1 Peter 3:22 - Patamuna New Testament Revised

²² Itàppù nai'nùk epùn pona, molopai namantok pata yau Katù yemyatù kamik pen winà nai'nùk. Tamù'nawolon kon inchelù yamùk yepulu mùkkàlà, tamù'nawolon kon apàikkek ton molopai tamù'nawolon kon meluntà ton yepulu.

1 Peter 3:22 ပူးပေါင်းရင်းမြစ်များ

Matthew 28:18

Jesus uyàpùppù màlà mei pùla molopai tok pàk, “Ulepasak man tamù'nawolon apàikkek ke epùn yau molopai non po.

Mark 12:36

“David uya Wakù Akkwalù yapàikketù yau, ‘Itepulu uya Uyepulu pàk, Eleutakà upyau, kamik winà pùla, eyeyaton yamùk nonka uya atta yokkoik ponalà,’ teppù.

Mark 16:19

Itepulu Jesus uya tùnenupa ton nùssan yelupasak tùpo, yanùmùppù Ikàipùnù uya epùn pona. Màlàyau iweleutappù Katù yemyatù kamik pen winà.

Luke 20:42

Masapùla David uya, ‘Itepulu uya Uyepulu pàk, Chichiu pe ekkà sà motau ulaitannù winà.

John 13:32

Katù yapulàtok usenpoikasak yai yau, Katù uya nàlà màlà tùmu yapulàtok yenpoika tùmàlà yau. Molopai tewinanpa ikupù ya màlà.

Yeunossak kon Wotokoyi 1:11

“Kàyik yamùk Galilee pon kon, yà'là pe ken iwechi pàk kak yenupàkà ewechi kon màlà? Pùsàlà Jesus Epùn pona yanùmù nepàssai'nùk ewinàpai'nokon, mùkkàlà tùuyà tu'ma woton epùn pona iità menpàssatài'nùk kasa,” teppù tok uya.

Yeunossak kon Wotokoyi 3:21

Epùn po iwechi màlà tamù'nawolon wenatok emennak pe yattai uyàpù ponalà, Katù uya yekamappù pena wakù ton tùmaimu yenpoikannan yai kasa.

Romans 8:34

Ànù'là uya ken na' uchi tok talumattà? Ànù'la pùla iwechi màlà masapùla Christ Jesus mùkkàlà iwelichak lùppù, molopai iwuluukasak lùppù weli'nàtok yapai molopai sàlà pe namantok patassek kamik pen Katù yemyatù winà man. Katù pawanattànài mùkkàlà kùponalok kon pe!

Romans 8:38

Masapùla tùttuyaik kulu yà'làlà uya kùpantakatok kon pùla iwechi màlà pùnùnmantok ya winàpai. Weli'nàtok uya kùpantaka pen màlà, wapùla wema'nàtok uya, wapùla inchelù yamùk, wapùla tùulon kon kau nai'nanùk potolù ton molopai meluntà ton yapàiketù uya, wapùla sàlà pe nai'nùk wapùla ewanawà nai'nùk uya.

1 Corinthians 15:24

Molopai nen uchi pata wenukattok uyàpù màlà, Katù Tùkàipùnù yemyak itepulu pe we'nàtok tùlù ya, tamù'nawolon epulu ton molopai apàikek ton molopai meluntà ton mattanùpùppù tùuya ye'mappùtak.

Colossians 3:1

Àwuluukasak kon man wema'nàtok yak Jesus Christ pokonpe. Eyewan kon uchi itùtàk kon màlà yamùk epùn po nai'nannùk pàk, Christ wettok chichiupe tapon po kamik pen Katù yemyatù winon namantok patassek winà.

Hebrews 1:13

Katù uya tùyinchelùyi yamùk tonpa pàk là, “Eleutakà talà ulaitanù winà, eyeyatonnon nonka uya atta yapon pe ponalà,” tesak pùla iwechi màlà.

Hebrews 1:3

Katù Mumu mùkkàlà tùulenpansen Katù yakkwayi ke. Katù yenpoika ya tamù'nawàlà, molopai tamù'nawolon tùnkonekappù yachinài mùkkàlà apàikkek tùmaimu ke. Wakù pe, tok uya àli kuttok yapai kappon yamùk kupù tùpo, iweleutappù màlà epùn po wakù kulu patassek Eke kulu Katù laitanù winon yak.

Hebrews 1:6

Wapiya iwentusak lùppù Tùmu yeunoko pàk Katù wekkupù non pona yau, “Tàwà tamù'nawolon kon Katù inchelùyi yamùk nùnamai,” teppù ya.

Hebrews 10:12

Tùse pùsàlà, Christ, uya tewin itekkwa neken tùwenukassen pen tùtùsen tùlùpù màlà makui winàpai pùikattànài pe. Màlàyau iweleutappù Katù laitanù yak.

Hebrews 12:2

Jesus yenpai'nokon man. Mùkkàlà ailon tetok kùuya'nokon piyattànàippù molopai ikasa kulu iku'nài mùkkàlà. Masapùla mùkkàlà uya tùutauchinpatok yepolo tùuya ite'mappùtak ittu tùuya pàk, tùwelittok pàlikappù pulusuk pàk, wekuli'mantok pàk iichenumenka pùla. Molopai sàlà pe nen uchi chichiupe man Katù laitanù winà yapon piyau.

Hebrews 4:14

Mùkkàlà eke kulu paatele yesappe we'nà'nokon man, mùkkàlà iitàsak lùppù Epùn pona, Jesus, Katù Mumu. Màlàpàk uchi meluntà pe utachinpai nokon, ailon tetok kùuya'nokon pàk.

Hebrews 6:20

Jesus wewomùppù màlà màlà motak kùpàkànsau'nokon. eke kulu paatele pe iwenappù màlà tàwàlàlà, Melchizedek yekkwa pe.

Hebrews 8:1

Sàlàichi màlà ina wettok yekama iche. Pùsàlà, eke kulu paatele, yesappe we'nà'nokon man. Mùkkàlà chichiu pe tùwessen kamik pen winà Katù eke pe tùwessen yapon piyau epùn po.

Hebrews 9:24

Masapùla Christ utàppù màlà Katù yùwùk kappon yamùk nùkonekappù pen yak molopai epùn pon kasa neken nà nai'nùk pen. Iitàppù màlà epùn pona molopai sàlà pe nen uchi Katù piyau iwechi màlà kùpùikattàtok kon pe tùuya.