1 Timothy 4:3 - Patamuna New Testament Revised

³ Mùkyamlo walai non kappon yamùk uya enupan màlà, wemali'man wechi màlà ikasa pùla molopai yà'là yekkwa là kùyali màlà tùnassen pen, tukaik. Tùse Katù uya màlà sàlà yamùk kùyali konekappù ailon tawonnan molopai ailon ittunnan nùnapù pe tenki tukaik.

1 Timothy 4:3 ပူးပေါင်းရင်းမြစ်များ

Matthew 14:19

Kappon yamùk weleutatoppe wanak pona Jesus uya yekamappù tok pàk. Màlàyau 5 pan pùlomù pusak molopai asa'lon kon molok yamùk tawon yanùmùppù ya. Tenu tùlùppù ya epùn winàkàik, molopai tenki teppù ya. Pùlomù pusak yamùk pilipàtùppù ya molopai itùlùppù ya ta'lon kon yemyak, molopai ya'lon kon uya itùpàtùppù kappon yamùk yemyak.

Matthew 15:11

Màlà kappon mùtak tùutàsen màlà àli pe iku'nài pen. Tùse làkku, màlà intapai nepakkayai'nùk màlà àli pe iku'nài,” teppù ya.

Matthew 15:36

Màlàyau 7 pan pùlomù pusak molopai molok tawon yanùmùppù ya, tenki teppù ya, molopai nen uchi ipilipàtùppù ya, molopai ta'lon kon yemyak itùlùppù ya. Molopai ya'lon kon uya kappon yamùk yemyak itùpàtùppù.

Luke 24:30

Iweleutappù màlà kùyali yapon piyau tok pokonpe, pùlomù pusak yanùmùppù ya, ipùlemappùya. Màlà tùpo ipilipàtùppùya, tok yemyak nen uchi itùpàtùppù ya.

John 6:23

Tiberias poi tùulon kon kanau yamùk uyàpùppù màlà pùlomù pusak napùppù ilinà kappon yamùk uya, tenki te Itepulu Jesus uya tùpo motak.

Yeunossak kon Wotokoyi 27:35

Sàlà te tùpo, Paul uya pùlomù pusak yanùmùppù tenki teppù ya Katù pàk, tamù'nawàlà tok yemloto po, molopai ipilikappù ya, molopai tùuta'lettà pàk iwessa'molùkappù.

Romans 14:17

Masapùla Katù wettok Itepulu pe màlà tùnassen nà wapùla tinchisen nà pen, tùse ikasa we'nàtok, molopai echitonpa pe we'nàtok molopai utauchinpantok Wakù Akkwalù nùtùlù.

Romans 14:3

Mùkkàlà tamù'nawolon na'nài molopai yannài, yonpanài pen talumattàtak molopai yà'là yekkwa là yonpanài pen tamù'nawolon na'nài molopai yannài talumattàtak, masapùla mùkkàlà kapon yanùsak Katù uya màlà.

Romans 14:6

Mùkàlà pata weyu tonpa ittunài eke pe uya ikupù màlà Itepulu yapulàtok iwinà pe, mùkkàlà ta'mù'nawolon na'nài molopai yannài uya ikupù màlà Itepulu yapulàtok iwinà pe, masapùla tenki tawon mùkkàlà Katù pàk kùyali pona. Mùkkàlà tùulon nà kùyali nulunpanài uya ikupù màlà Itepulu yapulàtok iwinà pe, molopai tenki tawon mùkkàlà Katù pàk.

1 Corinthians 6:13

“Kùyali màlà lotta ponalok molopai lotta kùyali ponalok”, tùse Katù nùmattanùppù ton màlà asakklàma. Esak wannà màlà àli imakuyippù ponalok pen tùse Itepulu ponalok, molopai Itepulu esak wannà ponalok.

1 Corinthians 7:28

Tùse ewemali'ma kon yau, ewemakuimasak kon pen màlà. Molopai walawok ittunàippù pen ulichan wemali'ma yau, iwemakuimasak pen màlà. Tùse iwemali'masak kon uya màlà tukkan utaimelunmantok yepolo màlà sàlà wema'nàtok yau. Molopai sàlà yekkwa ton winàpai àpùikattà kon uya iche wechi sàlà.

1 Corinthians 8:8

Tùse kùyali uya mei pùla Katù piyak kùnepù kon pen màlà. Yà'là kasa là ku'nà uta'letàn nokon pùla iwechi uya pen màlà, wapùla wakù peiwa là we'nà uta'letàn nokon yau pen.

Colossians 2:16

Màlàpàk àli pe ànù'là kùsselupatak annapù kon wapùla eninchi kon pàk, wapùla Jew yamùk nùkupù tùnamasen kupù auya'nokon pùla iwechi pàk, uta'lettàntok yekkwa wapùla kapùi wepakkasak emennak pe yattai tùkussan, molopai tùnamasan Jew yamùk wàlàkkattok yattai nokon pàk.

Colossians 3:17

Tamù'nawolon ànkupù kon wapùla euselupatok kon nekkupùik Itepulu Jesus yesek yau, tenki te auya'nokon pe mùkkàlà yai Katù Kùkàipùnù kon pàk.

1 Timothy 2:4

tamù'nawolon kon wepùikattà ichelok mùkkàlà molopai ailon ittu tok uya iche tùwessen.

1 Timothy 4:4

Tamù'nawolon Katù nùkonekappù màlà wakù; molopai tùnulunpasen pe pùla iwechi, tùse tamù'nawolon wechi màlà tanùnsen pe tenki tei'ma;

1 Timothy 5:14

Màlàpàk ema'nomichi itayappù iwelichak kon wemali'ma iche wechi màlà, tùumunkàtatok kon pe, tùwùk molopai tùmunkà yamùk mainanpa toppe tùuya, kùyeyaton kon uselupatok àli pe kùpàk yattai pùla.

Hebrews 13:4

Tàwà tamù'nawolon kon wemali'mantok tùnamaik nechii. Molopai tàwàlàlà atayappù wapùla ànoppù kon winàkàik ailon pe ettàk. Masapùla Katù uya àli ku'nài nan tesak kon ke molopai tùnmali'mappù kon pen pokonpe tùwessan talumattà màlà.

Hebrews 13:9

Tùpatalo'nan yà'là yekkwa ton nà enupantok kon ayatakù'nokon iwalai enupantok winàpai. Wakù pe iwechi màlà kùyewan kon wena meluntà pe Katù nùkupùppù wakù winà yau, kùyali tùnassen pe kappon nekama winà pùla. Masapùla mùkyamlo ina'nàinan nùssan pùikattànài pe pùla iwechi màlà.