Romans 12:6 - Patamuna New Testament Revised

⁶ Katù uya lepansakù'nokon màlà tùpatalo'nan tapulàsan lepantok ke wakù pe tùwettok yawàlà. Kùlepatok kon wechi Katù Maimu yekamatok pe yau, ikuppai'nokon uchi màlà ailon tetok itesappe we'nà nai'nùk yawàlà.

Romans 12:6 ပူးပေါင်းရင်းမြစ်များ

Matthew 23:34

Màlàpàk uchi Katù Maimu yenpoikannan teunossaik, molopai pukkek ton, molopai enupannan. Tok tonpa yamùk wànà auya'nokon màlà, tùulon kon pukapàtù auya'nokon pulusuk pona. tùulon kon ippoppàtù auya'nokon màlà ewepilittok kon itak tau, molopai tok yenpe auya'nokon màlà pata yapai tùulon pata yamùk yawàlà'ne.

Matthew 25:22

Molopai apyoto, asa'là kolù pun ke ilepasak lùppù uyàpùppù màlà molopai ipàk, ‘Asa'là ulepappù auya, Uyepulu. Sàlà nàlàichi yenkà tùulon asa'là làma unepoloppù,’ teppù ya.

Luke 11:49

Sàlà wenai Katù uya ittutok tùuya yau, ‘Katù Maimu yenpoikannan yeunoko uya màlà molopai itekale yekamannan. Tok uya tok tonpa yamùk wànà màlà. Tok tonpassan talumattà tok uya màlà,’ tesak màlà.

Yeunossak kon Wotokoyi 13:1

Sochi tau Antioch po màlà Katù Maimu yenpoikannan molopai enupannan wechippù. Tok kùlottau Barnabas, Simeon Niger tukaik tesassen, Lucius Cyrene poino, Manaen, pata yesak Herod piyau ichemokkasak molopai Saul wechippù molo.

Yeunossak kon Wotokoyi 15:32

Judas molopai Silas mùkyamlo, Katù Maimu yenpoikannan tùmàlà'nokon pe uselupappù tachin pe ailon tawonnan pokonpe, tok lepa pe tok meluntàlù ke meluntà pe tok wettoppe.

Yeunossak kon Wotokoyi 2:17

‘Sàlà kupù uyaichi màlà pata weyu wenukappù yau. Wakù Akkwalù tùlù uya màlà tamù'nawolon kon kappon yamùk pona. Àmu kon molopai eyenchi kon uya Katù maimu yenpoikatok woton, eyimoinelù kon uya we'neppà'nà kasa yà'làlà yene màlà, molopai ayamokoli kon yamùk we'neppàtù màlà.

Yeunossak kon Wotokoyi 21:9

Asakùlà'nan kon itayappù pùnon itenchi ton wechippù màlà molo molopai pùsamlo wechippù Katù Maimu yenpoikannan pe.

Romans 1:11

Masapùla eyenpai'nokon kulu wessaik wakù Katù winàpaino pùlemantok ke elepatok kon pe uya Katù Yakkwalù yai meluntà pe ewena kon pa.

Romans 12:3

Masapùla Katù uya ulepatok wakù pàkànsau eyelupa kon uya sàlà. Ànù'là yentai ewechi kon pe kùsekamatàu. Tùse esenumenkatàk kon kulu molopai echittutàk kon esentàk ailon tetok auya'nokon Katù uya elepappù kon ike yawàlà.

1 Corinthians 12:18

Tùse Katù uya tùpatalà'ne tewinpàk esak pùkkù yamùk tùlùppù màlà iche tùwettok yawàlà.

1 Corinthians 13:2

Lepantok, Katù Maimu yenpoikanài yesappe wechi yau, tamù'nawolon pukkeppe we'nàtok yesappe molopai tùttusan pen yamùk là ittu uya, tamù'nawolon ailon tetok yesappe wechi, wùk yamùk yamatoppe uya, tùse uchi'nùnmantok pùla wechi yau, yà'làlà pùla wechi màlà.

1 Corinthians 14:1

Uchi'nùnmantok yeselu eyeselu kon pe nechii molopai Wakù Akkwalù winàpaino lepantok iche kulu ettàk kon, Katù Maimu yenpoikatok ike ke lepantok kulu làkku.

1 Corinthians 14:24

Tùse Katù Maimu yenpoika tamù'nawolon kon uya kùlottak ailon tawon pen wapùla ittunài pen wewonsak yau, tok uya àli kuttok ya yenpoika màlà molopai tamù'nawolon ineta winà màlà ittu.

1 Corinthians 14:29

Asa'lon kon wapùla àsolùwawon kon Katù Maimu yenpoikannan tàwà nùselupai, tùulon kon uya ichelupatok yau iwalai wechi ittu tùse.

1 Corinthians 3:5

Ànùk ken uchi mùkkàlà Apollos? Molopai ànùk ken mùkkàlà Paul? Katù yapyoto ton neken nen mùkyamlo, ene'nàippù kon iwinàkàik ailon te kon pa. Itepulu nùtùlùssan mùkyamlo iponalà iwotokoyi.

1 Corinthians 7:7

Tamù'nawàlà lànen kàyik yamùk wechi ukasa iche wessaik. Tùse iponalà'ne kappon yamùk lepatok wechi màlà Katù winàpaino, tewinan lepatok sà yekkwa, molopai tùulon mà yekkwa.

2 Corinthians 8:12

Masapùla e'lepapai kulu ewechi kon yau, Katù uya lepantok auya'nokon yanùmù màlà àntùlù itesappe ewettok kon yawà, itesappe pùla là ewettok pen.

Ephesians 3:5

Pena kappon yamùk pàk sàlà tùttusen pen yekamappù pen màlà, tùse Katù uya yenpoikasak man sàlà pe Wakù Akkwalù winà wakù ton esukenan kon tùneunokossan molopai tùmaimu yenpoikannannùssan pàk.

Ephesians 4:11

Mùkkàlà ichi mùkkàlà “kappon yamùk lepanàippù lepantok yamùk ke” tùulon kon kappon yamùk yanùmùppù ya teunossan pe, tùulon kon Katù maimuppù yenpoikannan pe, tùulon kon Wakù Itekale yekamannan pe, tùulon kon sochi yesan pe, molopai tùulon kon enupannan pe.

Philippians 3:15

Tamù'nawolon kon uchi kùmyamlo ichemokkasak kon nùsenumenkaik tàwàlà sàlà kasa. Molopai yà'là yekkwa yau là tùpatalà eusenumenka kon yau, Katù uya yekama màlà àpàkù'nokon.

1 Thessalonians 5:20

Katù nenpoikappù yekamatoppe pùla kù'nulunpatàu.

2 Peter 1:20

Tamù'nawolon wapiya, sàlà ittutàk kon: Katù yekale Katù Maimu yawon yenpoika ànù'là uya tùyiwalà pùla iwechi màlà.