Galatians 3:2 - Patamuna New Testament Revised

² Sàlà tewinannà ànùttupai wessaik ewinàpai'nokon. Wakù Akkwalùichi mepotantàu law yawàlà ewechi kon winà, wapùla ka' Itekale yeta molopai ailon te auya'nokon winà lù?

Galatians 3:2 ပူးပေါင်းရင်းမြစ်များ

Yeunossak kon Wotokoyi 15:8

Molopai Katù, kappon yamùk yewan ittunài uya, tok yanùnsak tùuya yenpoikappù, Wakù Akkwalù ke tok tùlepase, ikupùppù tùuya kùpàkù'nokon kasa làma.

Yeunossak kon Wotokoyi 2:38

Peter uya yeikuppù “Elattàtàk kon amyamlo tamù'nawàlà amakuyi kon winàpai, molopai esenpataukatàk kon Jesus Christ yesek yai, màlà yau amakuyi kon pàk usentuppan màlà. Molopai Wakù Akkwalù, Katù uya lepantok yepolo auya'nokon màlà,”

Yeunossak kon Wotokoyi 8:15

Tùwelepansak kon yau, tok wàpùlemappù ailon tawonnan pona, Wakù Akkwalù yepotoppe tok uya.

Romans 1:17

Masapùla Wakù Itekale màlà Katù uya kappon yamùk yanùmù ikasa tùpokon pe yekamanài. Ailon tetok yawolon neken màlà, iwepyattàtok motapai iwenukapù ponalà. Katù Maimu uya, “Mùkkàlà iwekonekasak lùppù ikasa Katù pokonpe ailon tetok yai wemapù màlà,” te kasa. {Hab 2.4}

1 Corinthians 9:21

Màlà kasa làma Jew yamùk pen kasa tùwemassen Iulà, Law pùnon wemapù kasa, tok nettoppe uya Christ piyak. Sàlà uya Katù Law maimu yawàlà pùla wechi te pen màlà, masapùla Christ law yo'no wechi màlà.

2 Corinthians 11:4

Masapùla ànù'là uyàppù apyakù'nokon molopai tùpatalon Jesus yekale ina nekamappù walai pen yekama tok uya yau, wapùla tùpatalon akkwalù enepoloppù kon walai pen yepolo auya'nokon, wapùla tùpatalon Itekale ananùmùppù kon lùppù walai pen yannùmù auya'nokon yau, sa'man pe pùla yak mettùyatàik.

Galatians 3:14

Pùikattànsak ya pùlemantok Abraham piyak itùsak lùppù uyàttoppe Jew yamùk pen piyak Christ Jesus winà, molopai kùmyamlo uya Akkwalù itùlù màlà teppù lùppù yanùntoppe ailon tetok yai.

Galatians 3:3

Atta ken uchi pakko pe kulu ewechi kon màlà! Akkwalù pokonpe ewepyattà kon tùpo na' eyiwalà'nokon kappon yeselu yau yenuka'nùpùiche ewechi kon màlà?

Galatians 3:5

Katù na' mùkkàlà elepanài'nokon Takkwalù ke molopai eke ton tensan yekkwa pen ku'nài àkklottau'nokon. Masapùla law yawàlà ewechi kon pàk, wa pùla ka' Itekale yetasak auya'nokon pàk ailon tesak auya'nolon pàk lù?

Hebrews 2:4

Katù uya tùmàlà pe, ailon pe sàlà itekale wechi ittutok ipàkàlà kupùppù màlà, tùpatalo'nan tensen yekkwa pen molopai enumenkannan kupù tùuya winà. Molopai Wakù Akkwalù winàpaino lepantok yamùk yekamùppù ya màlà teselu yawàlà.

Hebrews 4:2

Wakù Itekale yetappù'nokon nàlà man, tok uya yetappù kasa làma. Itekale yetappù tok uya tùse yà'là pe pùla tok pona iwechippù màlà. Masapùla mùkyamlo yetannan nùssan uya ailon tesak pùla iwechi pàk.

Hebrews 6:4

Masapùla atta ken mùkyamlo àli kuttok yak iwennapposak kon wenappo tu'ma Katù winàkàik? Akkwa yene tùpo, Epùn poino lepantok yanùnnàinan nùssan pe echii'ma molopai Wakù Akkwalù pùkkù pe, yau tùwechi kon tùpo.

1 Peter 1:12

Katù uya yenpoikappù màlà pùsamlo pàk tok wotokoyi wechi tok ponaloppe pùla, tùse àponalok kon pe, tok uselupappù ailon pàk màlà enetappù kon kasa. Wakù Itekale yekamannan ichelupasak kon Wakù Akkwalù meluntàlù yeunossak lùppù epùn poi winà uya, sàlà yamùk ailon ton yekamappù àpàkù'nokon. Sàlà yamùk uchi màlà inchelù yamùk lànen wettok ànùttupai.