Eke soicha yamùk yepulu uyàpùppù molopai Paul yachippù ya, molopai asa'là chin ke yaulonpàttoppe ikupùppù ya, “Ànùk ken pùsàlà kàyik molopai yà'là kussak ya nai?” tukaik tok yekamappoppù ya.
Uyemyatù ke sàlà tùmenukayaik: Iulà Paul,“Wakù pe na' messatàu?” nùkayan. Patikichi tau uchi tàwà wechi mùttutàik. Wakù pe we'nàtok Katù winàpaino apyau'nokon nechii.
Màlà yattai nàlà ina pona màpùlematàik ina pùikattàtoppe ya. Molopai ina lepatoppe ya Tekale yekamatok ina uya yattai ke, Christ winàpaino Wakù Itekale pena ittusak lùppù pen yekamatoppe ina uya. Màlà pàkànsau sàlà patikichi tau wechi nai'nùk.
Eyeselu kon wakù pe nechii Katù ittunnan pen kùlottau, àmottùnpa kon tok uya yau, àli kussan tok te tok uya yau, wakù eyeselu kon yentoppe tok uya, molopai nen uchi Katù yapulàtoppe tok uya iiyàpù Weyu yattai.
Ewettalumattà kon yau, kappon wànài pe là ewechi kon pàk ewettalumattà kon pe kùsettak, wapùla amappe ewechi kon pàk, wapùla àli ku'nài pe ewechi kon pàk, wapùla tùulon kon nùkupù ittuiche ewechi kon pàk.