Revelation 13:11 - Patamuna New Testament Revised

¹¹ Molopai nàlà tùulon àsà ene wepakka non yapai yeneppù uya màlà. Asa'là iletù iwechippù kalinilu mule letù kasa, molopai ichelupappù ulupelu kasa.

Revelation 13:11 ပူးပေါင်းရင်းမြစ်များ

Matthew 7:15

“Tùttuse ettàk kon, ailon pen itekale yenpoikannan pàk. Tok uyàpù màlà apyakù'nokon kalinilu kasa là tok usene màlà polopo, tùse àsà ton kamo yamùk kasa tok wechi màlà.

Romans 16:18

Masapùla mùkyamlo yekkwa ton wechi Katù poitolù pe pen màlà, tùse tesak kon wettok neken iche pàk tok usenumenka. Wakù pe tùuselupatok kon winà molopai ennakan pe uselupantok ke ittunnan pen yennakanàinan.

2 Thessalonians 2:4

Yà'làlà, kappon yamùk wàpùlematok ipàk, iche pùla iwechi màlà. Molopai wepeiman nà inama pe wechi itewanma pe, tamù'nawolon màlà yamùk yentai iwekkupù màlà, molopai ità Katù yùwùk tak chichiu pe esse, eke pe ekkusse, molopai Katù pe tukaik iwekkupù màlà. ‘Iulà nen mùkkàlà Katù,’ te ya màlà.

Revelation 11:7

Tùnekama kon yekamakassak tok uya yau, àsà ene tùuyàssen i'nawon iteuta yapai uya tok panta'ma màlà. Tok yentaika ya màlà molopai tok wànà ya.

Revelation 12:17

Màlàyau ulupelu we'naikasak kulu wechippù màlà nossan pàk. Molopai iitàppù imle tonpassan panta'mase, tamù'nawolon kon Katù uya enupantok maimu yawolon kon, molopai ailon Jesus winà yenpoikasak lùppù pàk ailon pe tùwessan panta'mase.

Revelation 13:1

Màlàyau àsà ene usenpo palau kapai yeneppù uya. 10 pe iletù wechippù molopai 7 pe ippai, alok wechippù iletù yamùk pàk, ikaichalà. Àli esek Katù talumattàtok menukasak wechippù ikaichalà ippai yamùk pàk.

Revelation 13:17

Ànù'là uya yà'làlà ye'ma wapùla ichilanma yentai iwechippù, sàlà pattàntok, màlà àsà ene yesek wapùla inonpayi pùla echii'ma.

Revelation 13:4

Kappon yamùk uya ulupelu yapulàppù, masapùla tapàikketù tùsak ya itemyak pàk. Tok uya nàlà yapulàppù, “Ànùk ken pùsàlà àsà ene walai? Ànùk wepanta'ma ken iwinàkàik?” tukaik.

Revelation 16:13

Màlàyau àsolùwawon kon àli ton akkwalù yamùk yeneppù uya, pàlàtuku kasa'ne tok wepakka ulupelu mùta yapai, àsà ene mùta yapai, molopai iwalai pen itekale yekamanài mùta yapai.

Revelation 17:6

Molopai yeneppù uya nossan wetùnsak Katù ponalok kon kappon yamùk mùnù ke. Molopai mùkyamlo iwàsak kon nùssan mùnù ke, masapùla ailon pe tok wessak Jesus pàk wenai. Yensak uya yau usenumenkasak kulu wechippù.

Revelation 17:8

Àsà ene menpàssai'nùk wechippù màlà molo, tùse molo pùla nen uchi iwechi màlà. Iiyàpù i'nauwon iteuta yapai winàkàik man molopai iità màlà tùmattanùttoppe. Kappon yamùk non po tùwemassan itesek imenukasak kon pen wema'nàtok yapon kaleta yau, non wepyattà motapai, usenumenka kulu màlà tamù'nawàlà, àsà ene yene tùuya'nokon yau. Masapùla nulà iwechippù màlà, tùse nulà pùla nen uchi iwechi, molopai ichenpoika tu'ma màlà.