1 Reis 3:7 - BIBLIA - traduson antigu in Krioulo

⁷ SIÑOR ña Deus, ami bu servu, bu pun pa N rena na lugar di ña pape Davi, ma N sedu mininu inda, N ka sibi fasi e tarbaju.

1 Reis 3:7 ပူးပေါင်းရင်းမြစ်များ

2 Samuel 5:2

Mesmu na ki tempu ku Saul seduba inda no rei, i abo ku ta baiba dianti di tropas di Israel. Tambi SIÑOR falau kuma bu na sedu gia di si pobu Israel; bu na sedu se rei.”

1 Kronikas 22:5

Davi ta falaba: “Kasa ku ten ku kumpudu pa SIÑOR i dibi di sedu garandi, spesial, pa i ten fama tok jinti di tudu nasons na ngaba si bonitasku. Ña fiju Salomon i muitu nobu, i ka ten inda spiriensia; i ami propi ku na purpara material.” Asin Davi purpara manga di kusa antis di muri.

1 Kronikas 22:9

Bu na padi un fiju ku na sedu omi di diskansu, pabia ami N na dal diskansu di tudu si inimigus na si roda. Si nomi na sedu Salomon; N na da pas ku diskansu pa Israel na dias di si renansa.

1 Kronikas 29:1

Rei Davi fala tudu juntamentu: “Ña fiju Salomon i kil ku Deus kuji, ma i nobu inda, i ka ten spiriensia. E tarbaju i garandi, pabia i ka palasiu pa omi, ma i templu pa SIÑOR Deus.

Salmus 121:8

SIÑOR na guarda bu entrada ku saida, disna di gosi pa sempri.

Ditus 18:12

Omi ku ta yalsa si kabesa i na bin kai; kamiñu pa rispitu i pa sedu umildi.

Eklesiastis 10:16

Ai di ki tera ku tene mininu suma rei, ku si ŝefis ta mansi pa festa.

Jeremias 1:6

N falal: “A SIÑOR Deus! Ami N ka sibi papia, pabia N sedu mininu inda.”

Jeremias 1:7

SIÑOR falan: “Ka bu fala abo i mininu. Bu na bai pa tudu jinti ku N mandau; tudu ku N mandau fala, el ku bu na fala.

Daniel 2:21

I el ku ta kontrola mudansa di tempu ku oras, i ta pui reis, i tira elis. I ta da jiresa pa jirus ku kuñisimentu pa ntindidus.

Daniel 4:25

Bu na serkadu na metadi di jinti, bu na mora juntu ku limarias na matu, bu na kume paja suma baka; serenu di seu na kai riba di bo. Seti tempu na pasa riba di bo tok bu rikuñisi kuma Deus ku sta riba di tudu i ta manda riba di renus di mundu, i ta dal pa kin ki misti.

Daniel 4:32

Bu na serkadu na metadi di jinti, bu na mora juntu ku limarias di matu, bu na kume paja suma baka. Seti tempu na pasa riba di bo, tok bu ntindi kuma, i Deus ku sta riba di tudu ku ta manda riba di renus di mundu, i ta da elis pa kin ki misti.”

Daniel 5:18

Ñu Rei, Deus ku sta riba di tudu i da bu pape Nabukodonosor un renu, ku garandesa, gloria ku rikesa.

Daniel 5:21

I serkadu na metadi di jinti, si pensamentu bida suma di limaria; i moraba juntu ku burus di montis; i ta kume paja suma baka; serenu di seu ta mojalba, tok i bin ntindi kuma, i Deus ku sta riba di tudu ku ta manda riba di renus di mundu, i ta pui riba delis kin ki misti.

Numerus 27:17

ku ta leba elis fora, i tisi elis pa dentru, i yanda sempri se dianti, pa pobu di SIÑOR ka sedu suma karnel ku ka tene bakiadur.”

Bon Noba di Jesus Kristu ku Jon 10:9

Ami i porta; kin ku yentra na mi i na salba, i na parsi suma karnel ku na yentra, i na sai, i na oja paja pa kume.

Ripitison di Lei 31:2

i fala elis: “Gosi N sta ku idadi di sentu i vinti anu; N ka pudi ja mas gia bos. Fora di kila, SIÑOR falan ja kuma N ka pudi kamba Jordon.

1 Samuel 18:16

Tudu Israel ku Judá gostaba di Davi, pabia i ta baiba sempri dianti di tropas.