Na ntaku yuḍejwonse jwa kuhuhukumu koro Kirist̯o Yesu ndiye afwiye, akifufuka na akikaa mukono kuyume wa Muungu, na jeje ndiye eyenahuyombea kwa Muungu.
Haya ya muhimu ya mwiso niyapfokeeyeyo, ndiyo niyamukiziiyeyo nanywi. Haya ni kwamba: *Kirist̯o kafwa hupate kuyatsijwa nabvise zehu, dza vya matsoro yaneneyevyo.
Jeje kafwa kwa dzambo ḍya wantu wonse, ili kwamba hawaḍe weokuishini watseishi maisha yao wao wenye, ela wamuishie Kirist̯o. Koro iwa ni kwa dzambo ḍyao kwamba Kirist̯o kafwa kisa kafufujwa.
Kirist̯o nkakuhenda nabvise iḍeyonse, ela Muungu kamuhendeza kuwa mvuugiya ya nabvise zehu, ili kwamba, kwa njia ya Kirist̯o, Muungu ahuhendeze kuwa wadheru, dza vyakwe jeje aivyo mudheru.
Ishini maisha ya kuwa na matsako kwa wangine dza vya *Kirist̯o ahutsakiyevyo hat̯a akidziyavya maishaye dza mvuugiya kwa dzambo ḍyehu. Hii ni mvuugiya imutsakizieyo Muungu.
Wandugu, ntahut̯aki muwe kizani dzuu ya haya yadzeyohendeka kwa hawaḍe wayawiyeo lumwenguni, ili mutsekudzasikit̯ika kuchia chima, dza hivi vya hawa walumwengu wasio mat̯umaini wevyonahenda.
Jeje kayavya maisha yakwe kuwa ḍiba ḍya kuwapfonya wantu wonse. Na huu ndiwo ushaahiḍi udziyeo na wakati mwema kuyanga kwamba Muungu anatsaka wantu wonse wapfonywe.
Jeje kadziyavya maishaye kwa dzambo ḍyehu, ahupfonye na mazuka yonse na kuhudheresa na nabvise zehu, huwe wantuwe jeje heket̯u weo na hamu ya kuhenda mambo mema.
Jeje mwenye kazipfagaaza nabvise zehu mwiini mwakwe epfofwa hapfaḍe muhini mwa mpatsa, ili kwamba hutseewa wahumwa wa nabvise kawii, ela huishi udheruni. Kwa kumad̯aiswa kwakwe hupata kupfowa.
Koro Kirist̯o mwenye, kafwa mweedha mumodza t̯u kwa dzambo ḍya wanabvise. Jeje eye muhachi kafwa kwa dzambo ḍya wantu wasikwaa wahachi. Kahenda hivi ili aweze kumuyeha kwa Muungu. Wamuyaga hu mwii, ela kafufuka, na ruhuye yaa mojo.