Titus 3:3 - Patamuna New Testament Revised

³ Masapùla kùmyamlo nàlà wechippù pakko pe, mayin yawolon pe pùla, ennakan yapyoto pe we'nàppà'nokon màlà yà'làlà yau yauchin pe. Esseyaton pàk wema'nàppà'nokon màlà molopai kùlùmàlunàtok yau; tùulon kon kùyeya'nomatantàu molopai tok yeya'nomappù màlà.

Titus 3:3 ပူးပေါင်းရင်းမြစ်များ

Matthew 21:29

‘Utà pen sàlà,’ tukaik yeikuppù ya, tùse màlà tùpo tùusenumenkatok mùyakanmappù ya molopai iitàppù umà yak.

Luke 21:8

Jesus uya wateppù, “Enpen ettàk kon eyennaka kon kùsettak! Masapùla tukkan kon uyàpù màlà uyesek yau, ‘Iulàichi mùkkàlà Christ!’ molopai, ‘Pata weyu uyàssak uchi man!’ tei'ma. Tùse tok ya'là kùtàtàu.

John 8:34

Jesus uya tok pàk, “Ailon kulu sàlà, ànù'là tùwemakuimasen mùkkàlà makui yapyoto.

Romans 11:30

Amyamlo Jew yamùk pen, pena Katù Maimu yawàlà pùla ewechippù kon. Tùse sàlà pe Katù usentuppatok yanùnsak auya'nokon man, masapùla Jew yamùk wessak Katù Maimu yawàlà pùla pàk.

Romans 6:12

Eyesak kon tùumattasen pe nai'nùk yepulu pe àli kùsettak. Àli eyeselu kon wettok makui ànkupai maimu yawàlà ewechi kon pa àpun kon yepulu pe kùsettak.

Romans 6:17

Tùse tenki tepai'nokon Katù pàk, masapùla pena àli yapyoto pe ewechippù kon màlà, tùse sàlà pe ailon, yeposak lùppù enupantok, enepoloppù kon yau, maimu yawàlà ewechi kon tamù'nawàlà eyewan kon ke.

Romans 6:22

Tùse sàlà pe àmokkasak kon man àli pe we'nàtok winàpai. Molopai Katù yapyoto ton amyamlo, sàlà uya esuken wema'nàtok yak ayasak kon nai'nùk. Molopai iwenukapù pe tàwàlàlà wema'nàtok yepolo auya'nokon màlà itepeppù pe.

Romans 6:6

Masapùla sàlà ittu'nokon man, penalok àli ton kùyeselu kon tùlùppù inmattatoppe Christ pokonpe pulusuk po, àli eselu wannà meluntàlùkkatoppe, makui yapyoto pe we'nà'nokon tukaik.

2 Corinthians 12:20

Masapùla usenalipayaik miyalà uyàssak yau eyepolo kon uya yeselùkek iwechi pàk eyiche'nokon wettok kasa pùla. Molopai uyepolo auya'nokon uyiche ewettok kon kasa pùla. Usenalipayaik usàulàmantok, kùlùmà, molopai we'naikantok, amlek we'nàtok, àli pe uselupantok, molopai tùulon kon yekale pàk uselupantok, utapulàntok molopai utaimelunpantok yepolo uya àklottau'nokon yeselùkek iwechi pàk.

Galatians 6:3

Ànù'là uchittu ànù'là yentai, ànùk pe pùla echii'ma yau, tùyiwalà ichennaka màlà.

Colossians 1:21

Pena mei ewechippù kon màlà Katù winàpai. Molopai iteyaton pe ewechippù kon àli pe eusenumenkatok kon winà.

Colossians 3:7

Molopai màlà kasa tùwemassan pe ewechippù kon màlà àli ton ànkuppai we'nàtok wechi ewemattok kon yau yau.

2 Timothy 3:13

Àli ton kappon yamùk molopai tùusennakasan wena àli pe tùwettok kon yapai àli peiwa tùse, tùulon kon yennakai'ma tùulon kon uya tennkatok ke.

2 Timothy 3:6

Pùsamlo yekkwa ton mùkyamlo tùutàsan tapùi tak kappon wanmùla molopai attu'mùnon ulichan yamùk yentaikannan tok uya tùmaimu kon ke, tok makuyi nelemluku ton molopai yà'là walainon nà ànkuppai we'nàtok nalà ton.

Titus 1:16

Tok uya, “Katù ittunài Iulà,” te màlà; tùse tok welaikatok uya yenpoika pùla iwechi màlà. Akùlù ton mùkyamlo, molopai mayin yawolon kon pen, wakù ku'nàinan pe tok wechi pùla iwechi.

Titus 2:12

Màlà wakù pe we'nàtok màlà enupanài àli pe Katù winàkàik wema'nàtok nonkatoppe, molopai wolù yeselu ànkuppai we'nàtok nonkatoppe, molopai tùttuik tùwemassen pe, ikasa, wakù pe wema'nàtok Katù tùnamaik molopai tapulàik iwemattok pe sàlà non po,

James 1:26

Ànù'là àkklottau'nokon nai'nùk, “Katù ya'lon Iulà,” tawon, molopai tani yesappe tùwessen pen wechi màlà yà'làlà wakù pùla, molopai ichennaka Katù ya'lon pe iwechi wechi yà'la pe pùla.

1 Peter 1:14

Mule yamùk mayin yawolon kon kasa ettàk kon, molopai kennappotàu pena ewechippù kon yak ittu auya'nokon pùla ewechi kon yau ànkuppù kon lùppù yak.

Revelation 12:9

Eke ulupelu lùmà yenu'mappù màlà, mùkkàlà penalok àkài, Makui wapùla Settan itesek, tamù'nawolon kon kappon yamùk non pon kon yennakanàippù. Yenu'mappù màlà non pona tamù'nawàlà itinchelùyi yamùk pokonpe.

Revelation 13:14

Tamù'nawolon kon kappon yamùk non po tùwemassan yennakappù ya tensen yekkwa pen kuttok tùuya winà, tùlepatok ikuttoppe tùuya wapiyalok àsà ene yemloto po. Pùsàlà yakon àsà ene uya tamù'nawolon kon kappon yamùk non pon kon pàk yekamappù, wapiyalok àsà ene kasa ikonekatoppe tok uya, yapulà pe mùkkàlà iwàsak lùppù asa'lon yà kasupala ke tùse iwennasak lùppù.

Revelation 18:2

Iwentaimeppù eke pe, “Iwekkawai'masak man! Eke Babylon wekkawai'masak man! Imawali yamùk yùwùk molopai tamù'nawolon àli ton akkwalù yamùk patassek pe iwenasak man, molopai tamù'nawà ànùk yekkwa là àli ton molopai ewanma pe tùkussan tolon yamùk wemapù màlà yau.