1 Molopai uchi amyamlo temamin kenan kon kappon yamùk kùyetatàk kon! Àpokoitatàk kon molopai akalantàk kon eke pe talumattàntok nùyàsai'nùk àpona'nokon pàkànsau.
Wei tùwepakkasen molopai tùwa'mintasen a'neppe molopai tùwattasen yaipùtanù'nài; itùpùlù tùwessolokasen molopai wakù pe iwettok tùumattasen. Màlà kasa làma temamin kenan kappon umatta màlà tùusemaminnùttà pe yekama ya tùse.
Tùse entuppa'nokon nulunpannan amyamlo! Ànùk ken atalumattànnan molopai ayanàinan ittunài yemloto pona? Temamin kenan kon uchi!
Imasaichi kùyetatàk kon amyamlo, “Sàlà pe wapùla ewanawà utàn nokon màlà tùulon pata yak, molo tachinpe ko'mannà tewin kilichimochi, yà'làlà ye'ma màlà wapùla yà'làlà chilanma, molopai pùlayatta yepolo eke pe,” tawonnan.
Esewankono'matàk kon, àpokoitatàk molopai akalantàk kon; tàwà àwàkklàtok kon nelattài akalantok kon pe, molopai tàwà autauchinpatok nelattài pokoitantok pe.