Revelation 2:23 - Patamuna New Testament Revised

²³ Imunkà yamùk tùkka uya nàlà màlà, màlàyau nen uchi tamù'nawolon sochi yamùk uya Iulà pe iwechi ittu màlà, kappon yamùk yewan molopai tok usenumenkatok ittunài pe. Tamù'nawàlà amyamlo ye'ma uya màlà ànkupùppù yawàlà tewinpàk.

Revelation 2:23 ပူးပေါင်းရင်းမြစ်များ

Matthew 16:27

Masapùla Kàyik Mumu uyàpù màlà tùkàipùnù yakkwayi molopai yapulàtok yau tùyinchelùyi yamùk pokonpe, molopai nen uchi tamù'nawolon kon ye'ma ya màlà tok nùkupùppù yawàlà.

Luke 16:15

Jesus uya tok pàk, “Amyamlo mùkyamlo ikasa tùwekkussan kappon yamùk yenu yau, tùse Katù mùkkàlà eyewan kon ittunài. Masapùla wakù pe kulu kappon nùttu màlà àli Katù yewanma.

John 21:17

Jesus uya Peter pàk icholùwano itekkwa pe, “Simon, John mumu, à'nùn pe na' kùkussan?” teppù. Peter upokoitappù masapùla Jesus uya tùpàk icholùwano itekkwa pe, “À'nùn pe kulu na' kùkussan?” te pàk. Molopai Peter uya ipàk, “Uyepulu, tamù'nawolon mùttuyaik, mùttuyaik u'nùn pe àkupù uya,” teppù. Jesus uya ipàk, “Uyùkùn non kalinilu yamùk mewetùik,” teppù.

John 4:16

Jesus uya ipàk, “Itàkà atayappù ikà'mata, molopai menappoik sàlà motak,” teppù.

Yeunossak kon Wotokoyi 1:24

Molopai tok wàpùlemappù, “Itepulu, tamù'nawolon kon kappon yamùk yewan mùttuyaik. Màlàpàk ina pàk yekamakà i'nai là yanùnsak auya pùsamlo kùlottapai,

Romans 14:12

Màlàpàk uchi tamù'nawolon kon kùmyamlo uya tewinpàk echipàkàlà kùnkupùppù kon yekama màlà Katù pàk.

Romans 8:27

Molopai Katù, kappon yamùk yewan yennài, mùkkàlà Wakù Akkwalù usenumenkatok ittunài. Masapùla Wakù Akkwalù mùkkàlà Katù pawanattànài Katù munkà yamùk ponaloppe Katù yeselu yawàlà.

2 Corinthians 5:10

Masapùla tamù'nawolon kon kùmyamlo usenpoika màlà Christ uya ittuntok patassek yemloto pona, tamù'nawolon kon uya tùnepolo kon yepotoppe, wakù wapùla àli, sàlà non po tùwemapù kon yau tok nùkupùppù yawàlà.

Galatians 6:5

Masapùla tamù'nawolon kon uya tewincha tùnalà kon yalà pàk.

Hebrews 4:13

Yà'làlà wechi yonansappe pen màlà Katù winàpai, tamù'nawolon inkonekappù yau. Tamù'nawolon wechi màlà ayupo itenu yau. Molopai tamù'nawolon ikussak lùppù yekama màlà ipàk ailon pe.

1 Peter 1:17

“Ina Kàipùnù” tawonnan pe ewechi kon, tamù'nawolon kon kappon yamùk pàk, “suwa messaik” tawon, tok nùkupùppù yawàlà ekkaichalà pàk; uchi emattàk kon talà sàlà non po inamatok molopai yapulàtok auya'nokon yau.

Revelation 2:11

“Tàwà tùpana ke nai'nùk netai, Wakù Akkwalù uya sochi yamùk yelupatok.” “Mùkyamlo entaikan nan nùssan umatta yakon itekkwa pe weli'nàtok ke pen màlà.”

Revelation 2:7

“Tàwà tùpana ke nai'nùk Wakù Akkwalù uya Sochi yamùk yelupatok yetai. Mùkyamlo entaikannannùssan uya, nulà ku'nài kùyali yepelu nattoppe ikupù uya màlà, màlà iwattasak Katù tumà yau,” teppù ya.

Revelation 20:12

Molopai yeneppù uya iwelichak kon lùssan eke ton molopai echikili ton, ekkaichalà, satippe aponnok yemloto po. Kaleta yamùk yakkokasak wechippù, molopai tùulon kaleta yakkokasak wechippù, wema'nàtok kaletayi. Iwelichak kon ittuppù màlà tok nùkupùppù yawàlà imenukasak kaleta yamùk yau pàkàlà.

Revelation 20:13

Màlàyau palau uya iwelichak kon yenpakkappù tùkapai. Weli'nàtok molopai iwelichak kon patassek uya iwelichak kon tùnachippù kon yenpakkappù. Molopai tamù'nawolon kon ittuppù màlà tewinpàk tok nùkupùppù yawàlà.

Revelation 22:12

“Yetatàk kon! Uyàpù màlà tachinpe kulu tùpo pùla. E'mantok uya nepù uya màlà uya'là, tamù'nawolon kon yemyak untùlù tok nùkupùppù yawàlà.

Revelation 6:8

Uyenu tùlùppù uya, màlàyau tenkoloimu'nan kawale wechippù molo. Ipo tùwessen yesettàsak wechippù Weli'nàtok pe, molopai iwelichak kon patassek wechippù màlà ite'mappù pàk mei pùla. Apàikkek ke tok lepasak wechippù màlà ipùkkù pe là (1/4 pe) non yepoi, wàntoppe wepanta'mantok yai, iwan ke, palan ke, molopai àsà ton kamo yamùk non pon kon ke.