39 Molopai ittà tukkappù àpùlemaik, màlà lùppù pe iwàpùlemappù.
“Àwàpùlema kon yau tukke itesek lùppù pe neken kentakklomatàu, Katù ittunnan pen kasa là, tukke tùuselupa kon pàk Katù uya teta kon pe yekamannan.
“Enpen ettàk kon molopai àpùlematàk eyittutok yak àutà kon tukaik. Ayakkwalù kon nen alikyek pe man, tùse atu'mùla àpun kon man,” teppù Jesus uya tok pàk.
Màlàyau iwennappoppù tukkappù tùnenupa ton piyak molopai tok we'nùn tu'masak yepoloppù ya. E'molonnùppe tok wechi. Màlàyau yà'là tukaik imaimu yeitok tùuya'nokon ittu tok uya pùla iwechippù.
Jesus uya tok pàk sàlà panton yekamappù màlà, tok yenupatoppe tùuya tàwàlà là tok wàpùlematoppe, molopai ailon tetok tùuya'nokon nonka tok uya tukaik.
Àsolùwau itekkwa Itepulu pawanattàppù uya imokka toppe ya uwinàpai.
Tùwemapù non po yau Jesus wàpùlemappù màlà molopai Katù pawanattàppù ya eke pe tùkalanse molopai tenupalu tùkkwanse, tùpùikattà toppe ya weli'nàtok winàpai. Katù uya imaimu yetappù màlà masapùla tùmaimu yawàlà iwettùssak tamù'nawàlà pàk.