“ครอ ระ แป เจิม นัง ออ เลาะๆ ดาย อำ จบ ดูทูก ครำ ตี ไอ มี ตัน แก็นใจ เจือ ครำ ตี ไอ มี ตัน แก็นใจ นัน อัห ก็ มอก ควัน แย็ด อัห ก็ มี เทวาดา เพา ดอม อัห อุ ตลอด ปึง เทวาดา นัน ก็ อุ เลิม เคิบ เอา เอิญ ตลอด กัน แป ดูทูก ครำ ตี ไอ มี ตัน แก็นใจ นัน เทวาดา นัน เม็จ อัห ลบ ไล อน ตัก เอา เอิญ วัล ก็ กุญ ลูกา 19:10
ฮีบรู 9:24 - Prai Bible24 เจ็นนัน เยซู คริด ไอ มี กุด ตัก ฮ็อง ซักซิด ตี ครำ แอ เน แอง ตี เป็น พาบ มาลือ นัน นำ กุด วิฮาน เอาซาง ตัก วาง นทึห ฮัก เป็น ตี อุ คอง เอาซาง ฮัก มานะ เน นำ อุ เลิม เคิบ เอาซาง นำ จ็อก เคิบ เอาซาง แตน ครำ แอ เน วัล အခန်းကိုကြည့်ပါ။ |
ฮีบรู 9:24
32 ပူးပေါင်းရင်းမြစ်များ
ตี แอ ไอ มี ซนใจ ซะ ตี แอ เม็จ เคิบ มัด นัน ก็ เพาะวา แอ เม็จจึด แลว เค็ย นัง แอ ตี อุ ตัก โลก เน ต็อง เซีย แอ็ม บัดนะ มเบิด ก็ มอก แอ อุ ตัก ตุบ ตุบ นัน ก็ ต็อง กรา แอ็ม ติกๆ แต บัดนะ เอาซาง ก็ ระ แอ มี นัง แมะ ตัก ซะวัน นทึห วัล ก็ มอก นำ อน เจิง เลาะ ตัก แอ นัน ไอ มี กรา แอ็ม เตาะ นัง แมะ นัน ไอ แมน ครำ แอ เน แอง เตาะ เป็น นัง แมะ ตี เอาซาง แอง ออ ฮัก นัง แมะ นัน กุม อิง ตลอด จำ นเดย จำ กวา นโดน
ควัน เอาซาง ก็ เมือน เคิบ เอาซาง มด จู มบลึ นำ ทาง เลาะลัห มี เกียด ดก เตา เคิบ เอาซาง นำ มี นิไซ แอง จู มบลึ มอก เอาซาง ฮัก กัน แอ เม็จจึด เคิบ ควัน เอาซาง แอ ก็ เม็จจึด เคิบ เอาซาง แลว แอ เม็จ ควัน นำ เป็น จังนัก แอ ก็ เม็จ เอาซาง เป็น จังนัน ควัน เอาซาง ก็ มี แร็ง คอง เอาซาง มด แญง จ็อก คอง นำ ก็ ปิด ซีเละ จู มบลึ ตัก โลก เน จู มบลึ ตัก วาง ทึห ควะ เลาะ อุ ก็ ญอน แญง จ็อก คอง ควัน เอาซาง ตี มี แร็ง มี อำนาด รักซา เย็ห ระ อน ก็อง เย็ห ระ อน ฮัก ควัน เอาซาง ล็อง เน แก แอ็ม ตี ลุห แอ ระ แอ เลาะ อุ เคิบ เอาซาง วัล แลว นำ แก แอ็ม ตี ลุห แอ แลว นำ ก็ คุด อุ ตัก ตี เลาะ ตี มี เกียด นำ คุด เพียห เลาะ คอง เอาซาง ตี แกะ ทีซุด ฮัก ควัน เอาซาง เน นำ แกะ กวา ปึง ลาม เอาซาง ซีเละ
ญาม แอ เล็ง อุ เน ก็ ครอ ระ แอ กึด เลือง เยซู ดาย เยซู เน นำ เป็น พูนำ เลาะ นำ เจือ เอาซาง วาล นำ ก็ ซับรวง แอ เจือ เลิม จำปอ เป็น เล็ห ครำ ซมบูน มอก นำ ฮัก นำ ญอม เปิล ตัก ลำ ซีโรด นัน นำ กึด เค็ย เซีย เกียด ตัก ลำ ซีโรด นัน ไอ มี เป็น เลือง ซำคัน ซีวะ เตาะ แต นำ กึด เลือง ตี นำ เลาะใจ อุ แทะ นัน วัล เจ็นนัน นำ ก็ คุด อุ ตัก เพียห เลาะ คอง เอาซาง ฮัก แอ ดอม ตัวยาง ตัก เยซู ก็ เลาะ
แต ครอ ระ แป กึด เลาะๆ ดาย ตัก อิง ซะไม โมเซด แอง พาเต็น ตัก ตี แลง นัน เอาซาง ก็ เพีย ไล นำ เลาะๆ คือเน “จู มบลึ ตี เอิญ ไล มัห ตัก ญวัง ทึห นัน มัห ต็อง แอง จู มบลึ มอก เอิญ ไล มัห นัน ดาย” เอาซาง ไล โมเซด ฮุนนัน นอ อิซราเอล ญาย 25:40 โมเซด ต็อง แอง พาเต็น ตัก โลก เน มอก เอาซาง ไล อน มด เพาะวา เอาซาง ซีรอก ระ พาเต็น ตัก โลก เน เป็น พาบ วิฮาน เอาซาง ตัก วาง ทึห พาเต็น ตี โมเซด แอง ตัก โลก เน ก็ จวย ระ แอ เม็จจึด ซะ ตี เยซู แอง ตัก วิฮาน ตัก วาง นทึห
ทาเน ก็ โตะ เทวาดา มี ล็อง วัล นำ ก็อง ซีลุง ทองคำ โตะ เป็น ซีลุง ซิห งอง โอด ตี อัห ม็อด เคิม ยา ซียุม นำ ก็อง ซีลุง โตะ ญ็อง อุ เคิง ตี ทวาย ซะ นัน ตี ทวาย ซะ นะ ก็ เลอะ เป็น ทองคำ มด อี อุ ลัห มัด ตี คุด ครึ นัน แลว เทวาดา ก็อง ซีลุง โตะ ญ็อง อุ ตัก นัน แลว เจ็นนัน อัห ก็ อน ยา ซียุม ตัก เทวาดา ล็อง นะ ดก ซีเละ ระ นำ เคิม ทวาย อน ตัก เอาซาง เจ็นนัน เทวาดา ล็อง นัน ก็ เคิม นเทาะ ก็ ก็อห โตะ และ เอาซาง ตัก วาง นทึห ทาเน ก็ ดก ควะ ครำ เอาซาง อุ ตัก โลก แพนซิก นเซ็บ อัห ก็ ครอ วอน เอาซาง แญง ตี อัห ครอ วอน เอาซาง นัน ก็ ก็อห โตะ และ เอาซาง ตัก วาง ทึห แญง ตี อัห ครอ วอน เอาซาง เคิบ นเทาะ ยา ซียุม ตี เทวาดา เคิม นัน ก็ ซุน นอย เลิม ตึง นเทาะ ตึง แญง ตี อัห ครอ วอน นัน ก็ ก็อห โตะ และ เอาซาง ตัก วาง นทึห นัน เลิม นอย
ကြော်ငြာတွေ