1 Watesalonike 2:4 - Pokomo

⁴ Kusumwiiya kwehu hunasumwiiya dza wantu wa Muungu atsakizijweo nao. Jeje kahuona wantu wahikizika na kahupfa kazi ya kusumwiiya *Maagu Mema dzuu ya Yesu *Kirist̯o. Naswi hukwakusumwiiyani, ntahusumwiiye kutsakiza wantu, hunasumwiiya kumutsakiza Muungu aimanyiye hi myojo yehu.

1 Watesalonike 2:4 ပူးပေါင်းရင်းမြစ်များ

Luka 12:42

Ḅwana kamwambukuya kamwamba, “Muhumisi mwema na eye muhikizika ni dza yu? Ni huyuḍe jwa kwamba huyu ḅwana jwakwe anaweza kumumpa muzigo wa kuit̯unza hi nyumbaye na kuwapfa chakuḍya hawa wantu wa hapfaḍe balabalani.

Luka 16:11

D̯ubva ikiwa kwamba ntamunahikizika na ujabva wa lumwengu huju, munahikizikadze na ujabva wa ḍugha wa Muungu eonapfa wantu?

Yohana 21:17

Makisa Yesu kamuuza Pet̯ero ḍya hahu kamwamba, “Dze Simioni mwana jwa Yohana, kunitsaka?” Pet̯ero kasikia tsungu kwa dzambo ḍya hivi vya Yesu amuuziyevyo mweedha wa hahu kwamba kamutsaka ambu hat̯a. Nae kamwamba, “Ḅwana, wewe kumanya kula kintu. Wewe mwenye kumanya ya kwamba mimi nikutsaka!” D̯ubva nae Yesu kamwamba, “Haya, zit̯ikise mbuzi zangu.

Warumi 8:27

Na Muungu, huyu aimanyiye myojo ya wantu kamanya hivi vya huyu Ruhu evyonanena, kwa dzambo ḍya kwamba huyu Ruhu anawayombea wantu wa Muungu kuuḅana na hivi vya Muungu evyonatsaka.

1 Wakorint̯o 7:25

Sasa, dzuu ya hawa wasiodzahwaa ambu wasiodzahwajwa, si amuri ya kumumpa kuyawa kwa Ḅwana, ela nyakumumpani mat̯aro yangu. Serefat̯ani nivyokunenani, maanaye mimi ni muntu nifwiijwe t̯ei ni Ḅwana na akinihendeza muntu jwa kuserefat̯ika.

1 Wakorint̯o 9:17

Koro t̯ambere hi hii kazi nindeewa nyakuihendani kwa kutsaka kwangu, nindeewa na hachi ya kuipfwa; ela si kwa kutsaka kwangu mwenye, ni kazi Muungu kainimpa.

2 Wakorint̯o 2:17

Swiswi ntahukwaa dza wangine wenji na wenji weonahwaa kusumwiiya chuuwo cha Muungu dza kwamba ni bit̯i t̯u ya kudzilachia maisha. Ishinu, swiswi hunasumwiiya na myojo midheru usoni kwa Muungu, kwa kwamba ndiye ahuhumie na hu wahumisi wa Kirist̯o.

2 Wakorint̯o 4:2

Mambo ya yutswa yeyonahendwa kisiri-siri, swiswi huyadziza. Ntahukwaa wantu wa makulekule wala wantu weonakiperuya chuuwo cha Muungu kinene nsuwe. Swiswi hi hachi ya haya *Maagu Mema, hunainena wekeani tswee na Muungu akiwa shaahiḍi. Hunahenda hivi, hukidzikwat̯ya kwamba kula muntu anaona kwamba haya hwiyokuhendani ni mambo ya sawa.

2 Wakorint̯o 5:11

Kwa dzambo ḍya kwamba swiswi humanya urembo muno maana ya kumuhila Ḅwana, hunaḍema kuwasosobva na wantu wangine waikuḅali hi hachi. Muungu kamanya niivyo, nanywi nat̯ara munimanya urembo muno.

2 Wakorint̯o 5:16

Hangu hwipfohikiza, ntahupime muntu na mat̯aro ya kilumwengu. Gula d̯ura hwikimuhwaa Kirist̯o na hiyo hiyo njia, ela sasa huviyatsa.

Wagalatia 1:10

Avi nivyokunenani, mwakut̯arani ya kwamba nyakulachani kudzitsakiza kwa wanaad̯amu? Sivyo hat̯a! Nichokulachani ni kumutsakiza Muungu. T̯ambere nindeewa nyakulachani kudzitsakiza kwa wanaad̯amu, sindeewa muhumisi jwa Kirist̯o.

Wagalatia 2:7

D̯ubva wahambuya kwamba Muungu kanitsana nisumwiiye Maagu Mema kwa wantu wasiokuwa Wayahud̯i, dza viviḍe evyomutsana Pet̯ero kuwasumwiiya hawa Wayahud̯i.

Waefeso 3:8

Na hali kahi ya wantu wonse wa Muungu, mimi ndimi nisiyekuwa na maana jwa mwiso. Ela hat̯a vivyo, Muungu kanimpa kazi ya maana ya kuwasumwiiya wantu wa vyeet̯i dzuu ya mema makuu na makuu ya Kirist̯o yasiyo chima.

Waefeso 6:6

Namutsehenda hivi wakiwa kumuonani ḅasi ili wapate kumushad̯a, ela hendani hivi kwa kwamba mu wahumwa wa Kirist̯o mwiwokuhendani miro ya Muungu na nguvu zenu zonse.

Wakolosai 3:22

Nywinywi wahumwa, wat̯iini kwa kula njia hawa maḅwana wenu wa hapfa hapfa lumwenguni. Namutsehenda kazi mupate kuonekana t̯u ambu mupate kudzitsakiza kwao ḅasi, ela hendani kazi na mojo mumodza kwa dzambo ḍya Ḅwana Yesu.

1 Timoteo 6:20

Timoteo, yat̯unze haya uyapfegejweyo kuyat̯unza. Dzit̯anye na vyuuwo vya kilumwengu na yuḍaat̯o jwa uḍyura, jwa wantu wangine wejonajuhana “umanyi,” kimatsowa.

2 Timoteo 1:14

It̯unze hi nkandi ya maana ya haya Maagu Mema uipfegejweyo ni Muungu. It̯unze kwa nguvu za Ruhu Mudheru, huyu eyenaishi kuzimuni mwehu.

2 Timoteo 2:2

Hayaḍe mayongweezo nikupfiyeyo usoni ya mashaahiḍi wenji na wenji, yahwae uyawayongweeze wantu weonahikizika, wadzeoweza kuwayongweeza na wantu wangine.

Tito 1:3

Muungu mupfonya jwehu kayahuyanga haya haya *Maagu Mema kwa wakati mwema. Kayanimpa haya haya Maagu Mema niyasumwiiye, nami ndivyo nivyokuhendani.

Waeburania 4:13

Ntaku chichonaweza kufitsika kwa Muungu. Jeje kula kiumbe kakuchionani tswee. Na ndiye hudzeeyamuparia hayaḍe yonse huhendeyeyo maishani mwehu.

1 Pet̯ero 4:11

Muntu akiwa na t̯ola ya kunena vyuuwo vya Muungu, ni had̯i akivinena dza vyuuwo viyawiyevyo kwa Muungu. Muntu akiwa na t̯ola ya uhumisi, ni had̯i ahumike na hizi nguvu apfegejwezo ni Muungu. Na kwa hayo yonse, Muungu mwenye nguvu na uwezo, apate kushad̯wa kuchiiya na kwa Yesu Kirist̯o hat̯a pfasipfosia. Amina.

Upfenuo wa Yohana 2:23

Wonse weokuuḅani mayongweezoye nawayaga tswee! Na matsanganiko yonse yanamanya kwamba mimi ndimi nimanyiye mojo wa kula muntu na mat̯aroye. Nami kula mumodza jwenu namuipfa kuuḅana na mahendoye.