Mark 10:22 - Patamuna New Testament Revised

²² Sàlà yetasak tùuya yau, kàyik yenpata wemyakanmappù kulu molopai iitàppù màlà tùusewankono'maik, masapùla tukke mamin yesappe tùwechi pàk.

Mark 10:22 ပူးပေါင်းရင်းမြစ်များ

Matthew 13:22

Tùpànsen iwepukasak lùppù àlittak màlà mùkyamlo Katù Maimu yetannan. Tùse utaimelupantok sàlà motau wema'nàtok pàk molopai mamin kuttok wakùli wannà pe màlà Katù Maimu yeulankanài. Molopai tok wepeta pen.

Matthew 19:22

Sàlà yetasak tùuya yau, umoine utàppù màlà tùusewankono'maik, masapùla tukke kulu mamin yesappe tùwechi pàk.

Matthew 27:3

Jesus welikù pe iwechi yensak tùuya yau, yeimipponàippù Judas Iscariot, usewankono'masak wechippù màlà molopai 30 pan chilùpa pun pùlayatta mùnappoppù ya eke ton paatele yamùk molopai tùnamasan yemyak.

Mark 10:21

Jesus uya tù'nùn pe yeneppù, molopai ipàk, “Tewin neken nà ànkupù molo man. Itàkà apyau nai'nùk ichilanmata molopai yà'là pùnon yemyak pùlayatta tùlù pa. Màlàyau temamin ke ewechi màlà epùn po. Molopai àikkà uya'là,” teppù.

Mark 10:23

Jesus welattàppù tùnenupa ton yense, màlàyau tok pàk “Sa'man pe nen mà iwechi màlà tà temamin kenan kon kulu pona Katù yanùmù tok uya tepulu kon pe yentai, ” teppù ya.

Mark 6:20

Herod uya John namappù masapùla wakù pe, molopai ikasa iwechi pàk. Tùse yachichak ya neken nen wechippù màlà. John uselupa enetapai iweppàtùppù taimelunpa ya lànen ittu tùuya tùse, ichelupa yetappù ya tùwakùli pe.

Mark 6:26

Kin usewankono'mappù kulu màlà “Kane,” te ya yentai iwechipàk inulunpa ya pùla masapùla, “Ailon pe wa te uya sàlà, ukaseita pen,” te tùuya yetasak kappon yamùk uya pàk.

Luke 12:15

Molopai iichelupappù, “Yetatàk kon, molopai useka'nonkantok yà'là yamùk là iche winàpài ettàk kon. Masapùla kappon wemattok màlà tukkan itesak pe iwettok pùkkù pen,” teppù ya tamù'nawolon kon pàk.

Luke 18:23

Tùse sàlà yetasak tùuya yau, kàyik uwankono'mappù kulu màlà masapùla tukke kulu mamin yesappe iwechippù màlà.

2 Corinthians 7:10

Usewankono'mantok Katù winàpaino màlà wemyakanmatok ne'nài wepùikattàntok yak. Molopai àli pe là usenumenkantok ne'nài wemyakanmansak pàk pen. Tùse wolù yawon usewankono'mantok màlà weli'nàtok ne'nài.

Ephesians 5:5

Masapùla sàlà mùttuyatàik: ànù'là màlà yamùk ku'nài wapùla tùuseka'nonkasen uya yà'làlà yepolo pen màlà Christ molopai Katù winàpai, masapùla ànù'là yemamin iche we'nàtok wechi màlà weppeimantok itemlotopo pe.

2 Timothy 4:10

Màlà yamùk Katù winàpai lattànài nan kusan Demus tùwakùli pe molopai unonkappù ya man; ittàppù man Thessalonica pona. Crescens utàppù Galatia pona, molopai Titus utàppù Dalmatia pona.