Colossians 1:15 - Patamuna New Testament Revised

¹⁵ Christ wechi màlà ànùk yekkwa pe Katù tùusensen pen wechi yenpoikanài pe. Iwentusak lùppù wapiyalok pe, tamù'nawolon kon ikonekasak kon yentaino mùkkàlà.

Colossians 1:15 ပူးပေါင်းရင်းမြစ်များ

John 1:1

Iwepyattà pe Mayin wechippù màlà, molopai Mayin wechippù Katù piyau, molopai Mayin wechippù Katù pe.

John 1:14

Mayin wenappù màlà kappon pe, kùklottau'nokon iwemapùppù. Ailon, wakù pe iwettok yeneppù ina uya, mùkkàlà neken tewinan yapulàtok, iyàssak lùppù tùkàipùnù winàpai wakù pe tùwettok molopai ailon pokonpe.

John 1:18

Ànùk uya là Katù yensak pùla man. Tùse Imu mùkkàlà tewinan neken tùkàipùnù yenau nai'nùk uya yenpoikappù màlà ittutoppe.

John 14:9

Jesus uya yeikuppù, “Philip, apyau'nokon wessa'man tachin pe, tùse ken na' uchi uyittu auya pùla lùppù iwechi màlà? Ànù'là uyennàippù uya Ukàipùnù yensak màlà. Tùse yà'là pe iwechi pàk màlà, ‘Àkàipùnù yenpoikakà ina uya yentoppe,’ te auya?

John 15:24

Ànù'là nùkupù pen kusak uya tok kùlottau pùla iwechi yau tùmakuyi ke echii'ma àli pe tok uchittuppù pen sàlà eppaino. Tùse eke ton wotoko yamùk kupù uya yensak tok uya man, walà tùse tewanma kon pe tok uya ukupù molopai Ukàipùnù nàlà.

John 3:16

Tù'nùn pe kulu kappon yamùk sàlà wolù pon kon kupù tùuya pàk Katù uya tewinan tù'nùn kulu tùmu tùlùppù ànù'là ailon tawon ipàk umatta pen, tùse tàwàlàlà iwemapù.

Romans 8:29

Masapùla Katù uya màlà tùnanùmù woton kon ittukassak pena, tùmu kasa nen uchi tok wettoppe, ipùkkù pe tok wena wettoppe, Tùmu wettoppe wapiyaloppe tukkan kon tùtonpa yamùk kùlottau.

2 Corinthians 4:4

Sàlà wolù yepulu uya ailon tawonnan pen usenumenkatok yewalumankasak màlà. Wakù Itekale yakkwayi Christ winàpaino yene tok uya tukaik, mùkkàlà uchi Katù usentok.

2 Corinthians 4:6

Masapùla Katù uya, “Tàwà akkwa nùlenpamùi ewalupàttapai!” teppù, {Gen 1.3} mùkkàlà lùppù Katù uya takkwayi lenpankasak man kùyewan kon yau, Katù namatok yakkwayi ittutok yakkwayi nettoppe tùuya kùpyakù'nokon, Christ yenpatau ilenpamù.

Philippians 2:6

Katù là mùkkàlà tàwàlà, tùse Katù pokonpe ekkaichalà tùwenaiche iwechippù pen.

Colossians 1:13

Masapùla kùpùikattàppù kon ya ewalupà meluntàlù winàpai molopai ne'nàsak kon ya itepulu pe tù'nùn Tùmu wettok yak pàk.

1 Timothy 1:17

Tàwàlàlà Kin pe tùwessen, tùumatta woton pen molopai yensak pen, tewinan Katù piyak, namantok molopai apulàntok tùlù màlà tàwàlà molopai tàwàlàlà! Emen.

1 Timothy 6:16

Mùkkàlà neken tewinan tàwàlàlà tùwemassen. Tùwemassen mùkkàlà akkwa ànù'là nepolo itenpatau pen. Ànù'là uya yensak pùla iwechi màlà, molopai ànù'là uya yene pen màlà. Tàwà mùkkàlà ponaloppe namantok molopai tàwàlàlà apàikkek pe we'nàtok nechii! Emen.

Hebrews 1:3

Katù Mumu mùkkàlà tùulenpansen Katù yakkwayi ke. Katù yenpoika ya tamù'nawàlà, molopai tamù'nawolon tùnkonekappù yachinài mùkkàlà apàikkek tùmaimu ke. Wakù pe, tok uya àli kuttok yapai kappon yamùk kupù tùpo, iweleutappù màlà epùn po wakù kulu patassek Eke kulu Katù laitanù winon yak.

Hebrews 1:6

Wapiya iwentusak lùppù Tùmu yeunoko pàk Katù wekkupù non pona yau, “Tàwà tamù'nawolon kon Katù inchelùyi yamùk nùnamai,” teppù ya.

Hebrews 11:27

Ailon tetok winà Moses uya Egypt nàmàppù tùusenalippaik pùla kin we'naikatok pàk, masapùla tensen pen Katù yensak tùuya pàk sa'man pàlikappù ya.

Revelation 3:14

“ Laodicea pon Sochi inchelùyi piyak sàlà imenukakà: “Sàlàichi màlà itekale mùkkàlà Emen winàpaino. Ailon molopai ailon yekamanài, tamù'nawolon Katù nùkonekasan wepyattàtok.”