Romans 2:8 - Patamuna New Testament Revised

⁸ Tùse mùkyamlo tùpàkù'nokon neken tùsenumenkasan molopai ailon nulunpannan àli kuttoppe tùuya'nokon pàk àsà pe Katù we'naika màlà.

Romans 2:8 ပူးပေါင်းရင်းမြစ်များ

Romans 1:18

Katù we'naikatok usenpoikasak man epùn winàpai. Iyàssak màlà tamù'nawolon àli ton molopai àli pe kappon yamùk wettok pona, mùkyamlo àli pe tùwettok kon yeselu ke ittutoppe pùla ailon wakkàssai'nannùk pona.

Romans 10:16

Tùse tamù'nawolon kon uya Wakù Itekale yanùnsak pùla iwechi màlà. Isaiah uya suwa teppù, “Uyepulu Katù, ànùk uya ken ailon tesak nai ina yekale pàk?” {Isa 53.1}

Romans 15:18

Màlàpàk yà'là yekkwa là pàk uselupaiche wechi pen sàlà. Màlà neken Christ nùkupùppù uyai pàk uselupa, Jew yamùk pen nepù uya Katù Maimu yawàlà tok wettoppe pàk, uselupappù lùpù pàkàlà molopai unkupùppù winà.

Romans 6:17

Tùse tenki tepai'nokon Katù pàk, masapùla pena àli yapyoto pe ewechippù kon màlà, tùse sàlà pe ailon, yeposak lùppù enupantok, enepoloppù kon yau, maimu yawàlà ewechi kon tamù'nawàlà eyewan kon ke.

Romans 9:22

Yattai pùla là Katù wechippù tùwe'naikatok molopai tùmeluntàlù enenpoikapai sàlà. Màlàyau mùkyamlo tùwe'naikatok ipàk ton pan kon pàlikappù ya, mùkyamlo tùntalumattà pan kon.

1 Corinthians 11:16

Anù'là wechi sàlà pàk e'naikapai yau, sàlà kasa neken màlà tamù'nawàlà Katù sochiyi yamùk tau màlà yamùk wekkupù, tùpatalon eselu woton pùla iwechi màlà.

2 Corinthians 12:20

Masapùla usenalipayaik miyalà uyàssak yau eyepolo kon uya yeselùkek iwechi pàk eyiche'nokon wettok kasa pùla. Molopai uyepolo auya'nokon uyiche ewettok kon kasa pùla. Usenalipayaik usàulàmantok, kùlùmà, molopai we'naikantok, amlek we'nàtok, àli pe uselupantok, molopai tùulon kon yekale pàk uselupantok, utapulàntok molopai utaimelunpantok yepolo uya àklottau'nokon yeselùkek iwechi pàk.

Galatians 5:20

ikonekasak katù yemloto po wepeimantok, molopai meluntà àli akkwalù winàpai yeposak yapulàtok, tùulon kon yewanma'làtok, wakù pe tonpa pokonpe we'nà pùla we'nàtok, kùlùmàppe we'nàtok, we'naikantok, molopai amleppe we'nàtok. Tùusàulàmaik we'nàtok, iwepantapàssak pe'ne,

Philippians 1:17

Tùulon kon Christ yekale pàk tùuselupasan, ailon pe wakù pe itewan pùla, amlek peiwa, enekamapai pùla lùiwa echii'ma, eke peiwa utaimelunpantok koneka tùuya'nokon kasa tùttuse patikichi tau wechi tùse.

Philippians 2:3

Amlek pe kettàu. Tùulon kon yentai wakù peiwa ewekkupùiche'nokon kettàu. Àssà'mùla ettàk kon, tùulon kon yentai tùuchittuik pùla.

Titus 3:9

Tùse pakko pe wesseippà'nàtok usàulàman pe winàpai mechiik, kaleta, penalok kon yesek wenai we'naikantok winàpai, wepanta'mantok Law pàkàlà winàpai. Sàlà yamùk màlà yà'là pen tapulàsen pen italumayippù.

Hebrews 10:27

Tùse talipanài kulu neken wà'nànnsak màlà, talumattàntok pàk molopai apok Katù yeyatonnon pottàtok woton pàk.

Hebrews 11:8

Ailon tetok winà Abraham wechippù màlà Katù Maimu yawàlà tùkà'masak ya yau, molopai iitàppù tùpata woton pe itùlù tùuya teppù Katù uya tùpàk yak. Tùpata nàmàppù ya i'nailà tùutà ittui'ma pùla.

Hebrews 5:9

Ikasa kulu Jesus wekonekasak pàk, mùkyamlo tùmaimu yawolon kon nà pùikattà ya màlà tàwàlàlà.

James 3:14

Tùse eyewan kon wechi kùlùmàppe àsà pe, molopai amleppe yau, katapulàtàu molopai ailon winàkàik kasei pe kettàu.

James 3:16

Masapùla kùlùmà molopai amleppe we'nàtok wechi molo yau, utaimelunpantok molopai tamù'nawolon àliton wechi nàlà màlà molo.

1 Peter 3:1

Màlà kasa làma ichi amyamlo ulichamichi, tùtayappù kenan kon atayappù kon yentai kettàu, ailon te tok uya pùla iwechi Katù Maimu pàk yau, ailon tetoppe tok uya wakù eyeselu kon pàkàlà, euselupa pàkàlà kulu pùla,

1 Peter 4:17

Masapùla Ittuntok yattai weyu uyàssak man, ittuntok wepyattàtoppe; molopai Katù ponalok kon mùkyamlo wapiya ittu woton kon. Kùpàkù'nokon iwepyattà yau, atta ken iwenukapù mùkyamlo Wakù Itekale Katù winàpaino pàk ailon tawonnan pen pàk?

Revelation 14:10

Mùkkàlà uya nàlà màlà Katù we'naikatok yeuku inchi. Meluntà kulu tùwe'naikatok kokù yak inmappù esukenan yà'là yekkwa là ke yoi'mappù pùn. Ewaik, mùkkàlà sàlà ku'nàippù talumattà màlà apok molopai kulupala kasa tùkà'nùnsen yau, wakù ton inchelù yamùk molopai Kalinilu Mule yemloto po,” teppù ya eke pe.

Revelation 16:19

Màlà Eke kulu pata wessala'moppù màlà àsolùwau, molopai kappon yamùk pata yamùk non pon yawolon kon mattanùpùppù màlà. Katù uya eke Babylon yenumenkappù, molopai wain inchitoppe ya ikupùppù ya tùkokù yapai, àsà pe tùwe'naikatok yeuku.