22 ลูกนอง อัห ก็ เริล แต อัห ไอ มี เม็จ ปึง ตัวแทน อุ ตัก ลุก ซัง อัห ก็ ลบ วัล โตะ ไล ปึง ซะพา นัน คือเน
ทาเน เปโตร ก็ เคริบ แทะ ลอล อัห เริล นำ พก ดอม เยซู เยอะ ซะ แดๆ นำ เคริบ แทะ ลอล อัห เริล พด เล็ห เด็นเตะ เจิง มอ เอาซาง จ็อง นัน นำ กุด ปะตู งเกริก เล็ห ตัก เด็นเตะ เจิง คายาฟัด นัน นำ ก็ คุด อุ เลิม เคิบ ครำ เพา ญาม นัน นำ ซีรอก เม็จจึด อัห แอง ซีวะ ซิห เยซู งวะ นัน
ทาเน ปัห ซะ ตัก งกร็อห ปึง ทฮาน ก็ ไอ มี เม็จ เปโตร ตัก ลุก อัห ก็ ญ็อก ซีดุง ตับ ซีดุง แซ็ง มด อัห ไอ มี เม็จจึด เค็ย เปโตร งาล เริล พานเดย พากวา
“อิห เม็จ ปะตู ลุก เติล อุ แก็น ครำ เพา ปะตู ก็ ญ็อง อุ ตัก ปะตู นัน แต ญาม อิห พลาง ปะตู ดอม อ็อญ ก็ ไอ มี เม็จ ควะ อีเอ อุ ควังใน ลุก นัน เตาะ” ลูกนอง นัน อัง
เจ็นนัน ฮัวนา ทฮาน ตัก รักซา วิฮาน เคิบ ปึง ทฮาน คอง นำ อัห ก็ เริล มพอล ปึง ตัวแทน เยซู โตะ ตัก ตี พซุม วัล อัห จ็อก เลาะๆ ซิห ปึง ตัวแทน เยซู นัน เพาะวา อัห นเจิก อัง ปึง พซาซน เอิด เกียง กวาง ออ อัห ก็ ลด ไอ มี ฮาน แอง ซีวะ ซิห ปึง ตัวแทน เยซู นัน เตาะ