Warumi 5:5 - Pokomo

⁵ Na haya haya madzikwat̯yo hwiyonayo ntayanahungiza yutswani, koro Muungu kahuyanga matsakoye makuu kuchiiya na kwa Ruhu Mudheru jwakwe. Muungu kamuhukakanyia huyu huyu Ruhu myojoni mwehu dza t̯ola yakwe ahupfiyeyo.

Warumi 5:5 ပူးပေါင်းရင်းမြစ်များ

Mahendo 10:45

Hawaḍe wahikiza wa Kiyahud̯i wadziyeo pfamodza na Pet̯ero kuyawa Yopa wamaka, wepfoona kwamba hat̯a wantu wa vyeet̯i vingine nao, Muungu kawapfa t̯ola ya Ruhu Mudheru.

Mahendo 2:17

Haya ndiyo nidzeyohenda nsiku za mwiso. Wantu wonse nidzawakakanyia Ruhu jwangu. Wanawayume na wanawake wenu wadzayavya unabii. Orani wenu wadzaona nzozi, na wazee wenu wadzayoheswa ndoho.

Mahendo 2:33

Kapfazwa dzuu hat̯a ḍanda ya mukono kuyume wa Muungu, na kapfokea Ruhu Mudheru dza vya Babajwe evyomuahid̯i. Ndookomu, mwichokuonani na kusikia hi hii saasambi ni huyu Ruhu Mudheru ayehejwe kwehu ni Yesu.

Warumi 1:7

Ndookomu nyakumworeani nywinywi wantu wonse mwiwo Rumi. Nywinywi mu wantu mutsakijweo ni Muungu na akimuhana muwe wantuwe wadheru. Muungu Baba na Ḅwana jwehu Yesu Kirist̯o nawamuvodhye na kumumpa naghea nto.

Warumi 8:28

Humanya kwamba Muungu anahenda kula dzambo ḍipate kuwa dzema kwa hawaḍe wamutsakiyeo na awahaniyeo kuuḅana na mupangowe kwao.

Warumi 9:33

Haya matsoro yanena dzuu yeḍihiḍi iwe yamba, “T̯ayowa, nyakuwekani iwe mudzini Sayuni. Ni iwe ḍya kuwahendeza wantu wakolasike wagwe. Na yuḍejwonse amuhikiziye huyu eye dza iwe, nkanagizwa yutswa meshi.”

1 Wakorint̯o 8:3

Ela muntu amutsakie Muungu, Muungu kamumanya.

2 Wakorint̯o 1:22

na kahungiza gubva ya kuyanga kwamba hu wakwe, na kamuhungiza huyu Ruhu jwakwe myojoni mwehu, dza hakikisho ḍya haya adzeyohuhendea.

2 Wakorint̯o 13:14

T̯ei ya Ḅwana jwehu Yesu Kirist̯o, na matsako ya Muungu, na haria ya Ruhu Mudheru, naviwe pfamodza nanywi nyonse.

2 Wakorint̯o 3:18

D̯ubva, swiswi huvuijweo hizi ntadzi, hunayanga marembo ya Ḅwana. Na haya haya marembo, yeyonayawa kwa Ḅwana, eye huyu Ruhu, yakuhuperuzani shufa hwakuwani dzae. Na hwakuwani na maremboye makuu zaid̯i na zaid̯i.

2 Wakorint̯o 4:6

Huyu Muungu ambiye, “Nakuyangae muyanga humu kizani,” ndiye jeje ahendezeye muyangawe uhuyangaiye myojoni mwehu. Hu muyanga unahupfa kuyamanya haya marembo ya Muungu, yeyonayangaa humu usoni mwa Kirist̯o.

Wagalatia 4:6

Kwa dzambo ḍya kwamba hu wanawe, Muungu kamuhuma huyu Ruhu jwa Mwanawe myojoni mwehu. Ndiye huyu Ruhu eyenahuhendeza humuhane Baba.

Wagalatia 5:22

Ela huyu Ruhu anavyaza myojoni mwa wantu haya mambo haya: matsako, tsekea, naghea, kuit̯isa, ubalicha, wema, kuhikizika,

Waefeso 1:13

Hat̯a nanywi nywinywi wantu wa vyeet̯i vingine, mwipfoyasikia haya *Maagu Mema muyahikiza na Muungu kamupfonya. Na kwa kwamba mumuhikiza Kirist̯o, Muungu kamungiza alama kwa kumumpa huyu Ruhu jwakwe eyemuahid̯ia wantuwe.

Waefeso 4:30

Namutsemusikit̯isa huyu Ruhu jwa Muungu. Koro huyu Ruhu ndiyo alama ya Muungu amungiziyeyo kuyanga kwamba mu wantuwe. Anakaa kuzimuni mwenu hat̯a nsiku ya Muungu adzeyomuweka huru kaḅisa kuyawana na mazuka.

Wafilipi 1:20

Hamu yangu nkuu na madzikwat̯yo yangu ni kwamba nitsehenda kiḍechonse cha kunigiza yutswa. Ela meshi natsaka kumuhumikia Kirist̯o pfasipfo oga uḍewonse dza nivyonikihenda iiḍe. Na natsaka kwamba nikikaa mojo ambu nikifwa, mimi nimukuzye Kirist̯o na haya mahendo yangu.

1 Watesalonike 4:8

D̯ubva, muntu akiyadziza haya haya mayongweezo, nkakwakudzizani mayongweezo ya benaad̯amu, kakudzizani mayongweezo ya Muungu mwenye. Na Muungu ndiye ahupfiye huyu Ruhu Mudheru jwakwe.

2 Watesalonike 2:16

Swiswi hwakumuyombeani kwamba, Ḅwana jwehu Yesu Kirist̯o na Muungu Baba jwehu wamungize mojo na kumumpa nguvu, mugije kunena na kuhenda mema. Koro kwa dzambo ḍya kwamba Muungu kahutsaka, kahufwiya t̯ei isiyosia na kahupfa madzikwat̯yo mema ya kudzaishi nae.

2 Timoteo 1:12

Ndiyo maana niyokukuntani d̯ina dzevihivi. Ela sidzafwa mojo, koro huyu nimuhikiziye nimumanya ya kwamba ni ga. Nina uhakika wa kwamba, ana uwezo wa kuyamia haya animpiyeyo, mumpaka nsiku ya mwiso.

1 Yohana 4:19

Muungu ndiye ahutsakiye jeje d̯ura, na ndiyo maana naswi huna matsako.