Upfenuo wa Yohana 11:2 - Pokomo

² Ela hiḍi ua ḍya huku nze ye Hekalu nkudzoḍipime, ḍiyatse. Ḍiḍyo ḍiyatsijwa hawa wantu wa vyeet̯i vingine. Nao wanauranga-ranga mudzi wa Muungu kwa muḍa wa myezi miyongo mine na miwii (nsiku 1,260).

Upfenuo wa Yohana 11:2 ပူးပေါင်းရင်းမြစ်များ

Matayo 4:5

Makisa Shaat̯ani kamupfiika Yesu hat̯a Yerusalemi, na kamusumamisa hapfaḍe pfantu pfepfo dzuu pfa mwiso pfe *Hekalu.

Matayo 5:13

Yesu kagija kusumwiiya kamba, “Nywinywi mwaa dza munyu kwa wanaad̯amu wonse wa humu lumwenguni. Ela munyu ukitsowa hukuḍe kutsama wikonamala kuwa nako, unahendegwadze ili upate kutsama dza munyu kawii? Na kwa kwamba ntaufae kawii, unakwihigwa nze na wantu wanauranga-ranga ḅasi.

Luka 21:24

Wangine wadzayagwa vihani na wangine wadzawa maheka wa nsi zonse. Na hawa wantu wa vyeet̯i wadzaikaa Yerusalemi hat̯a nsiku zao zidzepfosia.”

Waeburania 10:29

Ehe fat̯i wantu weonamubalifa Mwana jwa Muungu, wanahukumigwa myeedha myengaa zaid̯i? Wantu weonahenda hivi, kisa hu mwazi wa ḍamano ḍya Muungu uwadhereseyeo wakauhwaa dza mwazi usiokuwa mudheru, hakika wantu dzao wanahukumigwa vyumuni! Wao wanamukufuru Ruhu jwa Muungu na hali huyu Ruhu ndiye eyenahuyanga hi t̯ei ya Muungu. Hachi wantu dzao wadzapata hukumu nkali!

Upfenuo wa Yohana 11:11

Ela ḅaad̯a ya hiziḍe nsiku ntahu na nusu, Muungu kawangiza nsoho za kuwahendeza wawe mojo, nao wasumama. Na kula awaoneye kanjijwa ni oga mukuu muno.

Upfenuo wa Yohana 11:3

Ela kunawa mashaahiḍi wangu wawii. Wao nawapfa uwezo wa kuyavya unabii kwa huo muḍa wa hizo nsiku elefu modza na magana mawii na miyongo mihandahu. Nao wanayavya unabii wakiwa wavwaa nguo za magunia.”

Upfenuo wa Yohana 12:6

Na huyuḍe muke kad̯arama kenda yuwandani, pfantu epfoelekanyijwa ni Muungu ili aweze kut̯unzwa kwa nsiku elefu modza na magana mawii na miyongo mihandahu.

Upfenuo wa Yohana 21:10

D̯ubva kaniyongowa Ruhuni kanipfiika dzuu ya murima mukuu, endeekoakiuniyanga hu mudzi mudheru wa Yerusalemi ukwakusukani kuyawa mbinguni kwa Muungu.

Upfenuo wa Yohana 21:2

Na niuona hu mudzi mudheru, yani Yerusalemi mpya, ikwakusukani kuyawa mbinguni kwa Muungu. Hu mudzi wiwa upambwa urembo dza ḅiḅi harusi apambijwee na akiwa t̯ayari kwa dzambo ḍya muumewe.

Upfenuo wa Yohana 22:19

Na yuḍejwonse adzeefuta kiḍechonse kahi ya hivi vyuuwo vya unabii vyorejwevyo humu chuoni, nae Muungu anamupfoka hizi mvoni zyorejwezo humu chuoni. Anamupfoka hi hachiye ya kuunjia huḍe mudzi mudheru, na hi hachiye ya kuḍya haya matunda ya huḍe muhi wiwonawapfa wantu maisha ya kuunga na yuungo.