2 Corinthians 2:17 - Patamuna New Testament Revised

¹⁷ Tukkan kon tùulon kon kappon yamùk walai non pen ina mùkyamlo Katù Maimu yapulànnan temamin molopai iche tùwettok kon yepotok tùuya'nokon iwinà pe neken, tùse Katù uya ina yeunossak pàk, tùuselupasan ina ailon pe itemlotopo, Christ yapyoto pe.

2 Corinthians 2:17 ပူးပေါင်းရင်းမြစ်များ

Matthew 24:24

Masapùla ailon pen Christ molopai ailon pen itekale yenpoikannan usenpoika màlà. Eke ton wotoko molopai enumenkanài kupù tok uya màlà yanùnsak kon yennakatoppe tùuya'nokon, tok yennaka tùuya'nokon pe iwechi yau.

Yeunossak kon Wotokoyi 20:20

Mùttuyatàik yà'làlà àpùikattànài'nokon pe tùwessen pùnùnmappù uya pùla iwechi ewinàpai'nokon, itekale yekama uya yau, molopai eyenupa kon uya yau wepili'nàtok itak tau, molopai apatassek kon yau'ne.

Yeunossak kon Wotokoyi 20:27

Masapùla tamù'nawolon Katù yeselu yekamappù uya àpàkù'nokon.

1 Corinthians 5:8

Màlàpàk uchi uta'lettàntok ikuppai'nokon ipoippà apuluwetanù'nài pàk pùla, àli pe molopai wakù pe pùla we'nàtoppe ku'nài. Tùse làkku yapuluwetanù'nài pùn pùlomù pusak pàk, esuken we'nàtoppe molopai ailon pe we'nàtoppe kunài pùlomù pusak.

2 Corinthians 1:12

Sàlà màlà ina yauchinapanài. Ina usenumenkatok nekamayan tamù'nawolon ina nùkupùppù sàlà wolù yau, ailon pe wakù pe ina wechippù ànù'là tennakaik pùla, ina welaikatok ewinàkàik nokon yau kulu. Ina wessak man enpen Katù pàk ina pùikattàtoppe ya, sàlà non pon yapàiketù ke pùla.

2 Corinthians 1:18

Katù wechi ailon pe kasa, ikupù uya tetok uya àpàkù'nokon wechippù màlà, “Ewaik” molopai “Kane” tawon pe pùla.

2 Corinthians 11:11

Yà'là pe ken uchi iwechi pàk wa te uya sàlà? À'nùnma kon uya pùla ka' iwechi pàk lù? Katù nùttuyan à'nùnma kon uya.

2 Corinthians 12:19

Tamù'nawolon sàlà te uya ikasa ina wechi yenpoika toppe pe là yekama auya'nokon. Kane, màlà kasa pùla man. Ina tùuselupasan Christ wettok ina uselupa iche kasa, Katù yemloto po. Ina tonpa yamùk, tamù'nawolon ina nùkupù màlà tùwekkussen àpùikatàtok kon pe.

2 Corinthians 4:2

Tamù'nawolon tonantau tùkussen molopai kuli'manài eselu yamùk ku'nàinan pen ina, ànù'la yennakannan pen, ailon pe Katù Maimu yenpoikannan. Tùse làkku Katù uya màlà ailon pe ina uselupa yene molopai kappon yamùk uya nàlà ailon pe ina wechi ittu.

2 Corinthians 6:7

ailon pe uselupantok yau, molopai Katù yapàikketù yau. Wakù pe we'nàtok yau wepanta'mantok ike yesappe kamik pen mùyak yau, molopai kamik mùyak yau iwapu.

Galatians 1:6

Uyenumenkasak kulu auya'nokon man! Masapùla tachin pe pùla mùkkàlà Christ wettok wakù pe winà àkà'manàippù'nokon nonka auya'nokon pàk, molopai ewelattà kon pàk tùulon itekale pàkàlà.

1 Thessalonians 2:4

Tùse làkku ina uselupa nai'nùk Katù wettok iche kasa, masapùla ina yanùnsak ya nai'nùk molopai Wakù Itekale tùsak ya ina yemyak ina nekama pe. Kappon yamùk yauchinpaiche là ina wechi pen sàlà. Tùse Katù làkku anauchinpapai ina wechi, mùkkàlà ina yeselu ina yewan yau nai'nùk ittunài.

Titus 1:11

Tok uselupa yeleutanùpù pe là nen iwechi màlà, masapùla kappon yamùk yaimelunpayan tok, tok munkà pokonpe màlà enupantok tùuya'nokon yekama tùuya'nokon ke, màlà kappon yenupatok yek pen ke, àli pàkànsau pùlayatta yepotoppe tùuya'nokon.

Hebrews 11:27

Ailon tetok winà Moses uya Egypt nàmàppù tùusenalippaik pùla kin we'naikatok pàk, masapùla tensen pen Katù yensak tùuya pàk sa'man pàlikappù ya.

1 Peter 4:11

Ànù'là itekale yekamanài, tàwà Katù Maimu yekamai; ànù'là tùulon kon pùikattànài, tàwà tok pùikattài, meluntà, màlà Katù uya tùlepatok ke, tamù'nawolon yau apulàntok tùtoppe Katù piyak Jesus Christ yai, apulàntok molopai apàikkeppe we'nàtok iponalok tàwàlàlà molopai tàwàlàlà. Emen.

1 John 4:1

Utonpa yamùk, ailon kùkatàu tamù'nawolon kon, Katù yakkwalù yesappe tukaik tùusennakasan pàk, tùse yentàk kon sàlà akkwalù itesappe tok wettok wechi là Katù winàpaino pe. Masapùla tukke Katù Maimu yenpoikannan pe tukaik tùukaseitasan utàppù man mailàlà wolù yau.

Jude 1:4

Masapùla tùulon kon àliton kappon yamùk wewonsak man amak yai kùkklotta'nokon ittu kùuya'nokon pùla, pùsamlo lùppù uya wakù pe we'nàtok Katù winàpaino lattàsak man iche tùwettok kasa tùwechinma pàk tùwettok kon ipàkàlà pe, molopai Jesus Christ tewinan Kùyepulu kon molopai tamù'nwolon kon Yepoino nulunpa tok uya. Pena Katù Maimu uya yekamappù sàlà talumattàntok tok nepoloppù.

Revelation 12:9

Eke ulupelu lùmà yenu'mappù màlà, mùkkàlà penalok àkài, Makui wapùla Settan itesek, tamù'nawolon kon kappon yamùk non pon kon yennakanàippù. Yenu'mappù màlà non pona tamù'nawàlà itinchelùyi yamùk pokonpe.

Revelation 19:20

Àsà ene yachippù màlà, tamùkke iwalai pen itekale yekamanàippù pokonpe, mùkkàlà tensan pen yamùk ku'nàippù itemlotopo. (Màlà tensan pen yamùk winà màlà mùkyamlo àsà ene uya pattàntok yesak ton yennakappù ya, molopai àsà ene kasa ikonekasak yapulànnan nùssan.) Àsà ene molopai iwalai pen itekale yekamanàippù tawonnan yenu'mappù màlà asakklàma, nulà apok yak kulupala kasa tùkà'nùnsen pokonpe tùuyassen yak.

Revelation 2:20

Tùse sàlàichi màlà usenumenkatok ewinàkàik. Mùkkàlà nossan Jezebel pàlikanài àmàlà, mùkkàlà Katù Maimu yenpoikanài pe tukaik tùusesassen. Uyapyoto yamùk yenupanài mùkkàlà àli imakuyippù kuttoppe tok uya tesak kon ke, molopai Katù pen yemyak itùsak kùyali nattoppe tok uya iku'nài.