Revelation 21:8 - Patamuna New Testament Revised

⁸ Tùse tùusenalippasan molopai ailon tawonnan pen, mùkkyamlo àli pe tùwessan, wànnan, tesak ke àli ku'nàinan, mùkyamlo piyassan yeselu ku'nàinan molopai ikonekasak katù yapulànnan, molopai tamù'nawàlà kasei ton uya tùnepolo kon yepolo màlà eke kulu apok tùuyassen patassek molopai kulupala kasa tùkà'nùnsen yau, màlà yakon itekkwa pe weli'nàtok,” teppù ya nàlà.

Revelation 21:8 ပူးပေါင်းရင်းမြစ်များ

Matthew 10:28

Kesenalippatàu mùkyamlo esak wànnan tùse akkwalù wànnan pen pàk. Tùse làkku esenalippatàk kon, Mùkkàlà asakklàma esak molopai akkwalù mattanù'nài apok yau pàk.

Matthew 25:25

Usenalipappù màlà. Màlàpàk utàppù molopai àpùlayattayi yonamùppù uya non yak. Yenkà! Sàlàichi màlà itesappe ewettok,’ teppù ya.

Matthew 8:26

“Yà'là peichi iwechi pàk ewettalipasak kon màlà? Attu'mùla kulu ailon tetok auya'nokon man!” tukaik Jesus uya yeikuppù. Màlàyau iwe'wuluukappù molopai assetun molopai chipachipa weleutatoppe ikupùppù ya, molopai iwàttù'nàkapùppù màlà.

Mark 9:44

Apok yau tok weluweyi welikù pen molopai apok usà'nùppù pen.

John 8:44

“Àkàipùnù kon Makui, ponalok kon amyamlo, molopai iche iwettok ku'nàinan. Iweppyattàppù motapai wànài pe iwessak màlà molopai kasei pe, masapùla ailon pùla iwechi màlà, yau. Kasei pe iichelupa yau iteselu màlà, masapùla kasei mùkkàlà molopai kasei kàipùnù.

2 Thessalonians 2:9

Katù yeyaton non yesak uyàpù màlà Settan meluntàlù yau, molopai tamù'nawolon yà'là yekkwa ton nà tùkkussan yek pen kupù ya màlà, enumenkannan, molopai enalippan nan. Tùse, ennakantok pe iwotokoyi wechi màlà.

1 Timothy 4:2

Sàlà enupantok màlà tùuyàssen kappon yamùk ennakannan kasei ton winà, molopai ittutok tok yewan uya welichak màlà, a'nek ayan nùpuluppù kasa.

Titus 1:16

Tok uya, “Katù ittunài Iulà,” te màlà; tùse tok welaikatok uya yenpoika pùla iwechi màlà. Akùlù ton mùkyamlo, molopai mayin yawolon kon pen, wakù ku'nàinan pe tok wechi pùla iwechi.

Hebrews 12:24

Jesus piyak àuyàssak kon man, emennak ikupù pàk tùwekkuttok ku'nài piyak. Molopai mùn yappasa'masak, wakù peiwa nùselupayai'nùk Abel mùnù yentai piyak.

Hebrews 13:4

Tàwà tamù'nawolon kon wemali'mantok tùnamaik nechii. Molopai tàwàlàlà atayappù wapùla ànoppù kon winàkàik ailon pe ettàk. Masapùla Katù uya àli ku'nài nan tesak kon ke molopai tùnmali'mappù kon pen pokonpe tùwessan talumattà màlà.

1 John 2:22

Ànùk ken uchi mùkkàlà kasei? Mùkyamlo, Jesus mùkkàlà Christ pen, tawonnan. Mùkkàlà wechi màlà Christ yeyaton pe. Asakklàma Kùkàipùnù molopai Imu tawonnan nulunpannan mùkyamlo.

1 John 3:15

Ànù'là tùtonpa ku'nài teyaton pe wechi màlà kappon wànài pe; molopai mùttuyatàik mùkkalà yekkwa yau tàwàlàlà wema'nàtok pùla iwechi.

1 John 5:10

Màlàpàk ànù'là ailon tawon Katù Mumu pàk wechi yekamatok tùuya yesappe tewan yau màlà, tùse ànù'là ailon tawon pen Katù pàk uya, kasei pe ikussak màlà, masapùla Katù uselupatok Tùmu pàk pàk ailon tesak ya pùla iwechipàk.

Revelation 14:10

Mùkkàlà uya nàlà màlà Katù we'naikatok yeuku inchi. Meluntà kulu tùwe'naikatok kokù yak inmappù esukenan yà'là yekkwa là ke yoi'mappù pùn. Ewaik, mùkkàlà sàlà ku'nàippù talumattà màlà apok molopai kulupala kasa tùkà'nùnsen yau, wakù ton inchelù yamùk molopai Kalinilu Mule yemloto po,” teppù ya eke pe.

Revelation 19:20

Àsà ene yachippù màlà, tamùkke iwalai pen itekale yekamanàippù pokonpe, mùkkàlà tensan pen yamùk ku'nàippù itemlotopo. (Màlà tensan pen yamùk winà màlà mùkyamlo àsà ene uya pattàntok yesak ton yennakappù ya, molopai àsà ene kasa ikonekasak yapulànnan nùssan.) Àsà ene molopai iwalai pen itekale yekamanàippù tawonnan yenu'mappù màlà asakklàma, nulà apok yak kulupala kasa tùkà'nùnsen pokonpe tùuyassen yak.

Revelation 2:11

“Tàwà tùpana ke nai'nùk netai, Wakù Akkwalù uya sochi yamùk yelupatok.” “Mùkyamlo entaikan nan nùssan umatta yakon itekkwa pe weli'nàtok ke pen màlà.”

Revelation 2:2

“Ànkupùppù tùttuyaik sa'man pe ewe'wotokomappù molopai pàlikanài pe ewechippù. Àliton kappon yamùk pàlika auya pùla iwechi tùttuyaik. Molopai mùkyamlo tùusesassan yeunossak kon pe yeunossak kon pe pùla echii'ma ittuppù auya. Kasei pe tok wechi ittuppù auya.

Revelation 21:27

Tùse yà'làlà àli là wapùla ikopposak là wewomù pen màlà pata yak, wapùla ànù'là, kuli'manài pe nai'nùk Katù yewanma ton ku'nài molopai kasei pe tùwessen. Tùse mùkyamlo neken, itesek imenukasak kon Kalinilu Mule kaletayi wema'nàtok kaletayi yau wewomù màlà pata yak.

Revelation 22:15

Tùse polopo màlà a'a yamùk wechi, mùkyamlo piyassan yeselu ku'nàinan, molopai àli ku'nàinan tesak kon ke, wànnan, Katù pen ikonekasak yemlotopo tùwepeimasan, molopai mùkyamlo tamù'nawàlà kasei ton asakklàma tùuselupatok kon yau molopai tùwelaikatok kon yau.

Revelation 9:17

Molopai we'neppàtok walai yau kawale yamùk molopai tok pon kon yeneppù uya. Tok pùlopo wapu wechippù ichuweyu pe apok kasa, tùtalilen tàk epekkek sapphire kasa, molopai kalakkwappan sulfur kasa. Kawale yamùk ippai wechippù màlà palauya ippai kasa. Tok mùta yapai apok wepakkappù, ikelechin, molopai sulfur.

Revelation 9:21

Wàntok tùuya'nokon nonkappù tok uya pen nàlà, tipiyassanù kon nà, àli imakuyippù kuttok tùuya'nokon tesak kon ke nossan yamùk pokonpe wapùla kàyik yamùk pokonpe, wapùla amappe tùwettok kon nonkappù tok uya pen.