Matthew 22:16 - Patamuna New Testament Revised

¹⁶ Màlàyau ta'lon kon tonpa yamùk molopai Herod tonpa yamùk yeunokoppù tok uya Jesus piyak. “Enupanài, ina nùttuyan wakù pe ewechi. Kappon yamùk ponalok ailon, Katù yeselu pàk enupanài àmàlà, yà'là tukaik kappon yamùk usenumenka pàk tùutaimelunpaik pùla, masapùla tamù'nawolon kon kappon yamùk mùkyamlo ekaichalon kon eyenu yau.

Matthew 22:16 ပူးပေါင်းရင်းမြစ်များ

Matthew 22:24

“Enupanài, Moses uya nen kappon yamùk yenupàppù, Kàyik welichak imunkà pùla echii'ma yau, yakon wechi tùlùi noppù lùppù yak màlà, tok uya mule yamùk yepotoppe iwelichak lùppù munkà pe,” tukaik.

Matthew 22:26

Màlà lùppù wekkupùppù màlà yakon winàkàik, icholùwano winàkàik molopai nen uchi tamù'nawolon kon 7 pan kon winàkàik.

Matthew 26:18

“Itàtàk kon mùkkàlà kàyik piyak Jerusalem pona.” teppù ya tok pàk, “Molopai ipàk ‘Uweyu uyàssak man, unenupa ton pokonpe Usentaka'nàppà Yattai Uta'lettàntok kupù uya màlà àyùwùk tau nùkapàssan Enupanài,’ mùkatàik,” teppù ya.

Matthew 26:49

Tùwelepansak yau, Judas Iscariot utàppù màlà Jesus piyak tossalà, molopai ipàk, “Tàwà wàlàkka'nàtok apyau nechii, Ticha,” teppù ya, molopai ikismappù ya.

Mark 10:17

Jesus wessalattàkassak tùutà pàk tùse kàyik uyàpùppù ipyak, tese'muyok iwenappù itemlotopo molopai Jesus yekamappoppù ya, “Wakù Enupanài, yà'là kupù uya ken wema'nàtok tàwàlàlà yepotoppe uya?” tukaik.

Mark 12:13

Pharisee tonpa yamùk molopai Herod ya'lon kon yeunossak tok uya wechippù Jesus piyak, ichelupa winà yachitoppe tùuya'nokon yekamappopàsse.

Mark 12:14

Tok uyàpùppù ipyak molopai yekamappoppù tok uya. “Enupanài, ailon pe tùuselupassen pe ewechi ittuyan ina. Yà'là tukaik sa' kappon yamùk nùsenumenkayan ko tukaik là tùutaimelunpasen pen àmàlà. Masapùla ànùk pe là kappon wechi ittuiche tùwessen pen, tùse ailon pàk enupanài àmàlà Katù yeselu kappon ponalok pàk. Ina pàk tàwà yekamakà. Ikasa pùla na' iwechi pùlayatta ye'ma Rome pon pata yesak yemyak? Ina uya ken na' ye'ma, wapùla kane?” tukaik.

Mark 3:6

Màlàyau Pharisee yamùk utàppù synagogue tapai eselupaik Herod tonpa yamùk pokonpe Jesus winàkàik. Iwàtok tùuya'nokon woton ittuse.

Mark 8:15

Jesus uya tok panamappù, “Tùttuik kan mettàik tà nalippe, Pharisee yamùk molopai Herod tawonnan yeselu pàk so'li konekanài nan pàk. Mùkyamlo yeselu (so'li pe) amattanùttakù'nokon,” tukaik.

Luke 20:21

Pùsamlo elaik yamùk uya wateppù Jesus pàk, “Enupanài, ina nùttuyan euselupatok molopai enupantok auya wechi ikasa. Ina nùttuyan tùyiwalà kappon wettok, ittuiche pùla ewechi, tùse ailon pàk enupanài pe ewechi Katù wettok iche kappon ponaloppe pàk.

Luke 7:40

Jesus uselupappù, “Simon, unekama molo man àpàk,” tukaik. “Ewaik Enupanài, yekamakà,” teppù ya.

John 14:6

Jesus uya, “Iulà mùkkàlà asanta, ailon molopai wema'nàtok. ànù'là uyàpù Ukàipùnù piyak pen màlà, tùse uwinà neken.

John 18:37

Màlàpàk Pilate uya ipàk, “Màlàyau ken na' kin àmàlà?” teppù. Jesus uya yeikuppù “Kin àmàlà mùkayaik làkku. Wentusak màlà sàlà wolù yak molopai uyàpùppù sàlà pàkànsau, ailon pàk eselupaik. Tamù'nawolon kon ailon winon kon umaimu yetannan,” teppù Jesus uya Pilate pàk.

John 7:18

“Mùkkàlà tùyiwalà tùnkupù pàk tùuselupasen, tùnamatok yepotoppe tùuya, tùse mùkkàlà teuno'nàippù namatok ponaloppe ne'wotokomayai'nùk mùkkàlà ailon kulu, kasei pùla iwechi màlà yau.

2 Corinthians 2:17

Tukkan kon tùulon kon kappon yamùk walai non pen ina mùkyamlo Katù Maimu yapulànnan temamin molopai iche tùwettok kon yepotok tùuya'nokon iwinà pe neken, tùse Katù uya ina yeunossak pàk, tùuselupasan ina ailon pe itemlotopo, Christ yapyoto pe.

2 Corinthians 4:2

Tamù'nawolon tonantau tùkussen molopai kuli'manài eselu yamùk ku'nàinan pen ina, ànù'la yennakannan pen, ailon pe Katù Maimu yenpoikannan. Tùse làkku Katù uya màlà ailon pe ina uselupa yene molopai kappon yamùk uya nàlà ailon pe ina wechi ittu.

2 Corinthians 5:16

Màlàpàk sàlà motapai kappon nùttutok yawà ànù'là ittunài pen ina. Pena lànen Christ ittupù ina uya kappon uya ituntok yawà. Màlà ku'nài nan pen nen uchi ina.

Galatians 1:10

Kappon yamùk yapulàtok nepùiche na' wessan, wapùla Katù? Wapùla kappon yamùk yauchinpaiche na' wessan? Kappon yamùk yauchinpaiche lùppù wechi yau, Christ yapyoto pe wechi pen màlà.

Galatians 2:6

Mùkyamlo nàlà eke ton ennàinan pe tukaik tùwessan, ànùk pe là tok wessak uya tùpatalà tok kussak pùla iwechi màlà upona. Masapùla Katù mùkkàlà polopo usennàtok pàk ittunài pen. Mùkyamlo là kàyik yamùk uya uselupatok tonpattàpàssak pùla man.

1 Thessalonians 2:4

Tùse làkku ina uselupa nai'nùk Katù wettok iche kasa, masapùla ina yanùnsak ya nai'nùk molopai Wakù Itekale tùsak ya ina yemyak ina nekama pe. Kappon yamùk yauchinpaiche là ina wechi pen sàlà. Tùse Katù làkku anauchinpapai ina wechi, mùkkàlà ina yeselu ina yewan yau nai'nùk ittunài.

James 3:17

Tùse pukkeppe we'nàtok màlà epùn poino, wapiyalok kulu wakù esukenan; ewan wàlàkattok, tenpe àsà pe pùla we'nàtok tùwanmùla, alomùla, molopai echitonpa pe ku'nài; usentupantok ke iwanùssak màlà, molopai wakù eselu ne'nài; tamù'nawolon kon namatok e'kkaichalà yenpoikanài molopai ennakanài pùn.

1 John 5:20

Ittu'nokon nàlà man Katù Mumu uyàssak molopai lepansak kon ya ittutok ke; ailon pe nainùk ittutoppe. Molopai mùkkàlà ailon pe nai'nùk yau we'nà'nokon man, Imu Jesus Christ yau. Pùsàlà ichi mùkkàlà ailon Katù molopai sàlàichi màlà tàwàlàlà wema'nàtok.