1 Timothy 1:9 - Patamuna New Testament Revised

⁹ Sàlà ittutàk kon: Law wekkussak màlà wakù ton nà kappon yamùk ponaloppe pùla. Tùse Law yawolon kon pen ponaloppe, àli ku'nài nan, Katù yapulànnan pen, molopai àsà pe tùwessan ponaloppe, Katù pùnon, kappon yamùk tùkàipùnù kon wapùla tùsan kon wànnan ponaloppe, molopai kappon yamùk tùkkannan ponaloppe.

1 Timothy 1:9 ပူးပေါင်းရင်းမြစ်များ

Matthew 10:21

“Takon tùlù màlà ilui uya iwàtoppe, molopai ikàipùnù uya tùmule tùlù, mule yamùk uya tùsan kon molopai tùkàipùnù kon yentaika màlà molopai tok wàtoppe tok tùlù tok uya.

Romans 1:30

Àli pe tùuselupasan tùtonpa kon pàk yeta ya pùla, Katù yeya'nomannan. Yà'làlà ànkuppai nokon tùyiwalà'nokon teselu kon yawà, tùtonpa kon yentai tùwekkussan molopai tamù'nawolon ittunài pe tukaik tùwekkussan, àli kuttok yawàlà woton kon pàk tùusenumenkasan, tùsan kon, tùkàipùnù kon maimu yawolon kon nà pen.

Romans 4:13

Katù uya Abraham molopai ipayan yamùk pàk wolù wechi màlà tok ponaloppe teppù màlà. Sàlà wekkupù màlà, Law yawàlà Abraham wechi pàk pùla, tùse ailon tesak ya pàk, màlà winà Katù uya nen uchi yanùmùppù ikasa tùwessen pe.

Romans 5:20

Law tùlùppù màlà iwalai pen kuttok wekattoppe. Tùse àli kuttok wekassak yau, Katù wettok wakù pe wekatù màlà eke peiwa kulu.

Romans 6:14

Makui eyepulu kon pe kùsettak, masapùla Law maimu yawàlà tùwemassan pen amyamlo. Tùse wakù pe Katù wettok yo'no làkku tùwemassan.

Galatians 3:19

Yà'là woton pe ken uchi Law wechippù màlà? Itùlùppù màlà wemakuiman pàk we'nà pàk, mùkkàlà nàlà Abraham pa ikupù uya màlà teppù lùppù ipàk uyàpù ponalà neken tùwessen pe. Law tùlùppù màlà inchelù yamùk uya akkletawon yemyak (Moses).

Galatians 5:18

Tùse Akkwalù uya ayalà kon yau, law yo'no ewechi kon pen màlà.

Galatians 5:21

tùulon yemamin iche kùlùmàlunnàtok, wetùnnàtok, tamùkke wepili'nàtoke àli kusse molopai tùulon kon sàlà yekkwa ton ku'nàinan. Eyekamappoyatàu Iulà wapiya eyekamappoppù kon uya kasa. Mùkyamlo sàlà yamùk ku'nàinan uya Katù wettok itepulu pe yepolo pen màlà.

Galatians 5:23

tenpe we'nàtok, molopai esak yepulu pe we'nàtok. Sàlà yamùk winàkàik law pùla iwechi màlà.

2 Thessalonians 2:8

Màlàyau nen uchi ichenpoika màlà molopai Itepulu Jesus uya iwànà màlà tùwe'netukka ke, molopai nàlà tùuyàpù yau imattanùkkapù ya màlà tùusenpoika yakkwayi ke.

1 Timothy 4:7

Kappon yamùk mùkyamlo italumayiichan, ailon ton pen nà panton yekamannan, tùse màlà yamùk uya enupantok yawàlà kechii, Katù uya neken enupantok yawàlà ewechi pa esenupakà.

1 Timothy 6:20

Timothy, màlà itùsak lùppù eyemyak ikukkà wakù pe. Katù pùnon uselupatok yà'là pen nà kùsetai, wakù kasa nùsetayai'nùk tùse iwalai pen enupantok.

2 Timothy 2:16

Àli pe molopai pakko pe uselupantok winàpai ekkukkà, kappon yamùk yenpenài neken màlà mei lùiwa Katù winàpai.

2 Timothy 3:2

Kappon yamùk wechi màlà tùmàlà neken pùnùnmannan pe, pùlayatta pùnùmannan pe, tùutapulàsan pe, tùtonpa yentai wakù pe tùwekkussan pe, mottùnpannan pe tok wechi màlà, tùsan kon maimu yawàlà pùla tùwessan pe, tenki tawonnan pe pùla, esuken pùla;

Titus 1:10

Masapùla molo tok man tukke, mùkyamlo, Katù Maimu yawolon kon pen molopai tùulon kon yennakannan tùusennakatok kon tùpantomù kon ke, mùkyamlo kulu Jew yamùk usattàtok pàk enupantok yawolon kon.

Titus 1:16

Tok uya, “Katù ittunài Iulà,” te màlà; tùse tok welaikatok uya yenpoika pùla iwechi màlà. Akùlù ton mùkyamlo, molopai mayin yawolon kon pen, wakù ku'nàinan pe tok wechi pùla iwechi.

Titus 1:6

Pùsàlà kappon sochi yennài wechi màlà wakù pe itekale; tewin neken inoppù iwechi màlà, molopai imunkà wechi màlà ailon tawonnan pe molopai àli pe là itekale pùla, wapùla mayin yawolon pe pùla là tuwessen pe pùla.

Titus 3:3

Masapùla kùmyamlo nàlà wechippù pakko pe, mayin yawolon pe pùla, ennakan yapyoto pe we'nàppà'nokon màlà yà'làlà yau yauchin pe. Esseyaton pàk wema'nàppà'nokon màlà molopai kùlùmàlunàtok yau; tùulon kon kùyeya'nomatantàu molopai tok yeya'nomappù màlà.

Hebrews 11:31

Ailon tetok winà màlà kàyik yamùk yemyak tùwechilanmasen Rahab wànàppù pen màlà Katù Maimu yawàlà iwessak kon pen pokonpe. Masapùla elaik yamùk yanùnsak ya pàk.

Hebrews 12:16

Elannek pe ettàk kon ànù'là uya àli kupù tesak ke tukaik wapùla ànù'là wechi Katù pùn kasa tukaik. Esau kasa, mùkkàlà tùpatassek wapiya iwentusappe tùwechi nepolo chilanmanàippù, tewin itekkwa tùnassen kùyali yepeppe.

1 Peter 2:7

Sàlà màlà wakù kulu tàk amyamlo ailon tawonnan Katù pàk pona; tùse mùkyamlo ailon tawonnan pen pona: “Màlà tàk wechippù tapùi yamùnnan nenpàttùppù pe, màlà lùppù wenasak man iche kulu we'nàtok pe tùulon kon tàk yentai,” teppù nàlà. {Psa 118.22}

1 Peter 3:20

Pùsamloichi wechippù màlà akkwalùppà yamùk lùssan pe Katù Maimu yawàlà iwessak kon pen pe, tùusetakkaik pùla inmàmukussan Noah uya kanau koneka weyu yamùk yattai yau pe. Tukkan kon pen kappon yamùk wechippù kanau yau, 8 pan kon neken. Mùkyamlo wepùikattàppù màlà tuna winà.

1 Peter 4:18

Molopai, “Sa'man pe kulu wakù ton kappon yamùk wepùikattà wechi yau, yà'là pe ken Katù pùnon molopai àli ton kappon yamùk wechi?” {Pro 11.31}

Jude 1:15

tamù'nawolon kon kappon yamùk ittuse molopai tamù'nawolon kon Katù pùnon talumattàse, tamù'nawolon àli ton tok nùkupùppù pàkànsau, molopai tamù'nawolon àli pe tok uselupappù Katù winàkàik pàkànsau!” tukaik.

Revelation 21:8

Tùse tùusenalippasan molopai ailon tawonnan pen, mùkkyamlo àli pe tùwessan, wànnan, tesak ke àli ku'nàinan, mùkyamlo piyassan yeselu ku'nàinan molopai ikonekasak katù yapulànnan, molopai tamù'nawàlà kasei ton uya tùnepolo kon yepolo màlà eke kulu apok tùuyassen patassek molopai kulupala kasa tùkà'nùnsen yau, màlà yakon itekkwa pe weli'nàtok,” teppù ya nàlà.

Revelation 22:15

Tùse polopo màlà a'a yamùk wechi, mùkyamlo piyassan yeselu ku'nàinan, molopai àli ku'nàinan tesak kon ke, wànnan, Katù pen ikonekasak yemlotopo tùwepeimasan, molopai mùkyamlo tamù'nawàlà kasei ton asakklàma tùuselupatok kon yau molopai tùwelaikatok kon yau.