Hebrews 9:12 - Patamuna New Testament Revised

¹² Itak iwewomùppù màlà tùmùnù winà. Kaapala mùnù molopai paka mule mùnù winà pùla. Tùse iwewomùppù màlà Wakù Kulu Patassek yak tewin itekkwa neken tamù'nawolon kon ponaloppe, tùmàlà pe là tàwàlàlà wepùikattàntok yepoloppù ya màlà kùponalok kon pe.

Hebrews 9:12 ပူးပေါင်းရင်းမြစ်များ

Mark 3:29

Tùse àli pe nùselupayai'nàk Wakù Akkwalù winàkàik, pàk Katù usentupa pen màlà. Tùse tùmakuyi yau iwechi tàwàlàlà,” teppù Jesus uya.

Luke 1:68

“Itepulu yapulàpai'nokon man, Israel Katùyi! Masapùla iyàssak man kappon yamùk tùponalok kon pùikattàse.

Yeunossak kon Wotokoyi 20:28

Amyamlo pe esentàk kon molopai tamù'nawàlà kalinilu yamùk anmainanpa kon pe Wakù Akkwalù nùtùlùssan yentàk kon. Kalinilu yesan kasa, Katù sochiyi tawon kon yewettàk kon, tùponaloppe ine'massan tùmu mùnù yai.

Ephesians 1:7

Masapùla Christ mùnù yai wepùikattànsak nokon màlà, kùmakuyi kon pàk usentupansak. Eke kulu màlà wakù pe we'nàtok Katù winàpaino,

Colossians 1:14

Mùkkàlà uya mokkansak kon nai'nùk molopai kùmakuyi kon pàk usentupansak màlà.

1 Thessalonians 1:10

Molopai Imu, Jesus Christ uyàpù epùn poi màmuku kon pàk ewechi kon, inwuluukappù lùppù weli'nàtok yapai, molopai pùikattànài Katù we'naikatok tùuyàpù woton winàpai pàk tùuselupasan.

Titus 2:14

Iwettùlùppù màlà kùponalok kon pe, kùpùikattàse tamù'nawolon àli winàpai molopai kùkonekase esukenan kon kappon yamùk tùponalok kon pe kulu neken molopai wakù ànkuppai nokon kulu pe neken.

Hebrews 1:3

Katù Mumu mùkkàlà tùulenpansen Katù yakkwayi ke. Katù yenpoika ya tamù'nawàlà, molopai tamù'nawolon tùnkonekappù yachinài mùkkàlà apàikkek tùmaimu ke. Wakù pe, tok uya àli kuttok yapai kappon yamùk kupù tùpo, iweleutappù màlà epùn po wakù kulu patassek Eke kulu Katù laitanù winon yak.

Hebrews 10:19

Màlàpàk, utonpa yamùk, utàn'nokon uchi màlà Katù wettok itau tak, Jesus mùnù winà.

Hebrews 10:4

Masapùla walawok paaka mùnù molopai kaapala mùnù uya àli kuttok winàpai pùikattàn yeselùkek pùla iwechippù.

Hebrews 13:12

Màlàpàk Jesus wettalumattàppù nàlà màlà pata yena po, esuken kappon yamùk konekatoppe tùuya tùmùnù yai.

Hebrews 5:9

Ikasa kulu Jesus wekonekasak pàk, mùkyamlo tùmaimu yawolon kon nà pùikattà ya màlà tàwàlàlà.

Hebrews 7:27

Tùulon kon eketon kulu paatele yamùk walai pen mùkkàlà, iwotokoyi pen màlà kamo wànà wei kaichalà, wapiya tùmakuyi ponaloppe molopai kappon yamùk makuyi ponaloppe. Pùsàlà wettùlùppù màlà tewin itekkwa tamù'nawolon kon ponaloppe.

Hebrews 9:13

Kaapala mùnù molopai walawok paka mùnù molopai ulichan paka mule pottàsak ulumlàppàyi tùlùppù màlà kappon yamùk polo, wekolùkan toppe uselumantok walai yapai.

Hebrews 9:14

Màlà yentai Christ mùnù wechi màlà apàikkeppe! Tàwàlàlà tùwemassen Wakù Akkwalù yai iwettùlùppù màlà wakù kulu imattakù pùn tùtùsen pe Katù yemyak, kùmakuyi kon yepeppe. Imùnù uya usenumenkantok kù'nokon ma màlà wakù pe tapulàsen pen wotoko winàpai, tàwàlàlà tùwemassen Katù ponaloppe we'wotokoman toppe.

Hebrews 9:15

Sàlà wenai Christ wechi màlà Katù molopai kappon tawonnan yakkletau tùwessen pe, emennak ikupù pàk Katù wekkuttok yau. Mùkkyamlo ikà'masak kon uya tàwàlàlà pùlemantok yepotoppe, ikupù tùuya teppù Katù uya lùppù. Sàlà wekkupùppù màlà, masapùla Jesus welikùppù màlà wapiyalok ikupù pàk Katù wekkupùppù lùppù yo'no kappon yamuk nùkupùppù tok makuyi winàpai tok pùikattàtoppe tùuya.

Hebrews 9:19

Moses uya tamù'nawolon enupantok Law yau imenukasak yekamappù màlà kappon yamùk pàk. Màlàyau nen uchi paka munkà yamùk mùnù yanùmùppù ya màlà tuna pokonpe, molopai Enupantok yapon yappasa'mappù ya molopai kappon yamùk nàlà. Sàlà kupùppù ya màlà yei muleppù panta “hyssop” itesek molopai ichuweyu kalinilu pùpok ke yaulonsak yei pàk, ke.

Hebrews 9:7

Tùse eke kulu neken paatele utàpàtùppù màlà yakon patassek yak, molopai tewin itekkwa tùutàsen pe iwechippù kilichimochi yau, mùn pùla tùwewonsen pe pùla iwechippù. Kamo mùnù yanài pe iwechippù tùntùlù pe tùmakuyi ponaloppe molopai kappon yamùk makuyi ittui'ma pùla tok nùkupùppù ponaloppe.

Revelation 1:5

Molopai màlà wechi màlà Jesus Christ winàpaino pe. Ailon pe tùuselupasen Katù pàk, mùkkàlà wapiya iwuluukasak lùppù weli'nàtok yapai. Non po kin pe tùwessan yepulu pe nàlà nai'nùk. Kù'nùnmanài'nokon mùkkàlà, molopai tùmùnù winà kùpùikattàsak kon ya màlà kùmakuyi kon yapai.

Revelation 5:9

Tok uselenpappù emennak elen pàk: “Wakù pe messaik sàlà kaleta yekkwa'nài yeppe, molopai yachittok yamùk ikkwà'nài pe. Masapùla àwànàppù màlà, molopai àmùnù winà kappon yamùk ye'mappù auya man Katù ponaloppe, tamù'nawolon kon kappon yamùk kùlottapai, tùpatalo'nan kon imaimu, tùpatalo'nan kon ikkok, molopai tùpatalo'nan kon kappon yamùk.