Revelation 7:2 - Patamuna New Testament Revised

² Molopai tùulon inchelù uyàpù yeneppù uya wei wepakka winàpai tàwàlà tùwemassen Katù winàpaino itapyoto ton pattàtok pokonpe. Iwentaimeppù eke pe asakùlà'nan kon inchelù yamùk yekamappo pe, mùkyamlo Katù nùlepassan meluntà ke non molopai tuna mattanùttoppe tok uya.

Revelation 7:2 ပူးပေါင်းရင်းမြစ်များ

Matthew 16:16

Simon Peter uya yeikuppù, “Yeunossak àmàlà Christ, tàwàlàlà tùwemassen Katù Mumu,” tukaik.

Matthew 26:63

Tùse Jesus wechippù eppana. Molopai Eke kulu paatele uya tu'ma, “Tàwàlàlà tùwemassen Katù yesek tesassse, euselupakà. Ina pàk yekamakà Christ pe na' ewechi màlà, Katù mumu pe?” teppù.

John 6:27

Eyeipa kon iwa pàk neken ke'wotokomatàu tùumattasen màlà, tùse e'wotokomatàk kùyali tàwàlàlà tùwemassen yepolo kon pa. Kàyik Mumu uya sàlà kùyali ke elepa kon màlà. Masapùla Katù, Ikàipùnù uya sàlà yentok ipàkàlà tùsak màlà yanùnnsak tùuya yenpoikanài pe,” teppù.

2 Corinthians 1:22

Mùkkàlà tùponaloppe we'nà'nokon yentok ipàkàlà tùnài kùpàkù'nokon, molopai Wakù Akkwalù ke kùlepanài'nokon kùyewan kon yak tamù'nawolon itesappe tùwettok lepantok tùuya kùponalok kon pe yentok ipàkàlà pe.

Ephesians 1:13

Molopai amyamlo nàlà uya ailon teppù màlà Christ pàk: ailon itekale yetasak auya'nokon yau, Wakù Itekale wepùikattàntok ne'nàippù apyakù'nokon, molopai Katù uya tùponaloppe ewechi kon yentok ipàkàlà tùlùppù màlà àpàkù'nokon Wakù Akkwalù tùlù tùuya apyakù'nokon winà, itùlù tùuya teppù lùppù tùuya.

Ephesians 4:30

Molopai Wakù Katù Yakkwalù kùsewankono'matàu. Masapùla Wakù Akkwalù mùkkàlà Katù wettok eyesak kon pe yentok ipàkàlà Katù uya eyepeppù kon tùlù Weyu ponàlà.

1 Thessalonians 1:9

Akakklanpasak kon ina uya yattaino lùppù pàk tamù'nawàlà kappon yamùk tùuselupasan tùutauchinpaik, ina yanùmùppù auya'nokon pàk. Molopai tùutauchinpaik ewelattàsak kon ailon pen katù winàpai ailon molopai tàwàlàlà tùwemassen Katù winàkàik itapyoto pe pàk tùuselupasan mùkyamlo.

2 Timothy 2:19

Tùse meluntà sa'man wakapu Katù nùnonkappù tùutalo'ma woton pen màlà; molopai sàlà mayin we'menukasak màlà ipàk: “Itepulu mùkkàlà, tùponalok kon ittunài,” {Num16.5} molopai, “Ànù'là Itepulu yesek yesa'nài welattà màlà iwalai pen winàpai,” tukaik.

Hebrews 12:22

Tùse làkku, àuyàssak kon man Wùk Zion piyak tùwemassen Katù patassek pona, epùn yawon Jerusalem pona. Tukkan kon inchelù yamùk tùutauchinpaik tùwepilichan piyak àuyàssak kon màlà nai'nùk.

Revelation 1:3

Tùutauchinpasen mùkkàlà sàlà kaleta yennài, molopai tùutauchinpasan nàlà mùkyamlo iwekkupù wapiya yekamasak itekale maimu yetannan. Molopai sàlà kaleta yau imenukasak maimu yawolon kon. Masapùla sàlà yamùk wekuttok yattai weyu mei pùla man.

Revelation 10:1

Molopai tùulon meluntà inchelù uttà epùn poi yeneppù uya. Katuppluk yak iwepontàsak wechippù, molopai melemleik wechippù ippai woi, itenpata wechippù wei kasa, molopai ichi yamùk wechippù apok pe, wakapu yamùk kasa.

Revelation 10:4

Tok uselupa pe, kaleta menuka pàk wekkupùppù. Tùse mayin uselupa epùn poi yetappù uya, “7 pan kon wala'napi yamùk nekamappù ikukkà tùttusen pe pùla, molopai kù'menukai!” tukaik.

Revelation 16:12

Màlàyau 6 pe iku'nài inchelù uya tùssawù yawon ikkwamùppù eke tuna Euphrates pona. Tuna wa'munappù màlà, wei wepakkatok winàpaino kon kin yamùk uyàpù ye'ma koneka pe.

Revelation 5:2

Molopai meluntà inchelù yeneppù uya màlà, Eke pe tùwentaimese yekamappù ya “Ànùk ken kaleta yachittok ikkwà'nài yeppe nai, molopai kaleta yakkokanài yeppe?” tukaik.

Revelation 8:3

Tùulon inchelù appoi'nan tùpottàsen yen kolù yesak uyàpùppù molopai satippe iweleutappù tùpottàsen yapon piyak. Eke pe appoi'nan tùpottàsen ke ilepappù, ipottàtoppe ya tamù'nawolon kon Katù ponalok kon kappon yamùk wàpùlematok pokonpe, tùpottàsen yapon kolù po, aponnok yemlotopo.

Revelation 9:14

Mayin uya 6 pe iku'nài inchelù paka letù walai yesak pàk, “Asakùlà'nan kon inchelù yamùk inonkakà eke tuna Euphrates motau yachichak kon!” teppù.

Revelation 9:4

Wanak mattanùpù tok uya tukaik yekamappù màlà, wapùla yuk, wapùla yà'là yekkwa là yei molopai yà'là yek là. Mùkyamlo kappon yamùk ipattàsak kon Katù winàpaino tok yentok ipàkàlà ke tok peyeppà pàk pùnon neken mattanùttoppe tok uya.