Colossians 2:15 - Patamuna New Testament Revised

¹⁵ Molopai màlà pulusuk po Christ uya itepulu ton àli akkwalù yamùk molopai apàikkek ton yentaikappù. Tok kupùppù ya tensan pe ayupo tok yentai tùwechi ke.

Colossians 2:15 ပူးပေါင်းရင်းမြစ်များ

Matthew 12:29

“Ànù'là wewontok meluntà kàyik yùwùk tùkkwàsse itemamin yamùk yase pùla iwechi màlà, tùse meluntà kàyik yaulonpàssak neken tùuya wapiya yau. Màlà yattai làkku itùwùk tawon pàk ilapuma ya màlà.

Luke 10:18

Jesus uya tok yeikuppù, “Settan wepuka tentai pata wekamlippù kasa Epùn poi.

Luke 11:22

Tùse meluntà iwa kàyik uya yachisak molopai yentaikasak yau, tamù'nawolon iple enpen ipàk iwettok yalà ya màlà, molopai tùnonamùppù yekamù ya.

John 16:11

Tok usenumenkatok ikasa pùla man talumattàntok pàk, masapùla sàlà wolù yepulu talumattàsak pàk.

John 19:30

Malalà yonpa tùpo Jesus uya, “Eichilà nenukappàssan,” teppù. Molopai tùppai peimappù ya molopai iwelikùppù.

1 Corinthians 15:24

Molopai nen uchi pata wenukattok uyàpù màlà, Katù Tùkàipùnù yemyak itepulu pe we'nàtok tùlù ya, tamù'nawolon epulu ton molopai apàikek ton molopai meluntà ton mattanùpùppù tùuya ye'mappùtak.

2 Corinthians 2:14

Tùse tàwà tenki tetok Katù pàk molo nechii! Masapùla Katù uya ina yalà màlà entaikantok yak Christ yai. Katù uya ina yai tekale yeunoko màttawàlà tùkà'nùnsen kà'nùmù i'nailàlà kasa.

2 Corinthians 4:4

Sàlà wolù yepulu uya ailon tawonnan pen usenumenkatok yewalumankasak màlà. Wakù Itekale yakkwayi Christ winàpaino yene tok uya tukaik, mùkkàlà uchi Katù usentok.

Ephesians 3:10

sàlà pe, sochi tawon kon yai, Katù pukketù tùpatalo'nan yekamattoppe inchelù yamùk pàk itepulu ton molopai apàikketton epùn yawolon kon pàk.

Ephesians 4:8

Màlàpàk Katù Maimu uya, “Iwenukuppù kakàik tukkan kon yachichak kon yalàppù ya tùpokon pe. Lepantok tùlùppù ya kappon yamùk yemyak,” te kasa.

Ephesians 6:12

Masapùla wepanta'man nokon kappon yamùk pokonpe pen sàlà, tùse àli ton akkwalù meluntàlù kak yawolon kon pokonpe, itepulu yamùk, apàikketton, molopai sàlà ewalupà yawon kon itepulu yamùk tensan pen meluntàlù pokonpe.

Colossians 1:16

Masapùla mùkkàlà winà Katù uya tamù'nawolon epùn pon molopai non pon konekappù màlà, tensan molopai tensan pen, akkwalù yamùk meluntàlù nàlà, itepulu yamùk, molopai apàikkek ton. Katù uya màlà tamù'nawolon konekappù iwinà molopai iponaloppe.

Colossians 2:10

Màlàpàk tamù'nawolon Christ winàpaino yesappe ewechi kon màlà, iponaloppe ewechi kon pàk. Eke kulu mùkkàlà itepulu akkwalù yamùk yentaino molopai apàikkeppe we'nàtok yepoino.

Hebrews 2:14

Kùmyamlo kappon yamùk wechi màlà tùpun ke molopai tùmùnù ke, màlàpàk Jesus wenappù nàlà màlà kùkasa'nokon. Iwelikùppù màlà Makui mattanùttoppe tùuya, mùkkàlà, weli'nàtok meluntàlù yesak.

Revelation 12:9

Eke ulupelu lùmà yenu'mappù màlà, mùkkàlà penalok àkài, Makui wapùla Settan itesek, tamù'nawolon kon kappon yamùk non pon kon yennakanàippù. Yenu'mappù màlà non pona tamù'nawàlà itinchelùyi yamùk pokonpe.

Revelation 20:10

Màlàyau Makui tok yennakanàippù, yenu'mappù màlà eke kulu apok molopai kulupala kasa tùkà'nùnsen yak, àsà ene molopai iwalai pen itekale yekamanàippù tawonnan yenu'mappù yak, molopai tok talumattà màlà weinai molopai ewalupàttau tàwàlàlà molopai tàwàlàlà.