2 Corinthians 7:1 - Patamuna New Testament Revised

¹ Sàlà yamùk Katù uya ikupù tùuya tetok wechi màlà kùponalok kon pe, utonpa yamùk! Màlàpàk uchi esuken wenanpai'nokon makui pùla, tamù'nawolon yà'làlà àli pe nai'nùk kupù yeleutanùpù winà, molopai yà'làlà kùyesak kon wapùla kùyakkwalù kon ku'nài àli pe nonkapai'nokon. Màlàpàk uchi tamù'nawàlà wettùn nokon sàlà Katù yemyak masapùla inama pàk.

2 Corinthians 7:1 ပူးပေါင်းရင်းမြစ်များ

Matthew 12:33

“Wakù meluntà yei yesappe ewechi kon màlà wakù itepelu yepolo kon pa. Italumayippù yei yesappe ewechi kon yau àli itepelu yepolo auya'nokon màlà, masapùla yei màlà tùttusen itepelu winà.

Matthew 5:48

Màlàpàk wakù peichi ettàk kon, àkàipùnù kon epùn yau nai'nùk wechi wakù pe kasa.” teppù Jesus uya tok pàk.

Matthew 5:8

“Tùutauchinpasan mùkyamlo esukenan itewan ton. Katù yene tok uya màlà!

Yeunossak kon Wotokoyi 9:31

Màlàyau sàlà kasa iwechippù màlà tamù'nawàlà Judea yawàlà, Galilee molopai Samaria yawolon kon sochi yamùk wechippù wàlàkka'nàtok yau. Meluntà pe tok wenappù molopai tukke tok wenappù, Wakù Akkwalù uya tùpùikattàse, tùwemapùi'ma nokon Itepulu Jesus namatok yau.

Romans 5:20

Law tùlùppù màlà iwalai pen kuttok wekattoppe. Tùse àli kuttok wekassak yau, Katù wettok wakù pe wekatù màlà eke peiwa kulu.

1 Corinthians 6:20

Ye'masak kon amyamlo epekkeppe. Màlàpàk uchi àpun kon ke Katù inamatàk kon.

2 Corinthians 1:20

Masapùla Christ uchi mùkkàlà “Ewaik” tetok Katù uya ikupù tùuya tetok yau. Sàlà wenai uchi Jesus Christ yau “Emen” te màlà, Katù yapulàtok iwinà pe.

Ephesians 2:3

Tamù'nawolon kon kùmyamlo wechippù tok kasa màlà, àli pe usenumenkantok kon wettok iche kupùppù'nokon kùwakùli kon pe. Tùulon kon kasa, tamù'nawàlà kùmyamlo nàlà wechippù màlà Katù we'nàikatok yo'no.

1 Thessalonians 3:13

Sàlà kasa eyewan kon koneka ya màlà meluntà pe, wakù pe, Katù namanài pe, esuken ewechi kon màlà Kùkatùyi kon molopai Kùkàipùnù kon yemloto po, Kùyepulu kon Jesus uyàpù tamù'nawolon kon tùponalok kon pokonpe yau.

1 Thessalonians 4:7

Àli yau là wema’nàtok kon pe Katù uya kùkà'ma kon pùn tùse wakù pe, esuken Katù tùnamaik we’nàtok kon pe kùkà’massak kon ya màlà.

1 Thessalonians 5:23

Tàwà Katù echitonpa pe we'nàtok ke lepanài àkonekai'nokon tamù'nawàlà tùponalok pe, esuken, wakù pe, tamù'nawàlà iwettùsak Katù piyak pe, tàwà ayakkwalù kon, eyesak kon, eyewan kon eusenumenkatok kon, nechii iwalai pen nà pùla, Kùyepulu kon Jesus Christ uyàttok yattai.

Hebrews 12:23

Molopai sochi, wapiya iwentusak lùppù Christ ponalok iwepilichak kon, pùn yau itesek imenukasak kon piyak. Katù piyak àuyàssak kon, tamù'nawolon kon Ittunài piyak, molopai wakù ton iwalai non kappon yamùk yakkwalù konekasak esuken piyak.

Hebrews 12:28

Màlàpàk uchi tenki tepai'nokon Katù pàk, masapùla tùutattù'masen pen Katù wettok itepulu pe yepolo'nokon pàk. Màlà yai Katù yapulàpai'nokon man iche iwettok yawàlà, namantok pokonpe molopai usenalipantok pokonpe.

Hebrews 4:1

Màlàpàk uchi wàlàkka'nà patassek yak wewonnàtoppe Katù nekamappù lùppù, walùppù man. Usenalipanpai'nokon uchi, ànù'là àkklottawon kon nàmà kùye'mappù tau tukaik.

Hebrews 6:9

Utonpa yamùk, sàlà kasa ina nùselupayan, wakù pe nai'nùk ken kuppù tok uya ko, màlà yamùk Katù nùpùikattàssan nùkupù te tùuya'nokon pàk.

James 4:8

Àitàk kon Katù piyak mei pùla molopai iyàpù màlà mei pùla apyakù'nokon. Wakù pe eyemyatà kon ikuttàk kon, asa'lon ichenumenkatok kon kappon yamùk! Eyewan kon ikukatàk kon tùusennakasan!

1 Peter 1:15

Tùse làkku emattàk kon tamù'nawolon ànkupù kon yau, Katù àkà'manàippù'nokon wechi wakù pe esuken kasa làma wakù pe.

1 Peter 1:17

“Ina Kàipùnù” tawonnan pe ewechi kon, tamù'nawolon kon kappon yamùk pàk, “suwa messaik” tawon, tok nùkupùppù yawàlà ekkaichalà pàk; uchi emattàk kon talà sàlà non po inamatok molopai yapulàtok auya'nokon yau.

1 Peter 1:22

Masapùlaichi esuken ewenasak kon màlà ailon yawàlà ewechi kon winà, ailon uchi'nùnmantok yesappe ewechi kon tùulon kon ailon tawonan pàk pàk, echi'nùnmatàk kon eke pe tamù'nawàlà eyewan kon ke.

1 Peter 2:11

Apawanattàyatàu Iulà, utonpa yamùk, kakklan yamùk echii'ma sàlà non po, àli ànkuppai we'nàtok yemyak kettùtàu, màlà tùwepanta'ma pàk nai'nùk tàwàlà ayakkwalù kon winàkàik.

1 Peter 5:10

Katù tamù'nawolon wakù pe we'nàtok yesak, mùkkàlà uya àkà'masak kon màlà tàwàlàlà takkwayi pùkkù pe ewechi kon pa Jesus Christ yau. Ewettalumattàsak kon malalà tùpo, mùkkàlà uya àkoneka kon màlà ikasa, meluntà pe kulu, molopai àtùlù kon màlà wakù pata tùutamasen pen pona.

1 John 1:7

Tùse wema'nà akkwa yau, akkwa yau iwechi nai'nùk kasa yau, echitonpa pe we'nà màlà kùtonpa pokonpe, molopai Jesus Christ, Imu, mùnù uya kùkuka kon màlà tamù'nawàlà kùmakuyi kon winàpai.

1 John 1:9

Tùse Katù pàk kùmakuyi kon yekama yau, ailon mùkkàlà molopai iwalai ku'nài. Màlàpàk kùmakuyi kon pàk ichentupa màlà kùpàkù'nokon molopai wakù pe kùma kon ya màlà tamù'nawolon àli winàpai.

1 John 3:3

Tamù'nawolon kon sàlà màmu'nàinan Christ yau tùwekkussan esuken, Christ wechi esuken kasa.