5 polopon neken Katù yapulàtok yeselu kupù tok uya màlà, tùse iwalai kulu imeluntàlù nulunpa tok uya màlà. Pùsamlo kappon yamùk winàpai ekkà.
“Tùttuse ettàk kon, ailon pen itekale yenpoikannan pàk. Tok uyàpù màlà apyakù'nokon kalinilu kasa là tok usene màlà polopo, tùse àsà ton kamo yamùk kasa tok wechi màlà.
Màlàyau mule yamùk kasa welaikan kùsettakù'nokon. Kappon yamùk ennakantakù'nokon ailon pen pàk enupan tùuya'nokon ke, yà'là yekkwa ton nà enupantok tùuya'nokon ke aimelunpantak tok, meluntà assetun uya tàntànman kasa.
Molo ànù'là wechi màlà itekale, ina neunossai'nùk sàlà kaleta yau, maimu yawàlà tùwechi woton pen. Tùse meneik, sàlà kasa iwechi yau, tàwà nechii ipokonpe kechii, iwekkuli'matoppe.
Itepulu Jesus Christ yesek yau meluntà pe eyelupayatàu ina, ina tonpa yamùk, mùkyamlo emya'neppe nai'nan nùk kùtonpa yamùk kùlottau kettàu, eyenupatok kon ina uya yawàlà pùla nai'nannùk kùlottau.
Kappon yamùk mùkyamlo italumayiichan, ailon ton pen nà panton yekamannan, tùse màlà yamùk uya enupantok yawàlà kechii, Katù uya neken enupantok yawàlà ewechi pa esenupakà.
Ànù'là yenupa aitunpe utàntok pe wapùla wenkalunàtok màlà wakù molopai tepeppù kenan, tùse akkwalù yenupatok Katù wettok iche kasa màlà wakùiwa tamù'nawolon yau, masapùla wema'nàtok sàlà pe molopai ewanawolok yau tàwàlàlà wema'nàtok ke lepan tùuya tesak ya pàk.
Tùse ànù'là uya tùtonpa mainanpa pùla iwechi yau, tùtonpa kulu, tùsan, tùkàipùnù winàpaino, ailon yawàlà pùla iwessak màlà yetapàssak ya molopai ailon tawon pen yentai kulu àli pe iwechi màlà.
Molopai mùkyamlo usàulàma echipalà uya tok usenumenkatok mattanùssak màlà, molopai ailon pùnon mùkyamlo. Tukke mamin yesappe wenantok iwinà pe sàlà enupantok maimu yawàlà we'nà wechi pe yekama tok uya màlà.
Àli pe molopai pakko pe uselupantok winàpai ekkukkà, kappon yamùk yenpenài neken màlà mei lùiwa Katù winàpai.
Tùse pakko pe molopai ittunài pe pùla usàulàmantok winàpai ekkukà, mùttuyaik iwenukapù we'naikantok yau.
Tok uya, “Katù ittunài Iulà,” te màlà; tùse tok welaikatok uya yenpoika pùla iwechi màlà. Akùlù ton mùkyamlo, molopai mayin yawolon kon pen, wakù ku'nàinan pe tok wechi pùla iwechi.
Mùkkàlà wepantakantok kussai'nùk yekamappokà asakitekkwa là molopai nen uchi yà'làlà kùkai ipàk, tàwà nechii.