14 Ittu auya'nokon pùla iwechi màlà yà'là yekkwa ewemattok kon ewanawà! Masapùla ichin pen katuppluk kasa ewechi kon pàk, tensen pe malalà molopai ippla tùwenassen pe.
Tàwà temamin kenan kon ailon tawon kappon tùutauchinpaik nechii masapùla Katù uya tùnuttàsak pàk, àsà'mùla tùmasak ya pàk. Masapùla temamin kenan wena ippla màlà wanak yùpùlù kasa.
Masapùla, “Tamù'nawolon kon kappon yamùk mùkyamlo wanak walainon, molopai tamù'nawolon tok yapulàtok màlà wanak yùpùlù walainon; wanak tùwelichen molopai itùpùlù tùwessolokasen,
Tamù'nawolon yà'làlà wenukattok yattai mei pùla man. Eyesak kon pe ettàk kon, molopai enpen ettàk kon, àwàpùlema kon pe.
Wolù molopai tamù'nawolon yawon kon kappon wettok iche màlà tùutàsen molopai ipla tùwenasen; tùse mùkkàlà Katù wettok iche ku'nài wemapù màlà tàwàlàlà.