1 โคริน 6:13 - Prai Bible13 แกด ล็อง อัห มเบิด เค็ย “เอาซาง แอง ซะ ป็อง ซำรับ แอ ซิห ตัก มพุล นำ แอง มพุล ซำรับ ซิห ซะ ป็อง” อัห อัง ตี อัห เค็ย จังเน ก็ เพาะวา อัห ซีรอก แอง ตาม ใจ ออ ตี อัห เค็ย นะ ก็ แคระ แลว แต ครอ ระ แอ กึด เลาะๆ ดาย มพุล เคิบ ซะ ป็อง ก็ ไอ มี กุม อิง ซัง บัดนะ งกีจ็อง ก็ แอง ระ ซะ ป็อง เคิบ มพุล คุจ แอ็ม มด แต นัง แอ เน เอาซาง แอง ระ แอ ฮับไจ นำ ฮัก นำ เป็น งกี นำ ก็ ควบคุม นัง แอ วัล ไอ แมน นำ แอง นัง แอ ระ ปิล จู ปิล วะ เตาะ အခန်းကိုကြည့်ပါ။ |
เอิญ ไล แป นังเลาะ นะ ดาย อำ แป ปาย โละ และ ซะ ป็อง ตัก ไอ มี กุม อิง เตาะ แป ต็อง โละ และ ซะ ป็อง ตัก กุม อิงๆ ฮัก ซัง เลาะ ซะ ป็อง ตัก กุม อิง นัน ก็ ซีแล็ม เค็ย ซีวิด รีด อุ จำ นเดย จำ กวา เอิญ เน ตี เอาซาง ระ เกิด เป็น ครำ เอิญ มี ซิด มี อำนาด ระ แป รีด อุ จำ นเดย จำ กวา กุญ ตี เอิญ แอง ซะ ป็อง ระ แป กุญ ป็อง อิม งิ เซ็น ก็ เป็น เอาซาง รับรอง เค็ย เอิญ เน เป็น ครำ จวย ระ แป รีด อุ จำ นเดย จำ กวา นัน” เยซู อัง
นะ ดาย ควน นไจ เฮย แอ เม็จ เอาซาง รัก แอ ตึ อัง แอ ดก มอก นัน แลว นอ เอิญ ก็ ลด ครอ เคิบ แป ดาย ครอ ระ แป กิว มอบ นัง ออ ทวาย อน ตัก เอาซาง เป็น คอง นำ ฮัก ทวาย นัง ออ มอก อัห ทวาย แกะ ตัก อิง นัน แต เป็น เคือง ทวาย ตี ควะ รีด อุ เป็น เคือง ทวาย เลาะ แลม ตี เอาซาง ปอใจ อัง แอ ทวาย นัง ออ จังเน ก็ แคระ ซีเละ ดาย
ควน นไจ เฮย ซีวิด แอ เน ก็ มอก เน ดาย กำนา ก็ มอก แอ แตงงาน เคิบ กด โมเซด แต มานะ เน แอ เปิล เลิม เทิ๊บ เลิม เคิบ เยซู คริด แลว มอก แอ เปิล พระ กด นัน แลว แอ ก็ เป็น ครำ อิซระ แลว มอก แอ กุญ คล็อง แมะ ตัก เยซู ตี รีด เล็ห นัน ตี เยซู เอิด แอ นัน ก็ เพือ ระ แอ เป็น ปะโยด อน ตัก เอาซาง วัล
แป ก็ เม็จ แลว นอ แอ จู ล็อง ก็ เป็น ที เป็น ลา เป็น มัด เป็น มุห คอง นัง เยซู คริด แลว ไอ มี เลาะ แอ เอิด นัง เยซู คริด เริล ปิล อัหเม ตี เท็จ นัง วัล แป ก็ เม็จ แลว นอ กัน แอ ปิล จู เคิบ อัหเม ตี เท็จ นัง นัน แอ ก็ เป็น มอก มี นัง เดียว เลิม เคิบ อัหเม นัน มอก แญง เอาซาง ไล อน เลือง อาดาม เคิบ เอวา คือเน “ปาม ก็ เป็น มี นัง เดียว เลิม นัน” แญง เอาซาง อัง เกาตีนา 2:24
แอ ก็ เม็จ แลว นอ นัง คอง แอ จู ล็อง ก็ เป็น วิฮาน เป็น ตี อุ คอง ซีมาล เอาซาง เอาซาง ระ ซีมาล ออ โตะ อุ ตัก นัง แอ แลว เอาซาง ทน เอิด แอ แลว นำ ทน เอิด แอ แปง ญิม ซีเละ นัง คอง แอ ก็ ไอ แมน เป็น คอง แอ วัล เตาะ นัง แอ เป็น คอง เอาซาง ฮัก เจ็นเน ก็ ครอ ระ แอ อำ ปิล จู อำ ทำลาย วิฮาน เอาซาง เตาะ ดาย ครอ ระ แอ มอบ นัง ออ อน ตัก เอาซาง อน เกียด ตัก นำ ฮัก ซัง เลาะ