Romans 14:18 - Patamuna New Testament Revised

¹⁸ Màlàpàk ànù'là Christ ponaloppe tùwe'wotokomasen sàlà kasa uya Katù yauchinpa màlà molopai kappon uya wakù mùkkàlà te màlà ipàk.

Romans 14:18 ပူးပေါင်းရင်းမြစ်များ

Mark 13:34

Sàlà wechi màlà kàyik utà mei te'ma tawà kasa. Tùpata nàmà tùuya yau tùpoitolù ton nàmà ya màlà tùpata mainanpanài pe. Tùpoitolù ton lepa ya tok wotokoyi ke. Molopai manatta yesak pàk, ‘Enpen mechik,’ teppù ya.

John 12:26

Ànù'là iche wettok ku'nài uyàpù màlà uya'là, molopai i'nailà là wechi yau, molo nàlà upoitolù wechi màlà. Ukàipùnù uya mùkkàlà yapulà màlà,” tukaik.

Yeunossak kon Wotokoyi 10:35

Ànù'là inamanài molopai iwalai ku'nài wechi màlà inanùmù pe, i'nailà pailà iyàssak pe tùse.

Romans 12:11

E'wotokomatàk kon sa'man pe molopai emya'neppe kettàu. Itepulu Jesus ponaloppe e'wotokomatàk kon tùuweleutaik pùla tamù'nawàlà eyewan kon ke.

Romans 14:4

Ànùk ken àmàlà tùulon yapyoto talumattà pa? Itepotolù nen mùkkàlà wakù kù'nài pe tapyoto wechi wapùla wakù ku'nài pe pùla iwechi ittunài, Itepotolù mùkkàlà wakù pe ken naikko tawon imasapùla Itepotolù uya ikupù màlà wakù kuttoppe ya.

Romans 16:18

Masapùla mùkyamlo yekkwa ton wechi Katù poitolù pe pen màlà, tùse tesak kon wettok neken iche pàk tok usenumenka. Wakù pe tùuselupatok kon winà molopai ennakan pe uselupantok ke ittunnan pen yennakanàinan.

Romans 6:22

Tùse sàlà pe àmokkasak kon man àli pe we'nàtok winàpai. Molopai Katù yapyoto ton amyamlo, sàlà uya esuken wema'nàtok yak ayasak kon nai'nùk. Molopai iwenukapù pe tàwàlàlà wema'nàtok yepolo auya'nokon màlà itepeppù pe.

1 Corinthians 7:22

Masapùla tepotolù kenan, Itepulu uya tùkà'ma yattai mùkkàlà Itepulu nùmokkappù, màlà kasa làma itepotolù pùn tùkà'ma yattai wechi màlà Christ yapyoto pe.

2 Corinthians 4:2

Tamù'nawolon tonantau tùkussen molopai kuli'manài eselu yamùk ku'nàinan pen ina, ànù'la yennakannan pen, ailon pe Katù Maimu yenpoikannan. Tùse làkku Katù uya màlà ailon pe ina uselupa yene molopai kappon yamùk uya nàlà ailon pe ina wechi ittu.

2 Corinthians 5:11

Ina nùttuyan yà'là pe usenalipantok Katù pàk wechi, màlàpàk ina uya itekale yekama sàlà kappon yamùk pàk ailon te toppe tok uya. Katù mùkkàlà ina ittunài tamù'nawàlà, molopai enpen wessaik eyewan kon yau uyittu auya'nokon pàk nàlà.

2 Corinthians 5:9

Màlàpàk uchi kùnkupù kon kuppai'nokon kulu man yauchinpa pe, sàlà motawon kùpata kon yau wapùla epùn po là Itepulu pokonpe we'nà yau.

2 Corinthians 6:4

Tùse làkku tamù'nawolon ina nùkupù yau Katù yapyoto ton pe ina wechi yenpoikannan ina, talumattàntok yau, sa'man ton yau, molopai utaimelunpantok pàlikatok yau.

2 Corinthians 8:21

Masapùla wakù kupù tùuya'nokon iche ina man, Itepulu yenu yau neken pùla, tùse kappon yamùk yenu yau nàlà.

Philippians 4:18

Tamù'nawolon ulepatok auya'nokon yeposak uya man. Molopai iche wettok yentak kulu nettai. Molopai sàlà pe tamù'nawolon iche wettok yesappe wessaik, Epaphroditus uya tamù'nawàlà ulepatok nessak man upyak apyapai'nokon. Sàlà yamùk wechi màlà wakù appoi'nan tùtùsen kasa Katù pona, itùsak yau Katù nanùmù pe nai'nùk molopai yauchinpanài pe nai'nùk kasa.

Philippians 4:8

Wenukapù pe, utonpa yamùk, eusenumenkatok kon pe màlà yamùk: ailon pe nai'nannùk nechii molopai tapulàsen pe nai'nùk, ikasa nai'nùk, esuken nai'nùk, molùnpak nai'nùk, wakù pe kulu nai'nùk, molopai tapulàsan yeppe nai'nùk molopai tùnamasen pe nai'nùk.

Colossians 3:24

“Itepulu uya ken uye'ma ko wakù ke lù,” mùkatàik; tùponalok kon ponaloppe inkupù yepolo auya'nokon màlà. Masapùla Christ kulu mùkkàla eyepulu kon iponaloppe me'wotokomayatài'nùk.

1 Timothy 2:3

Sàlà màlà wakù molopai Katù Kùpùikattànài yauchinpa ya màlà,

1 Timothy 5:4

Tùse tùmunkà ke wapùla tùpayan ke iwechi yau, tàwà mùkyamlo nùmainanpai, sàlà kasa tùsan kon, molopai tùkàipùnù kon, tùtamo kon, tùnok kon uya tùmainanpappù kon yepeppu pe, masapùla sàlà uya Katù yauchinpa màlà.

1 Peter 2:12

Eyeselu kon wakù pe nechii Katù ittunnan pen kùlottau, àmottùnpa kon tok uya yau, àli kussan tok te tok uya yau, wakù eyeselu kon yentoppe tok uya, molopai nen uchi Katù yapulàtoppe tok uya iiyàpù Weyu yattai.

1 Peter 2:20

Masapùla yà'là yekkwa ken e'mantok molo nai wettalumattàntok iwalai pen ànkupùppù kon pàkàlà ànpàlika kon yau? Tùse wettalumattàntok pàlika auya'nokon yau wakù kussak lànen auya'nokon tùse yau, Katù uya wakù kupù màlà àponalok kon pe màlà pàkàlà.

1 Peter 2:5

Àitàk kon nulànan tàk kasa, molopai tapulàsan pe ettàk Katù yùwùk kappon namùppù pen tensen pen yamù yau, màlà motau wakù pe tùwe'wotokomasan pe ewechi kon pa, wakù ton Katù lepatok iche iwettok tùlù pàk Jesus Christ yai .

1 Peter 3:16

Tùse àsà'mùla àsà pe pùla mùkuttàik molopai namantok yesappe. Wakù pe, tùwanmùla eusenumenkatok kon ikuttàk kon, àmottùnpasak kon yau, mùkyamlo àli pe tùuselupasan wakù eyeselu kon Christ ya'lon kon yeselu walai pàk wekuli'matoppe tùuselupatok kon winà.