1 Jon 3:7 - BIBLIA - traduson antigu in Krioulo

⁷ Ña fijus, ka bo disa ningin ngana bos. Kil ku ta fasi kusas diritu, ki algin i justu, suma ku Kristu i justu.

1 Jon 3:7 ပူးပေါင်းရင်းမြစ်များ

Salmus 106:3

Sortiadu i kilis ku ta manti se retidon, ku sempri ta fasi kil ki diritu.

Salmus 45:7

Bu ama kil ki bon; bu odia kil ki mau. E ku manda Deus, ku sedu bu Deus, i unjiu ku azeiti di kontentamentu; i dau lugar riba di bu kumpañeris.

Mateus 5:20

N na konta bos, di nin un manera bo ka na yentra na renu di seu si bo ka yanda diritu mas di ki fariseus ku pursoris di lei.

Lukas 1:75

pa no sedu puru i justu si dianti tudu dias di no vida.

Atus 10:35

ma i ta seta tudu, di kualker rasa, ku rispital, ku ta fasi kil ki justu.

Romanus 2:13

I ka son obi lei ku ta pui algin justu dianti di Deus, ma kilis ku ta fasi kil ku lei manda, elis ku ta ojadu justu.

1 Koríntius 6:9

O bo ka sibi kuma kilis ku ta fasi mal ka na ten parti na renu di Deus?

Efésius 5:6

Ka bo disa ningin ngana bos ku palabra bakatela; i pabia de kusas propi ku raiba di Deus na bin riba di kilis ku ka ta obdisi.

Efésius 5:9

Nunde ku lus sta, tudu bondadi ta nasi, ku kusa justu, ku bardadi.

Filipensis 1:11

Ku puder ku Jesus Kristu ta pui dentru di bos, bo ta mostra ki bon manera di sedu ku ta pui jinti glorifika Deus, pa e ngabal.

Ebreus 1:8

Ma i fala di Fiju: “O Deus, bu tronu na kontinua pa sempri; Na bu renansa bu ta guberna ku justisa.

Ebreus 7:2

Abraon dal desimu parti di tudu ki tisi. Si nomi mostra purmeru kuma i rei justu. Dipus tambi i rei di Salen, ku sedu rei di pas.

Tiagu 1:22

Ka bo sedu son obiduris di palabra. Si i asin, bo na ngana bo kabesa. Bo sedu fasiduris di kil ku palabra fala.

Tiagu 2:19

Bu fia kuma Deus i un son. Bu fasi ben. Dimonius tambi fia, tok e ta tirmi!

1 Pedru 2:24

El propi i leba no pekadu na si kurpu na krus, pa no pudi sta suma mortu na ladu di pekadu, no yanda diritu suma ku Deus misti. Bo kuradu pabia di si molostus.

1 Jon 2:1

Ña fijus, N na skirbi bos e kusas pa ka bo peka, ma si algin fasi un pekadu, no tene un algin justu, ku sedu Jesus Kristu, ku ta difindi pa nos dianti di no Pape.

1 Jon 2:26

N skirbi bos e kusa aserka di kilis ku misti ngana bos.

1 Jon 2:29

Si bo sibi kuma el i justu, bo sibi kuma tudu kin ku ta fasi kusa diritu i si fiju.

1 Jon 3:18

Ña fijus, ka no ama son ku palabra di boka, ma no ama na bardadi ku kil ku no na fasi.

1 Jon 3:3

Tudu ku ten e speransa nel, i dibi di limpa si vida, suma ku el i limpu.

1 Jon 4:17

Amor i kompletadu na nos pa no pudi ten fiansa na dia di juisu, pabia suma ku Jesus sedu, asin ku no sedu tambi ne mundu.