Upfenuo wa Yohana 2:2 - Pokomo

² Mimi niyamanya mahendo yenu yonse. Nimanya kuit̯isa kwenu na hiḍu yenu ya kunihumikia. Nimanya ya kwamba ntamuwezi kuit̯isiana na wantu wazuka. Na hat̯a hawa weonadzihendeza kuwa ntumi wangu, nywinywi muwapima na muwahambuya kwamba ni wansuwe.

Upfenuo wa Yohana 2:2 ပူးပေါင်းရင်းမြစ်များ

Matayo 7:23

Ela mimi nidzawamba, ‘Hat̯a simudzi nywinywi. Ninukiani hapfa nywinywi wantu wazuka nywi!’ ”

Yohana 6:6

Yesu ewa kamuuza Filipo hivi kumuḍema t̯u, koro jeje mwenye ewa kamanya vya kuhenda hat̯a asidzamuuza.

Wagalatia 1:7

Hayo hayo mayongweezo siyo hi injili ya hachi hat̯a. Kuna wantu weokutsakani kuinanga hi Injili ya Kirist̯o na wakumungizani kuḍanganika.

Waefeso 4:14

Ntahuwezi kuwa dza wana vichuchu kawii wa kukulwakulwa kirahisi ni wantu weonadziona makaro wakayongweeza mayongweezo ya kwaarya wantu. Ntahuwezi kuwa dza chombo cha kubigwa ni mpepfo na mawimbi chikapfiikwa huku na huku.

1 Watesalonike 1:3

Hunakaa hukimuyombea kwa Muungu Baba jwehu, hukimuhadzia wema wenu mwiwohenda kwa dzambo ḍya kuhikiza kwenu. Hunakaa hukamuhadzia namuna ya matsako yenu yamumpiyevyo kuhenda kazi na hiḍu, na namuna mugijiyevyo kuwa na madzikwat̯yo ya kwamba Ḅwana jwehu Yesu Kirist̯o anauja kawii.

1 Watesalonike 5:21

Kipimeni kula chuuwo, muhwae hikiḍe chicho cha ḍugha,

2 Timoteo 2:19

Ela Muungu kaḍisumamisa hiḍi tsanganiko ḍyakwe dza musinji mumu gu usiosukusika. Na hu musinji woregwa hivi vyuuwo hivi: “Ḅwana kamanya weo wakwe.” Na kawii woregwa hivi: “Yuḍejwonse ambiye njwa Ḅwana, ni had̯i ayayatse mazukaye.”

Waeburania 6:10

Muungu anahendea wantu hiḍe ya hachi. Nkawezi kwaarerwa hi kazi yenu muhendeyeyo ambu matsako mumuyangiyeyo kwa namuna mwivyowagijiija na mwivyokuwagijiijani hawa Wakirist̯o wenzenu.

1 Yohana 4:1

Watsakwa, namutsemuhikiza kula muntu eyenakwamba ana Ruhu. Ishinu waḍemeni nguzi muwaone kwamba huyu ruhu jwao weyenae njwa Muungu ḍugha ambu hat̯a. Koro humu lumwenguni, kwisakuhandaiya manabii wa nsuwe wenji na wenji.

Upfenuo wa Yohana 2:5

Kumbukani hapfaḍe mugwiyepfo napfo, mupfyehuze mama na muwe dza hapfaḍe d̯ura mwipfonihikiza. Ambu sivyo, nakudza naunuya pfantupfe hu muhi wenu wa kupfatsikia tsaa.

Upfenuo wa Yohana 2:6

Hat̯a vivyo, muna dzambo modza dzema mwiḍyokuhendani. Naḍyo ni hiḍi ḍya kwamba, nywinywi muyakeva mahendo ya Wanikolai dza hivi vyangu niyakeveyevyo.

Upfenuo wa Yohana 2:9

Mimi nimanya d̯ina mwizonazo na umasikini wenu mwiwo nao. Ela kunena hiḍe ya hachi nywinywi mu majabva! Nimanya hat̯a hu uzuka wa hawa wapinzani wenu weokumuneneani. Wao wakudzihanani wantu wa Muungu na hali huku ni wantu wa Shaat̯ani.

Upfenuo wa Yohana 3:1

Huyu eyekuwa dza *Mwana jwa Ad̯amu kagija kunena nami kanyamba, “Kwa huyu malaika jwa tsanganiko ḍya Saridi, mworeye umwambe, ‘Huyu eye na hizi ruhu mfungahe za Muungu na hizi nyoha mfungahe, kamba hivi: Mimi nimanya mahendo yenu yonse. Munaonekana dza wantu mwiwo mojo, katsi huku mufwa.

Upfenuo wa Yohana 3:15

Mimi niyamanya mahendo yenu yonse. Ntamukwaa mpepfo wala ntamukwaa moho. Mukwakuwa mpepfo ni heri muwe mpepfo na mukwakuwa moho ni heri muwe moho!

Upfenuo wa Yohana 3:8

Mimi niyamanya mahendo yenu yonse. Nimanya kwamba ntamukwaa tsanganiko kuu ḍiḍyo na nguvu muno, ela mukigija chuuwo changu na nguvu na wala ntamudzanikana. Nami nimufungwiiya muḍyango usoni yenu na ntaku adzeyeweza kuufunga.