Revelation 2:14 - Patamuna New Testament Revised

¹⁴ Tùse molo man tukkan pen nà ikasa pùla ewechi pàk ewinàkàik usenumenkatok. Tùulon kon àkklottau'nokon man Balaam uya enupantok ku'nài nan. Balak yenupappù ya màlà Israel pon kon wemakuima toppe ikuttoppe ya Katù pen yemyak itùsak lùppù kùyali nattoppe tok uya. Molopai tok uya àli imakuyippù kuttoppe tesak kon ke.

Revelation 2:14 ပူးပေါင်းရင်းမြစ်များ

Matthew 18:7

Àsà pe kulu sàlà wolù pon kon kappon yamùk pona iwechi màlà, masapùla molo màlà kappon yamùk welattàtoppe iku'nài wechi. Màlà yekkwa ton wekkupù màlà, tùse àsà pe kulu iwechi màlà mùkyamlo iwekkuttoppe iku'nàinan pona!” teppù ya.

Yeunossak kon Wotokoyi 15:29

Kùyali kù'nattàu itùsak lùppù tùulon kon katù yamùk yemyak tok nama pe, mùn kùsemetàu, kamo i'mùtùntàsak kùsantàu, molopai àli ànkupai we'nàtok esak ke winàpai ettàk kon. Wakù pe ewechi kon màlà sàlà yamùk kupù auya'nokon pùla iwechi yau. Màlà neken.” tukaik.

Yeunossak kon Wotokoyi 21:25

Tùse Jew yamùk pen ailon tawonnan pe iwenasak kon, yemyak kaleta yeunokoppù ina uya, tok pàk ina uya yekamappù, ina usenumenkasak man yà'làlà kùyali, ikonekasak katù yemloto pona ichalattàsak lùppù napù tok uya tukaik; wapùla mùn yeme tok uya tukaik, wapùla ànù'là i'mùtùntàsak kamo yanù tok uya tukaik, molopai àli imakuyippù kuttok esak ke winàpai tok wettoppe,” teppù Paul pàk.

Romans 11:9

Molopai David uya suwa te, “Tàwà uchi tok yeipa nelattài male yeipa pe molopai tok pùlannài pe, tàwà tok nekkawai'mai, tàwà tok talumattà nechii!

Romans 14:13

Màlàyau uchi, suwa man molopai suwa pùla man tetok tonpa wannà yamùk pàk yeleutanùppai'nokon man. Tùse, eusenumenkatok kon ikonekatàk kon. Yà'làlà kùkkuttàu ewettatai'matok kon ipona pe wapùla ewekkawai'matok kon yak pe.

Romans 14:21

Wakù peiwa iwechi màlà kamo pun yanù pùla we'nà yau, wapùla yà'là yekkwa là so'li inchi pùla we'nà yau. Molopai wakù peiwa iwechi yà'là yekkwa là tùulon kappon wekkawai'matoppe ku'nài kupù pùla iwechi yau.

Romans 9:32

Yà'là pe iwechi pàk? Masapùla tok nùkupùppù wechi ailon tetok pàkànsau pùla tùse wotoko pàkànsau pàk. Tok tùwettatai'masan “wettatai'mantok ipona tàk” pona

1 Corinthians 1:23

Tùse ina mùkyamlo Christ welikùppù pulusuk po yekale yekamannan, Jew yamùk wettatai'matok ipona, molopai wo'mattantok Jew yamùk pen pona;

1 Corinthians 7:2

Tùse eke pe imakuyippù pe esak ke we'nàtok wechi molo pàk, tàwà kàyik yamùk wechi màlà tùponalà tùnoppù ke'ne, molopai nossan yamùk wechi tùponalà tùtayappù ke'ne.

Hebrews 13:4

Tàwà tamù'nawolon kon wemali'mantok tùnamaik nechii. Molopai tàwàlàlà atayappù wapùla ànoppù kon winàkàik ailon pe ettàk. Masapùla Katù uya àli ku'nài nan tesak kon ke molopai tùnmali'mappù kon pen pokonpe tùwessan talumattà màlà.

1 Peter 2:8

Molopai, “Sàlà màlà tàk kappon yamùk wettatai'matok iwinà woton, tàk tok kawai'ma woton,” teppù. {Isa 8. 14} Tok wettatai'ma màlà masapùla ailon tesak tok uya Katù Maimu pàk pùla iwechi pàk, màlàichi Katù yeselu tok ponalok.

2 Peter 2:15

Tok uya tossalon asanta nànsak màlà molopai tok utassak; tok uya asanta Balaam, Beor mumu, nanùmùppù lùppù yanùnsak màlà. Pùlayata iwakùli mùkkàlà àli kupù tùuya winà inepolo,

Jude 1:11

Talumattàntok wechi màlà tok po! Masapùla tok utàsak Cain utàppù yawàlà lùppù yawà pàk; tok wettùsak man iwalai pen yak pùlayatta pàkànsau, Balaam wechippù kasa; molopai tok mattanùssak man mayin yawàlà pùla we'nàtok pàkàlà Korah wechippù kasa.

Revelation 2:20

Tùse sàlàichi màlà usenumenkatok ewinàkàik. Mùkkàlà nossan Jezebel pàlikanài àmàlà, mùkkàlà Katù Maimu yenpoikanài pe tukaik tùusesassen. Uyapyoto yamùk yenupanài mùkkàlà àli imakuyippù kuttoppe tok uya tesak kon ke, molopai Katù pen yemyak itùsak kùyali nattoppe tok uya iku'nài.

Revelation 2:4

Tùse sàlàichi màlà wakù pe pùla ewechi pàk usenumenkatok ewinàkàik, wapiya u'nùnmappù auya kasa u'nùnma auya pùla man.

Revelation 21:8

Tùse tùusenalippasan molopai ailon tawonnan pen, mùkkyamlo àli pe tùwessan, wànnan, tesak ke àli ku'nàinan, mùkyamlo piyassan yeselu ku'nàinan molopai ikonekasak katù yapulànnan, molopai tamù'nawàlà kasei ton uya tùnepolo kon yepolo màlà eke kulu apok tùuyassen patassek molopai kulupala kasa tùkà'nùnsen yau, màlà yakon itekkwa pe weli'nàtok,” teppù ya nàlà.

Revelation 22:15

Tùse polopo màlà a'a yamùk wechi, mùkyamlo piyassan yeselu ku'nàinan, molopai àli ku'nàinan tesak kon ke, wànnan, Katù pen ikonekasak yemlotopo tùwepeimasan, molopai mùkyamlo tamù'nawàlà kasei ton asakklàma tùuselupatok kon yau molopai tùwelaikatok kon yau.