John 15:15 - Patamuna New Testament Revised

¹⁵ Sàlà motapai apyoto yamùk pe, eyesatù kon uya pen sàlà, masapùla tepulu uya yà'làlà kupù ittunài pen mùkkàlà apyoto. Tùse eyesassak kon uya màlà uwechi yakon non tukaik, masapùla tamù'nawàlà Ukàipùnù winàpai unùttuppù ittu kon pa ikussak uya màlà.

John 15:15 ပူးပေါင်းရင်းမြစ်များ

Matthew 13:11

“Tùttusen pen Itepulu pe we'nàtok epùn po ittutok tùsak man apyakù'nokon. Tùse mùkyamlo piyak pùla,” tukaik Jesus uya tok maimu yeikuppù.

Luke 10:23

Màlàyau Jesus welattàppù ta'lon kon winàkàik molopai tok pàk, “Matauchinpayatàik màlà yamùk menyatài'nùk yene auya'nokon pàk!

John 12:26

Ànù'là iche wettok ku'nài uyàpù màlà uya'là, molopai i'nailà là wechi yau, molo nàlà upoitolù wechi màlà. Ukàipùnù uya mùkkàlà yapulà màlà,” tukaik.

John 13:16

Ailon kulu sàlà, apyoto mùkkàlà tepulu yentaino pen. Molopai mayin yekamaik yeunossak mùkkàlà teuno'nàippù yentaino pen.

John 15:20

Ittutàk kon àpàkù'nokon ‘Apyoto mùkkàlà tepotolù yentaino pen,’ ” teppù uya. “Utalumattàsak tùuya'nokon yau, tok uya nàlà atalumattà kon màlà. Tenupatok kon uya yawàlà tùwechi kon yau, tok wechi nàlà màlà tenupatok auya'nokon yawàlà.

John 16:12

“Tukke lùppù àpàkù'nokon unekama molo man, tùse yanùmù auya'nokon yeselùkek pùla man sàlà pe.

John 17:26

Eyittutoppe tok uya ikussak uya man molopai eyittutoppe lùppù là tok uya ikupù pàk wechi màlà, u'nùnmatok auya wettoppe tok yau, molopai Iulà pe tok yau wettoppe,” tukaik iwàpùlemappù.

John 20:17

Jesus uya ipàk, “Kùyachii, masapùla Ukàipùnù piyak utàppù pùla lùppù man, tùse itàkà, utonpa yamùk pàk yekamata, ‘Utà sàlà Ukàipùnù piyak molopai Àkàipùnù kon piyak, molopai Ukatùyi molopai Akatùyi kon piyak!’ ” teppù.

John 4:19

Nossan uya ipàk, “ uyepulu, Katù Maimu yenpoikanài pe ewechi pe tùttuyaik,” teppù.

John 8:26

Tùse tukke àpàkù'nokon uselupatok molo man, molopai suwa messatàik tetok uya. Tùse uyeuno'nàippù mùkkàlà ailon kulu molopai kappon yamùk wolù yawon kon pàk unetappù neken iwinàpai yekamanài Iulà,” tukaik.

Yeunossak kon Wotokoyi 20:27

Masapùla tamù'nawolon Katù yeselu yekamappù uya àpàkù'nokon.

Romans 7:15

Unkupù ittu uya pùla iwechi màlà, masapùla ànkuppai wettok kupù uya pùla iwechipàk. Tùse làkku uyewanma pe unkupù kupù uya.

1 Corinthians 2:16

“Masapùla ànùk ken Itepulu usenumenkatok ittuka'nài, suwa ekkà tetoppe tùuya ipàk.” {Isa 40.13} Tùse Christ usenumekatok yesappe we'nà'nokon man.

Galatians 4:6

Masapùla tùmunkà pe ewechi kon pàk Katù uya Tùmu Yakkwalù yeunokoppù màlà kùyewan kon yak, Akkwalù mùkkàlà yekamapponài “Ukàipùnù, Ukàipùnù,” tukaik.

Ephesians 3:5

Pena kappon yamùk pàk sàlà tùttusen pen yekamappù pen màlà, tùse Katù uya yenpoikasak man sàlà pe Wakù Akkwalù winà wakù ton esukenan kon tùneunokossan molopai tùmaimu yenpoikannannùssan pàk.

Colossians 1:26

Tachinpe sàlà itekale wechippù màlà tùttusen pe pùla tamù'nawolon kon winàpai ikussak pe molopai yonansappe nàlà. Tùse yenpoikasak ya nen uchi sàlà Katù ponalok kon kappon yamùk yenu yak.

Philemon 1:16

Sàlà pe te'masen pe pùla tùwe'wotokomasen pe neken pùla man, tùse apyoto yentai: kùtonpa pe kulu man Christ yau. Màlà yentai man upona! Màlà yentai nen uchi àpona'nokon iwechi màlà Itepulu yau!

James 1:1

Sàlà kaleta màlà James, Katù molopai Itepulu Jesus Christ yapyoto winàpaino. “Wakù pe na' messatàu?” tetok tamù'nawolon kon12 pan kon ikkok Katù ponalok kon kappon yamùk, iwetta'nùssak kon piyak inmenukappù.

James 2:23

Molopai iwekkupùppù Katù Maimu uya wa teppù kasa, “Abraham uya ailon teppù Katù pàk, ailon tetok ya pàkànsau Katù uya yanùmùppù wakù pe iwechi pàk,” tukaik. Molopai Katù uya yesatùppù, “Uwechi yakon Abraham,” tukaik.

1 Peter 1:11

Tok wechippù yà'là yattai iweyu wechi ittuiche molopai atta iyàpù ittuiche. Masapùla Wakù Akkwalù Christ winàpaino wechi tok yau uya sàlà yekamappù, wettalumattàntok Christ nùpàlika woton yekama tùuya'nokon yau, molopai yapulàtok ite'mappù pàk tùuyàssen.

2 Peter 1:1

Sàlà màlà kaleta Simon Peter, Jesus Christ yapyoto molopai ineunokoppù winàpaino, mùkyamlo wakù pe kùkatùyi wettok molopai pùikattànài Jesus Christ yai. Ilepasak kon ailon tetok wakù kulu, ina uya ailon tetok walai ke piyak inmenukappù.

Jude 1:1

Sàlà màlà kaleta Jude, Jesus Christ yapyoto, molopai James tonpa nùmenukappù. Katù Kùkàipùnù kon nùkà'massan molopai Katù uya pùnùnmantok yau tùwemassan molopai Jesus Christ uya mainanpantok yau tùwemassan piyak inmenukappù sàlà:

Revelation 1:1

Sàlà màlà Jesus Christ nenpoikassan. Sàlà yamùk tùlùppù màlà Katù uya itemyak, tapyoto ton pàk tùwekkupù woton tachinpe kulu tùpo pùla yenpoikatoppe ya. Christ uya tùyinchelùyi yeunokoppù màlà tapyoto John piyak, sàlà yamùk yenpoikase ipàk.