James 3:15 - Patamuna New Testament Revised

¹⁵ Sàlà yekkwa pukkek màlà epùn poino pen; wolù yawon yeselu màlà, iwekkuppù màlà àli eyeselu kon winàpai, Makui, winàpaino pe iwechi.

James 3:15 ပူးပေါင်းရင်းမြစ်များ

Luke 16:8

“Ailon pen pùlayatta mainanpanài yepulu uya yapulàppù màlà ittunài pe iwessak pàk. Kappon yamùk sàlà non pon kon mùkyamlo ikasa pe tukaik tùwotokoyi kon ku'nài nan, akkwa yawon kon kappon yamùk yentai,” teppù Jesus uya.

John 3:17

Masapùla sàlà wolù pon kon kappon yamùk talumattàik Katù uya Tùmu yeunokoppù pen màlà, tùse tok wepùikattà toppe làkku yai.

John 8:44

“Àkàipùnù kon Makui, ponalok kon amyamlo, molopai iche iwettok ku'nàinan. Iweppyattàppù motapai wànài pe iwessak màlà molopai kasei pe, masapùla ailon pùla iwechi màlà, yau. Kasei pe iichelupa yau iteselu màlà, masapùla kasei mùkkàlà molopai kasei kàipùnù.

Yeunossak kon Wotokoyi 13:10

Molopai wateppù ya “Devil mumu àmàlà! Tamù'nawàlà wakù ton iteyaton àmàlà. Molopai àli ennakantok ke iwanùssak àmàlà molopai Katù wettok ailon pe lattàiche tùwessen àmàlà kasei pe!

Romans 1:22

Pukkek pe tiuchittusan tùse pakko ton.

1 Corinthians 1:27

Tùse Katù uya yà'là pe pùla tùttusen wolù yau yanùmùppù màlà pukkeppe tùwessan wekuli'matoppe, molopai attu'mùla tùttusen wolù yau yanùmùppù màlà meluntà ton wekuli'matoppe.

1 Corinthians 2:14

Akkwalù pùn kappon mùkkàlà lepantok kon yamùk Katù Yakkwalù winàpaino yanùnnài pen, masapùla yà'là pe pùla màlà yamùk wechi tùpona pàk. Molopai màlà yamùk ittu ya pùla iwechi màlà masapùla Akkwalù winà neken tùttusan pe iwechi pàk.

1 Corinthians 3:19

Masapùla pukkeppe sàlà wolù nùttu màlà yà'làlà pen Katù yenu yau. Iwe'menukasak, “Katù mùkkàlà, pukkek yachinài ittu tùuya pe tukaik iwettok yau,” tawon kasa. {Job 5.13}

1 Corinthians 3:3

Wolù ponalok kon kasa lùppù. Masapùla àkùlùmàluntok kon molopai àusàlàmatok kon wechi àkklottau'nokon pàk. Màlà uya ken na' sàlà wolù yawon kappon yamùk pe ewechi kon ànkuppai ewettok kon yawàlà yekama pen màlà?

2 Corinthians 1:12

Sàlà màlà ina yauchinapanài. Ina usenumenkatok nekamayan tamù'nawolon ina nùkupùppù sàlà wolù yau, ailon pe wakù pe ina wechippù ànù'là tennakaik pùla, ina welaikatok ewinàkàik nokon yau kulu. Ina wessak man enpen Katù pàk ina pùikattàtoppe ya, sàlà non pon yapàiketù ke pùla.

2 Corinthians 11:3

Usenalippayaik àkài uya Eve yennakappù kaseipe ennakantok tùuya ke kasa làma, tamù'nawàlà ailon molopai esuken ewettùtok kon Christ yemyak winàpai eusenumenkatok kon lattà yeselùkek iwechi pàk.

Philippians 3:19

Tok utà màlà mattantok yak. Masapùla eke pe ata'lettàpai tok wettok màlà tok katùyi. Tùwekuli'matok kon yek làkku pàk tùutapulàsan mùkyamlo. Molopai sàlà non pon neken yà'là yamùk là, pàk tùusenumenkasan.

2 Thessalonians 2:9

Katù yeyaton non yesak uyàpù màlà Settan meluntàlù yau, molopai tamù'nawolon yà'là yekkwa ton nà tùkkussan yek pen kupù ya màlà, enumenkannan, molopai enalippan nan. Tùse, ennakantok pe iwotokoyi wechi màlà.

1 Timothy 4:1

Wakù Akkwalù uya yekamasak man ailon pe, tùulon kon kappon yamùk uya ailon tetok nonka pata wenukapù peiwa; ailon ton pen, kasei ton akkwalù maimu yawàlà tok wechi màlà molopai àliton akkwalù yamùk uya enupantok maimu yawàlà tok wechi màlà.

James 1:17

Tamù'nawolon wakù iwalai lepantok màlà tùuyàssen epùn poi; Katù winàpai, tamù'nawolon pata weyu yamùk kau nai'nùk màlà inkonekappù. Tùwemyakammasen pen, màlà tùse pùla tùwelattà yau ewalupà ne'nài pen.

James 1:5

Tùse ànù'là àkklottau'nokon nai'nùk wechi pukkek pùla yau, nàpùlemaik, itùnài tùpyak yekamappoi; masapùla Katù mùkkàlà lepanài tùusetakkaik pùla molopai tùusàulàmaik pùla tamù'nawolon kon pàk.

James 3:17

Tùse pukkeppe we'nàtok màlà epùn poino, wapiyalok kulu wakù esukenan; ewan wàlàkattok, tenpe àsà pe pùla we'nàtok tùwanmùla, alomùla, molopai echitonpa pe ku'nài; usentupantok ke iwanùssak màlà, molopai wakù eselu ne'nài; tamù'nawolon kon namatok e'kkaichalà yenpoikanài molopai ennakanài pùn.

Jude 1:19

Pùsamloichi mùkyamlo wepantapà'nàtok ku'nàinan, kappon yeselu neken ànkuppai tùwessan, Wakù Akkwalù pùnon.

Revelation 12:9

Eke ulupelu lùmà yenu'mappù màlà, mùkkàlà penalok àkài, Makui wapùla Settan itesek, tamù'nawolon kon kappon yamùk non pon kon yennakanàippù. Yenu'mappù màlà non pona tamù'nawàlà itinchelùyi yamùk pokonpe.

Revelation 2:24

“Tùse amyamlo nàlà tok tonpa yamùk Thyatira pon kon uya àli enupantok ya kupùppù pùla man, ‘Settan nùkupù tonantawon tukaik tùulon kon nesatù pàk eusenupasak kon pùla man. Tùulon tùpàlikasen tùlù uya tu'ma àpona'nokon pen màlà.

Revelation 9:11

Eke kin yesappe tok wechippù tepoi'nokon, mùkkàlà inchelù i'nauwon iteuta yennài. Hebrew maimu yau itesek màlà Abaddon, Greek maimu yau Apollyon, (“Mattanù'nài” teya pe iwechi).