Upfenuo wa Yohana 5:9 - Pokomo

⁹ Wamwimbia wiya mupfya wakyamba, “Wewe unamala kuchihwaa hichi chuo, uivunze hi mihuri yakwe. Koro wewe kuyagwa, na kwa mwaziwo, kumukombowea wantu Muungu. Wewe kumukombowea wantu, wa kuyawa kula nsi na kyeet̯i na lugha.

Upfenuo wa Yohana 5:9 ပူးပေါင်းရင်းမြစ်များ

Matayo 20:28

Koro hat̯a nami mimi Mwana jwa Ad̯amu sikudzia kuhumikijwa, ela nidza dza muhumisi. Na pia nidzia kuyayavya maisha yangu yawe mupfonyo wa wenji.”

Matayo 26:28

Koro huu ni mwazi wangu wiwo dza hakikisho ḍya hiḍi ḍamano ḍya Muungu eḍyokuhendani na wantuwe. Ni mwazi wihijweo kwa dzambo ḍya kuyatsia nabvise za wenji.

Mahendo 20:28

Dzit̯unzeni wenye na kuwat̯unza wahikiza wonse wayatsijweo mikononi mwenu ni Ruhu Mudheru. Wani wat̯ikisa wa tsanganiko ḍya Muungu, aḍidzigwiiyeḍyo kwa mwazi wa Mwanawe.

1 Wakorint̯o 6:20

Jeje kesakumubigia ḍiba. Ndookomu mii yenu itumieni kwa kumushad̯a Muungu.

1 Wakorint̯o 7:23

Mwisakubigijwa ḍiba, d̯ubva namutseewa wahumwa wa wantu kawii.

Waefeso 1:7

Muungu kahukombowa na mwazi wa Kirist̯o ehiyeo epfofwa muhini mwa mpatsa na kahuweka huru. Yani kahuyatsia nabvise zehu. Na kwa hi hii njia, Muungu kahuyanga namuna aivyo mut̯ei kwehu

Waefeso 5:19

Ngizanani mojo na meya ya zaburi na meya yangine ya kumushad̯a Muungu. Mushad̯eni Ḅwana na meya ya kuyawa myojoni mwenu.

Wakolosai 1:14

Kuchiiya na kwa mwazi wa huyu Mwanawe, Muungu kahukombowa kuyawana na uhumwa wa nabvise, na kahuyatsia nabvise zehu.

Wakolosai 1:23

Ela ni had̯i mugije kuyahikiza haya Maagu Mema muyasumwiijweyo, na muyagije gu. Ni had̯i mutseyayekeza haya madzikwat̯yo ya Muungu ayamumpiyeyo kuyawana na haya Maagu Mema. Haya ni yayaḍe maagu mwiyosumwiijwa dzuu ya Kirist̯o, yeyokusumwiijwani lumwengu yuzima. Nami mimi mwenye ni mumodza jwa hawaḍe weokuhumikani kwa dzambo ḍya haya haya Maagu Mema.

Tito 2:14

Jeje kadziyavya maishaye kwa dzambo ḍyehu, ahupfonye na mazuka yonse na kuhudheresa na nabvise zehu, huwe wantuwe jeje heket̯u weo na hamu ya kuhenda mambo mema.

Waeburania 11:14

Na wantu weonanena dza hivyo wakuyangani kwamba wakuiyoweeyani hiḍe nsi idzeyowa yao haswa.

2 Pet̯ero 2:1

Dza kwivyokuwa na manabii ya nsuwe kahi ya wantu wa Muungu ngera zichiiyezo, ndivyo kudzevyot̯upuka waalimu wa nsuwe kahi yenu. Wadzadzinyeeza na mayongweezo ya nsuwe ya kumwaarya. Na wadzamukana huyu Ḅwana awapfonyeye nabviseni mwao. Ndookomu Muungu nkat̯owainda, kadzawahukumu vyumuni.

1 Yohana 1:7

Ela hukiishi muyangani dza hivi vyakwe aivyo muyangani, hunawa na kuhariana swiswi na swiswi. Na mwazi wa Yesu, Mwana jwa Muungu, unahudheresa nabvise zehu zonse.

1 Yohana 2:2

Na jeje ndiye hi mvuugiya ya kuhuhendeza huyatsijwe nabvise zehu. Na si kuyatsijwa nabvise zehu swiswi t̯u, ela hat̯a na nabvise za wantu wonse!

Upfenuo wa Yohana 10:11

Kisa nyambigwa, “Ni had̯i uyavye unabii kawii wa haya yadzeyohendeka kwa wantu wenji wa nsi garagara, vyeet̯i garagara, lugha garagara na hat̯a kwa mahaju.”

Upfenuo wa Yohana 11:9

Na kwa nsiku ntahu na nusu, mii ya hawa mashaahiḍi wowii inayojwa ni wantu wa kula nsi, na kula kyeet̯i na kula lugha. Na ntaku adzeyeruhusijwa kuizika.

Upfenuo wa Yohana 13:7

Na pia huyu huyu binensa ewa kapfegwa mamulaka ya kujwana na wantu wa Muungu na awashinde. Kapfegwa mamulaka dzuu ya wantu wa kuyawa kula nsi, na kula kyeet̯i na kula lugha.

Upfenuo wa Yohana 13:8

Na kula muntu asiyekworegwa kuzimuni mwa chuo cha maisha hangu lumwengu ntajudzaumbwa, yani kula asiyekworegwa sariḍye kuzimuni mwa Chuo cha huyu Mwana Mbuzi eyetsinzwa, huyo kadzamuyomba huyu huyu binensa.

Upfenuo wa Yohana 14:6

Kisa niona malaika yungine eyeakiguuka huku yuwinguni dzuu. Ewa ekiwalalabvia wantu wonse wa lumwenguni *Maagu Mema yasiyo na mwiso. Kawalalabvia wantu wonse wa kuyawa kula nsi, na kula kyeet̯i na kula lugha.

Upfenuo wa Yohana 15:3

Hawa hawa wantu wekikwimba wiya wa huyu Mwana Mbuzi na Musa muhumisi jwa Muungu. Hu wiya unakwamba, “E Ḅwana Muungu mwenye nguvu zonse, mahendoyo ni makuu na ya kumakisa! Wewe wiye Haju jwa vyeet̯i na vyeet̯i, njiazo zonse nza hachi na nza ḍugha!

Upfenuo wa Yohana 17:15

Kisa huyu malaika kanyamba, “Huyuḍe muke shudha kumuona kakaa chihako dzuu ya madzi. Na maana ya haya madzi ni gumi ya wantu wenji na wenji. Ni wantu wa kuyawa kula nsi, kyeet̯i na lugha zonse za humu lumwenguni.

Upfenuo wa Yohana 4:11

“Ḅwana jwehu na Muungu jwehu, wewe unamala kushad̯wa na kukuzwa na kuhilwa. Koro wewe kuumba kula kintu, na kula kintu uumbiyecho kiwa na chakuishini kwa kutsaka kwako wewe.”

Upfenuo wa Yohana 5:12

Hawa malaika wekikwimba na saut̯i nkuu wakyamba, “Huyu Mwana Mbuzi ayagijwe, anamala kushad̯wa kwa dzambo ḍya uwezowe mukuu, ujabvawe, mvidhyoye na nguvuze. Jeje anamala kukuzwa na kuhilwa.”

Upfenuo wa Yohana 5:6

Kisa niona Mwana Mbuzi asumamiye hafufi na hiki kiti cha kihaju na akizunguukwa ni hivi viumbe vyoone na hawa wazee. Huyu Mwana Mbuzi kakaa dza kwamba ewa katsinzwa. Na ewa na mpembe mfungahe na matso mafungahe, ambayo ni hizi ruhu mfungahe za Muungu zizohumwa lumwengu yuzima.