห มี ล็อง เดียว แอ ก็ เลอะ เปิล มด ปึง นังเลาะ แต เยซู คริด มี ล็อง เดียว โตะ แก แอ็ม ปันฮา นัน ระ แอ ปน แอ็ม เจ็น ลุห ลด ปน แอ็ม เจ็น เปิล ลด กุญ รีด อุ เลาะ เคิบ เอาซาง วัล แอ กุญ เลาะ ไบ เลาะ เบอ ก็ ญอน เยซู มี ล็อง เดียว นัน ฮัก ตี แอง เลาะ ซิห แอ
แพนกาน คอง เอาซาง นำ ซีรอก แอง ระ แอ เป็น เมือน ควัน ออ ฮัก เอาซาง เม็จ วาล แลว นำ และ เอิด ซีเอ เป็น ควัน ออ นำ ก็ เม็จ มด แลว นำ ก็ ลด มพอล เอิด แอ นำ เอิด แอ แลว นำ ก็ ลด ตัดซิน เค็ย แอ เป็น ครำ เลาะ ครำ ซือ แลว นำ เค็ย แอ เป็น ครำ เลาะ ครำ ซือ แลว นำ ก็ อน เกียด ตัก แอ แพนกาน เอาซาง นำ ระ เยซู เป็น นไจ เกา คอง แอ นำ ระ เยซู มี ควน ดกๆ วัล
ควน นไจ เฮย งกีจ็อง รัก แป ซีเละ ดาย นำ เลือก เอิด แป เจ็น ที แรก ระ ปน แอ็ม เจ็น ลุห ญอน แป เจือ เลือง นังเลาะ ญอน ซีมาล เอาซาง ระ แป เป็น ครำ เลาะ คอง นำ ฮัก อิห ไล คาว เลาะ อน ตัก แป เอาซาง ก็ เอิด แญง เลาะ นัน มพอล แป เป็น ครำ คอง ออ แป เจือ แป ก็ ลด ฮับ เกียด เลิม เคิบ เยซู คริด งกีจ็อง คอง แอ ฮัก อิห มัน คอบคุน เอาซาง เลือง แป ก็ ซมควน แลว นอ
เอาซาง ระ เอิญ ไล คาว เลาะ คาว แลม เน แลว เอิญ ก็ ลด ญอม อด ตุก อด ญาก เพือ ไล อัห ติก เอิญ ต็อง อด โซะ ดก ซีเละ แต เอิญ ไอ มี กราญ เตาะ เอิญ ควะ แก็นใจ เค็ย เอาซาง ซือซัด อุ ตลอด เพาะวา เอิญ เม็จจึด เคิบ เอาซาง เลาะ เอิญ แก็นใจ เจือ เค็ย จู มบลึ ตี เอิญ ฟาก ระ อน ตัก เอาซาง นัน นำ ก็ รักซา ระ ปอดไพ จำปอ เล็ห งิ ตี นำ ตัดซิน นัน
ปึง ซะตรู คอง เยซู เน อัห เกย อุ เลิม เคิบ แอ เน นอ แต อัห ทอก แอ็ม เจ็น ปึง แอ แลว อัห ไอ มี กิว เป็น ปึง แอ เตาะ กัน อัห กิว เป็น ครำ ปึง แอ นังเลาะ นัน อัห ก็ ควะ อุ เคิบ แอ เตา มานะ เน แต อัห ทอก แอ็ม เจ็น ปึง แอ แลว แอ ก็ ลด เม็จจึด ซัด เค็ย อัห ไอ มี เกย เจือ เยซู เตาะ อัห ไอ มี เกย เป็น ครำ ปึง แอ เตาะ
ซุดทาย เน ก็ ครอ อวด ลือ เอาซาง ซีเละ มี เอาซาง มี ล็อง เดียว ตี จวย แอ ปน แอ็ม เจ็น ลุห กุญ นำ มี ล็อง เดียว ตี รักซา รักซม แอ กุญ บัดนะ นำ ก็ ซับ แอ โตะ ญ็อง อุ เคิบ มัด นำ ตัก ตี มี เกียด ดก นัน แอ ก็ ไอ มี ตี ติ ตี คอล เตาะ แอ ก็ เลาะใจ อุ ซีเละ ครอ ระ เยซู คริด งกีจ็อง คอง แอ จวย ระ ครำ แอ เน อน เกียด ตัก นำ อวด ลือ นำ ฮัก ครอ ระ ครำ แอ เน ญอม ฮับ เค็ย นำ มี เกียด อุ ตลอด มี แร็ง มี อำนาด อุ ตลอด ทุก ยุก ทุก ซะไม เจ็น ตัก อิง เตา มานะ เน จำ บัดนะ นโดน นำ ก็ มี แร็ง มี อำนาด อุ ตลอด จำ นเดย จำ กวา ซาทุ