2 Wakorint̯o 7:11 - Pokomo

¹¹ Hu tsungu wenu wiwa ni miro ya Muungu kwenu. T̯ayowani namuna umuhendezeyevyo mukiperuka! Ntamukugala wantu wahiḍu t̯u, ela mugala hat̯a na hamu ya kuniyanga kwamba ntamu tsowa ḍiḍeḍyonse. Haya yahendekeeyo ntayakumutsakiza hat̯a kachuchu, ishinu yamungiza oga kwa haya yadzeyohendeka. Nywinywi ntamukutsaka kuniona t̯u, ela mwiiwa hat̯a na hamu ya kunihehea na kumuadhiḅu huyu mutsovi. Mudziyanga na kula njia kwamba nywinywi ntamu tsowa dzuu ya hiḍi dzambo.

2 Wakorint̯o 7:11 ပူးပေါင်းရင်းမြစ်များ

Marko 3:5

Yesu kawahaaza na dzitso ḍya ngoro, koro kasikit̯iswa ni myojo yao myumu. Kisa kamwamba huyuḍe muntu ahinamfiye, “Ugonzowe hu mukonowo!” Huyuḍe muntu kaugonzowa na upfowa pfapfo.

Yohana 2:17

Haya haya yepfohendeka, hawa wanafund̯i wa Yesu wakumbuka haya yorejweyo humu matsoroni kwamba, “Tsako ḍyangu kwa nyumbayo ḍinanipfya dza moho.”

Mahendo 17:16

Paulo epfoakimuinda Sila na Timoteo hukuḍe Atene, mojowe umunangika epfoona namuna ya hu mudzi udzaiyevyo masanamu ya miungu.

Warumi 11:20

Ni hachi. Ela kumbukani kwamba hawa Waisiraeli wadzizigwa dza mahambi yasiyovyaa kwa kwamba ntawakumuhikiza Muungu. Nanywi munakaa imara kwa kwamba mumuhikiza. Ela hiyo hiyo naitseewa saḅaḅu ya kwamba mudzione hat̯a. Ikaani mukimushooga Muungu.

Warumi 14:18

Na yuḍejwonse eyenamuhumikia Kirist̯o nehii njia anamutsakiza Muungu, na wanaad̯amu pia wanamuona kwamba kakuhendani sawa.

Warumi 3:5

Ikiwa kwamba mazuka yehu yanayanga namuna ya Muungu aivyo muhachi epfonahuhukumu, d̯ubva aswi hwambedze? Hwambe kakuhuoneani? Nyakunenani hivi koro ndivyo vya wantu wangine wevyonat̯ara.

1 Wakorint̯o 12:25

Ndookomu kuna umodza wa hu mwii, na sehemu zonse za hu mwii zinamuud̯amiana.

1 Wakorint̯o 5:2

Kisa mwakudzionani! Ni muwe kwamba munjijwa ni sikit̯iko, na huyu muntu ahendeye haya muwe kwamba mumuyavya tsanganikoni.

2 Wakorint̯o 13:7

Nami, hat̯a nikihwajwa dza muntu ashindijwe, mayombo yangu kwa Muungu ni kwamba, nywinywi mutsehenda tsowa ḍiḍeḍyonse. Muud̯ama yangu ni kwamba nywinywi muhende yeyo ya hachi, si kwamba mimi nionekane kwamba nifaulu.

2 Wakorint̯o 2:6

Koro hi adhaḅu apfegejweyo ni wenji wenu, imut̯osa.

2 Wakorint̯o 6:4

Ishinu, hunayanga kwamba hu wahumisi wa Muungu kwa kula kintu hwichonahenda. Hunait̯isa muno hukwakukuntiswani d̯ina, hunait̯isa kwa maisha momu momu na kwa kula aina ya d̯ina.

2 Wakorint̯o 7:1

Watsakwa, hizi hizi ahad̯i Muungu kazihuwekea swiswi. D̯ubva nahudzidherese kwa kuyatsa kula kintu chichonaihendeza mii yehu na ruhu zehu kutsaawa nd̯eru. Nahuishi maisha ya udheru muhupfu kwa dzambo ḍya kushooga kumutsowea Muungu.

2 Wakorint̯o 7:7

Kihungiziyecho mojo si huku kudzakwe t̯u, ela hat̯a haya maagu ahupfiyeyo, ya namuna mumungiziyevyo mojo. Kahusumwiiya namuna mwivyokut̯amanini kuniona, namuna mwivyokudziut̯ini kwa hayaḍe munihendeeyo, na namuna mwivyo t̯ayari kunihehea. Ndookomu sasa tsekea yangu ni nkuu muno.

2 Wakorint̯o 7:9

Ela sasa nitsekea. Sikutsekea kwa kwamba niimungiza tsungu, ela nitsekea kwamba hu tsungu nimungiziyeo umuhendeza muperuye hizi njia zenu. Iwa ni miro ya Muungu kwamba munjijwe ni hu huu tsungu. Hivi huhendeyevyo ntahukumukukamisa kiruhu.

2 Wakorint̯o 9:2

Nimanya ya kwamba nywinywi muna mojo wa kuyavya, na hat̯a nimushad̯a kwa wantu wa Makedonia. Niwamba, “Hawa wandugu wa Akaya, ut̯ayari wao wa kuyavya wanao hangu mwaka dzana.” Hu moho wenu nywinywi uwangiza mojo wangine wenji waḍabve kuyavya.

Waefeso 4:26

Siyatse ngoro ikut̯awale uhende nabvise. Na ngoroyo naitsetswesa dzuwa.

Waefeso 5:11

Namutsegijana na wantu weo kizani muhende haya weyonahenda yasiyokuwa na maana. Ishinu viwambieni tswee kwamba hivi wevyokuhendani ni matsowa!

Wafilipi 2:12

D̯ubva watsakwa, dza mwiivyomukinit̯ii kut̯wa nipfokuwa pfamodza nanywi, ḅasi hat̯a hivi hivi niivyo kuye nanywi gijani kunit̯ii. Gijani kuhenda mema, mukimushooga Muungu muno kuzimuni mwa maisha yenu ya mupfonyo.

1 Watesalonike 4:6

Ndookomu muntu nka ruhusa ya kumutsowea Mukirist̯o mwenziwe ne hi njia, ahwae kisichokuwa chakwe. Haya hwiiyamwambia na humukanya mudzit̯unze nayo, maanaye Ḅwana anawahukumu hawaḍe wonse weonahenda mambo dza haya.

1 Timoteo 5:20

Ela hawa wazee weonahenda nabvise, wabuse wekeani tswee, ili hawa wangine nao wanjie oga.

2 Timoteo 2:15

Ḍema mala wiyonaweza upate kuhikizika kwa Muungu, uwe muhumisi asiyeionea yutswa kaziye na eyenaiyongweeza urembo hi hachi ya haya Maagu Mema ya Muungu.

Tito 3:8

Hivi ni vyuuwo vya ḍugha. Natsaka uyangizie hiḍu haya mambo, ili kwamba hawaḍe wamuhikiziyeo Muungu, wamuud̯amie kuhenda mambo mema. Wakihenda hivi ni urembo na vina maana kwa kula muntu.

Waeburania 4:1

Hi ahad̯i ya Muungu ya kuhupfiika hiḍe nsi ya kuyavya hara, amaale ipfo. D̯ubva nahuchimizeni, kutsekudzawa hat̯a mumodza jwenu jwa kuonekana kwamba kashindwa kuinjia hi nsi ya kuyavya hara.

Yakobo 3:17

Ela hi mvidhyo iyonayawa kwa Muungu, nguzi d̯ura inamumpa muntu kuishi maisha yasiyo t̯amba zuka ḍiḍeḍyonse. Kisa, inamumpa kutsaka kuishi na wantu na naghea, inamumpa kut̯aria wenziwe na inamumpa mojo wa kusikiiya na kuhwaa vyuuwo vya wangine. Mvidhyo ya Muungu inamumpa muntu kufwia t̯ei wenziwe na kuwahendea mema kut̯wa, na nkawezi kuwa na uḅaguzi wala umbiimbii.

1 Pet̯ero 1:17

Muungu anahukumu kula muntu kuuḅana na mahendoye pfasipfo kumuhendea kind̯eḍi. D̯ubva ikiwa kwamba Muungu munakaa na kumuhana Baba, ḅasi ni had̯i hapfa lumwenguni mwipfokukaani dza wageni, muishi kwa kumuhila.

1 Pet̯ero 2:2

Kamiani kuḍya chakuḍya cha kiruhu dza hiviḍe vya wana vilelehea wevyonakamia kununa, ili kwamba mugije kukuya kiruhu;

Yud̯a 1:23

Wangine wapfoweni muwapfonye kuyawana na haya makaa ya moho weyokutsakani kunjia. Kuna na wangine weo wanabvise mwiwonamala kuwafwiya t̯ei, ela chimizani watsekudzamuhendeza mugwe nabviseni munjie t̯amba zuka.

Upfenuo wa Yohana 3:19

Kula nimutsakiye, mimi namukanya na kumuadhiḅu. D̯ubva hendani hiḍu mupfyehuze mama.